Շիֆի Եւ Ցեղասպանութեան Մասին Կեղծ Լուրին Տարածման Նպաստած Են Ռուսական Կողմեր

0
266

ՓՈՔՐԻԿ ՀԱՅԱՍՏԱՆ.- «Պազֆիտնիուզ»ի լրագրող Ճէյն Լիթվեինենքօ կը հաղորդէ, թէ հետախուզութիւնները ցոյց տուած են, թէ անցեալ շաբաթ տարաձայնուած այն կեղծ լուրը, թէ Միացեալ Նահանգներու մօտ Սէուտական Արաբիոյ դեսպան՝ իշխանուհի Ռիմա պընթ Պանտար Սէուտ քոնկրեսական Էտըմ Շիֆին խոստացած է նիւթապէս աջակցիլ Հայոց Ցեղասպանութիւնը ճանչցող բանաձեւին վաւերացումը ապահովելու աշխատանքին, լայնօրէն սկսած է տարածուիլ միայն Ռուսիոյ մէջ ռուսերէնի թարգմանուելէ եւ ռուսական ու հայկական լրատուամիջոցներու կողմէ հաղորդուելէ ետք։

Քոնկրեսական Շիֆ այս շաբաթ հերքեց, թէ նման հանդիպում մը տեղի ունեցած է կամ նման խոստում մը կատարուած է, խոստանալով բացայայտել նման կեղծ լուրերը հաղորդողները եւ տարածողները։

Յիշեցնենք, որ 26 Ապրիլին, «լուր»ը հրապարակուած էր կեղծ՝ «adamcshiff.com» կայքին վրայ, որուն անունը նման է իսկական կայքին՝ «adamschiff.com» անունին։ Անգլերէն լուրը գրուած էր քերականական եւ շարահիւսական սխալներով, որոնք սակայն անհետացած են անոր ռուսերէն թարգմանութեան մէջ, որ կատարուած էր Սոֆիա Վերներ անունով (կամ կեղծանունով) մէկու մը կողմէ, որ լուրը ղրկած է բազմաթիւ լրատուամիջոցներու։

Լիթվեինենքօ կը գրէ, թէ մինչ Շիֆ Թուրքիան նեղացուցած է Հայոց Ցեղասխանութեան բանաձեւով, քոնկրեսականը նաեւ հետեւողականօրէն թիրախն է Միացեալ Նահանգներու նախագահ Տանըլտ Թրամփի յարձակումներուն, Ռուսիոյ եւ Թրամփի ընտրապայքարի խմբակին միջեւ կապերը հետաքննելուն համար։

Քոնրեսականին գրասնեակին կողմէ կատարուած հետաքննութիւն մը բացայայտած էր, որ կեղծ համացանցային կայքը գնուած է այս տարուան 24 Ապրիլին, իսկ կեղծ լուրը տեղադրուած է 26 Ապրիլին, սակայն 29 Ապրիլին կրցած է մեծ թիւով կարդացողներ ներգրաւել։

LEAVE A REPLY

Please enter your comment!
Please enter your name here