Մոսկուա Մամլոյ Ազատութեան Դէմ Քայլ Կը Համարէ Ասանժի Ձերբակալութիւնը

0
324

ՄՈՍԿՈՒԱ, «Ինտիփենտընթ».- Լոնտոնի մէջ տեղի ունեցած «Ուիքիլիքս»ի հիմնադիր Ժուլիան Ասանժի ձերբակալութիւնը տարբեր մակարդակներու վրայ խստօրէն քննադատուեցաւ Ռուսիոյ մէջ։

12 Ապրիլին, նախագահ Վլատիմիր Փութինի բանբեր Տմիթրի Փեսքով յայտարարեց, թէ Ասանժի դէմ սկսած հալածանքը խոտոր կը համեմատի մամլոյ ազատութեան սկզբունքներուն հետ։

Իր կարգին, Ռուսիոյ արտաքին գործոց նախարարութեան բանբեր Մարիա Զախարովա, անդրադառնալով Ասանժի ձերբակալման՝ յայտնեց, որ իրենք զիրեք «ժողովրդավարութեան ձեռքը» ներկայացնող կողմերը հիմա իրենք «կը խեղդեն ազատութիւնը»:

Նաեւ, «Ուիքիլիքս» կայքը յայտարարութիւն մը հրապարակելով՝ շեշտեց, թէ Ասանժը ապաստանեալի իրաւունքէն զրկելու Էքուատորի որոշումը միջազգային օրէնքներու խախտում է:

Յատկանշական է նաեւ, որ 2016-ի նախագահական ընտրապայքարի թէժ օրերուն «Ուիքիլիքս»ի հետ «սիրահարած» (իր բնութագրումով) նախագահ Տոնալտ Թրամփ 11 Ապրիլին յայտարարեց. «Ոչինչ գիտեմ «Ուիքիլիքս»ի մասին»։

Նշենք, որ Ռուսիոյ եւ Թրամփի ընտրապայքարին միջեւ կապերը հետապնդած յատուկ դատախազ Ռոպերթ Միւլըր հաստատած էր, որ Թրամփի ընտրապայքարը կապի մէջ էր «Ուիքիլիքս»ի հետ, որ ընտրապայքարի ճակատագրական պահուն վարկաբեկիչ տեղեկութիւններ հրապարակեց Թրամփի մրցակից Հիլըրի Գլինթընի մասին։

 

LEAVE A REPLY

Please enter your comment!
Please enter your name here