Մնացականեանի Հետ «Ծաւալուն Եւ Առարկայական Բանակցութիւններ» Տեղի Ունեցան. Մամետիարով

0
292

ՊԱՔՈՒ, «Armenia.az».- Երեքշաբթի, 16 Ապրիլին, Ատրպէյճանի արտաքին գործոց նախարար Էլմար Մամետիարով, պատասխանելով լրագրողներու հարցումներուն՝ յայտարարեց, թէ մէկ օր առաջ ԵԱՀԿի Մինսկի խմբակի համանախագահներուն հետ Ատրպէյճանի, Հայաստանի եւ Ռուսիոյ արտաքին գործոց նախարարներու Մոսկուայի մէջ տեղի ունեցած հանդիպման ընթացքին քննարկուեցան շարք մը առաջարկներ:

«Ընդհանուր առմամբ, Հայաստանի արտաքին գործոց նախարար Զօհրապ Մնացականեանի հետ ունեցանք շատ ծաւալուն եւ առարկայական բանակցութիւններ: Յստակ կերպով քննարկուեցան այն հարցերը, որոնք մինչեւ այսօր կը խոչընդոտէին բանակցութիւններու յառաջընթացը: Չեմ կրնար խօսիլ լիարժէք յառաջընթացի մասին, սակայն մենք կրցանք աւելի մանրամասն եւ աւելի խոր հասկանալ այն կէտերը, որոնք խնդիրներ յառաջացուցած են մեզի համար՝ հայկական կողմին հետ», ըսաւ ան՝ աւելցնելով. «Անշուշտ, մէկ հանդիպումով կարելի չէ լուծել բոլոր հարցերը: Այս հանդիպման ձեռքբերումը այն էր, որ մենք հասկցանք, թէ կան այնպիսի հարցեր, զորս պէտք է լուծել: Օրինակ, Հայաստան բարձրացուց կարգավիճակի եւ ապահովութեան վերաբերեալ հարցերը, իսկ մենք՝ բռնագրաւեալ տարածքներէն Հայաստանի զինուած ուժերու հեռացման եւ գաղթականներու հարազատ հողերը վերադառնալու հարցերը: Քննարկումները անցան այս չորս հարցերուն շուրջ եւ բանակցութիւնները շարունակելու որոշում տրուեցաւ»։

Ան ընդգծեց, որ հանդիպման ընթացքին կատարուեցան շարք մը առաջարկներ, քննարկումին ներկայ բոլոր կողմերէն։

LEAVE A REPLY

Please enter your comment!
Please enter your name here