Ո՞ւր են Պատերազմական ատեանի ատենագրութիւնները. Կարօ Փայլանի Հարցապնդումը՝ Թուրքիոյ Նախագահի Օգնականին

0
450

Ինչպէս  «Հայերն այսօր»-ին կը յայտնէ Տիգրանակերտի պատգամաւոր Կարօ Փայլանի խորհրդատու՝ Սեւան Տէյիրմենճեան, Թուրքիոյ խորհրդարանի ազգութեամբ հայ պատգամաւոր Կարօ Փայլան Թուրքիոյ հանրապետութեան նախագահի օգնական Ֆուաթ Օքթային յղած է հետեւեալ հարցումը, պատասխանի պահանջքով։

-Հանր. նախագահ Էրտողան հայոց Մեծ Եղեռնի 104-երորդ տարելիցին առթիւ, 24 ապրիլ 2019-ին կատարած յայտարարութեան մէջ, նշած է. «Մեր արխիւներուն դռները բաց են բոլոր անոնցառջեւ, որոնց նպատակն է բացայայտել ճշմարտութիւնը։ Մենք գաղտնիք չունինք»։

Այսպէսով շեշտելով, թէ պետական արխիւները բաց են բոլոր ուսումնասիրողներու առջեւ։

–  Ուստի, կը հարցնենք՝ հայոց դէմ գործուած մարդկային յանցագործութեանց ոճրագործները դատելու նպատակով 1919-1922 թթ. գործած Պատերազմական ատեանի ատենագրութիւններուն ճակատագիրը։ Ուսումնասիրողներ կը յայտնեն, թէ յիշեալ ատենագրութիւնները հասանելի չեն պրպտողներուն։

– Պատերազմական ատեանի ատենագրութիւնները պետական արխիւներուն մէջ չե՞ն գտնուիր։

– Յիշեալն ատենագրութիւնները առաջին անգամ ե՞րբ արխիւ մուտքագրուած են: Ատենագրութիւններու տուեալները վերջին անգամ ե՞րբ եւ ո՞ր արխիւի գրացուցակին վրայ էին:

– Ո՞ւր են եւ ո՞ր արխիւի մէջ ի պահ դրուած են այս ատենագրութիւնները, եթէ իրականութեան չեն համապատասխաներ բնագրելու բացակայութեան կամ անոնց անհասանելիութեան վերաբերեալ պնդումները:

Ուսումնասիրողներ, որոնք «կ՚ուզեն ճշմարտութիւնը բացայայտել», ի՞նչ միջոցով պիտի կարենան հասնիլ այդ ատենագրութիւններուն:

LEAVE A REPLY

Please enter your comment!
Please enter your name here