«Արի Պարի Քոչարի» Համահայկական Ֆլեշմոպը Կրկին Ոտքի Կը Հանէ Աշխարհի Հայերը

0
352

Ֆրանսայի Կրենոպլ քաղաքի հայկական մշակոյթի տունը 2018 թուականի 26 մայիսին առաջին անգամ կազմակերպեց նախադէպը չունեցող «Արի պարի Քոչարի» համահայկական ֆլեշմոպը, որ մեծ խանդավառութեամբ ընդունուեցաւ Հայաստանի եւ Սփիւռքի հայկական համայնքներուն մէջ: Հաշուի առնելով Սփիւռքի բուռն արձագանքը` որոշուած է այս տարի նոյնպէս կազմակերպել համահայկական շարժումը:

Ինչպէս «Հայերն այսօր»-ի հետ զրոյցին ըսաւ նախաձեռնութեան հեղինակ Սիրանոյշ Խաչատրեան, 2019 թուականի ծրագիրը նուիրուած է հայ մշակոյթի երկու կարկառուն դէմքերու` Կոմիտաս Վարդապետի եւ Յովհաննէս Թումանեանի ծննդեան 150-ամեակներուն:

«Հաւատարիմ մնալով աշխարհասփիւռ հայերուն «Քոչարի»-ի շուրջ համախմբելու առաքելութիւնը` այս տարի ընտրած ենք «Կարնոյ քոչարին»` որպէս մասնակցութեան համար առաջնային պար: Քիչերը գիտեն, որ Կոմիտասը բացի երգերէն, գրի  առած է նաեւ պարեր, որոնցմէ մէկն ալ Կոմիտասի «Շորոր»-ն է: Այսինքն, կ՛առաջարկենք «Կարնոյ քոչարի»-էն բացի, պարել նաեւ «Շորոր»-ը եւ աւանդական «Քոչարի»-ի այլ տարբերակներ` ըստ ցանկութեան»,-«Հայերն այսօր»-ի հետ զրոյցին ըսաւ  Սիրանոյշ Խաչատրեան` ընդգծելով, որ կ՛ակնկալեն Հայաստանի, Արցախի եւ Սփիւռքի մէջ ապրող հայերու աշխոյժ մասնակցութիւնը:

Աւելցնենք, որ այս նախաձեռնութեան նպատակն է ցոյց տալ հայ ժողովուրդի համախմբուածութիւնը, ինչպէս նաեւ նպաստել հայկական մշակոյթի պահպանման ու տարածման:

Համահայկական շարժման արդէն մասնակցելու ցանկութիւն  յայտնած են Ֆրանսայի տարբեր քաղաքներու, Զուիցերիոյ Նոշատել քաղաքի, Թիֆլիսի, Հելսինքիի, Ամսթըրտամի, Հոնկ Քոնկի, Մոսկուայի, Ուրուկուէյի,Պրազիլի, Աթէնքի հայկական համայնքներու  եւ Երեւանի, Գիւմրիի տարբեր պարախումբեր:

Պարերու մասին համառօտ տեղեկութիւնները եւ ուսուցողական հոլովակները կրնաք գտնել  aripariqochari.com կայքին մէջ, շուտով նաեւ «Արի պարի Քոչարի» համահայկական շարժման ֆէյսպուքեան էջին վրայ:

Գրանցուելու համար անցնիլ հետեւեալ յղումով`

http://www.aripariqochari.com/participate/?fbclid=IwAR14ZxX09Tu43AaqnN5M5h9lNXQKQsnHz6Nt5oBe4XenQyvKqdFkQpcyRbE

www.facebook.com/aripariqochari/

 [email protected]

www.aripariqochari.com

LEAVE A REPLY

Please enter your comment!
Please enter your name here