Հայ Պատուիրակը ԵԽԽՎի Մէջ Հայոց Ցեղասպանութեան Ճանաչման Անհրաժեշտութեան Հարցը Բարձրաձայնեց

0
345

Եւրոպայի խորհուրդի խորհրդարանական վեհաժողովի գարնանային նստաշրջանի նիստին, հայկական պատուիրակութեան անդամ, «Իմ Քայլը» խմբակցութեան պատգամաւոր Վլատիմիր Վարդանեան օգտագործեց այդ հարթակը՝ բարձրացնելով Հայոց Ցեղասպանութեան ճանաչման եւ դատապարտման վերաբերեալ համապատասխան գործելակերպ որդեգրելու հարցը: Ըստ «Արմէնփրէս»ի՝ ԱԺի մէջ պատուիրակութեան անդամներու հրաւիրած ասուլիսին ընթացքին՝ այս մասին խօսեցաւ Վարդանեան:

«Օրակարգով ընդգրկուած էր ատելութեան խօսքի վերաբերեալ բաւական լուրջ հատուած: Եւ անոր ծիրին մէջ, ելոյթիս մէջ անդրադարձայ ատելութեան խօսքին: Ոչ մէկ ցեղասպանութիւն կարելի է իրականացնել առանց ատելութեան խօսքի: Հարց բարձրացաւ, թէ 100 տարի անցած է Հայոց Ցեղասպանութենէն, այդուհանդերձ մենք Եւրոպայի խորհուրդի անդամ երկիրներուն մէջ կը բախինք հայատեացութեան զանազան դէպքերու: Եւ այս տեսանկիւնէն մենք պիտի օգտագործենք այս հարթակը՝ պահանջելով Հայոց Ցեղասպանութեան ճանաչման եւ դատապարտման վերաբերեալ համապատասխան գործելակերպ որդեգրել, եւ պիտի փորձենք մեր ելոյթներուն ու գործունէութեան միջոցով կարելի եղածին չափ նուազեցնել յետագային որեւէ ցեղասպանութեան իրագործման կարելիութիւնը», ըսաւ Վարդանեան:

Ան նշեց, որ անդրադարձ եղաւ ոչ միայն Հայոց Ցեղասպանութեան, այլ նաեւ այլ ցեղասպանութեան դէպքերու, օրինակ, Ռուանտայի՝ նկատի ունենալով, որ Հայաստանի արտաքին քաղաքականութեան մէջ կարեւոր դերակատարութիւն կը տրուի նաեւ ցեղասպանութեան յանցագործութիւններու կանխարգիլման:

LEAVE A REPLY

Please enter your comment!
Please enter your name here