Արցախը Հայաստանի անբաժան մէկ մասն է եւ…վերջ

0
376
Վարուժ Թէնպէլեան- ՀԱՅ ԵՄ

Ընկերային ցանցերու վրայ վերջերս արդարօրէն տարածուած է մտահոգութիւն մը՝ Արցախը իբրեւ Հայաստանէն անջատ միաւոր ներկայացնող երբեմն անգիտակից բնորոշումներուն վերաբերեալ:

Կը հանդիպինք ստորեւ տրուած նմանօրինակ նկատառումներու.

-Արցախի անջատ գոյութեան բնորոշումները երկու Հայաստաններու գոյութեան եւ նուիրականացման չ’առաջնորդե՞ր արդեօք եւ այդ մէկը աղիտալի չէ՞:

-Հայաստանաբնակ, սփիւռքահայ բնորոշումներուն կողքին, արցախահա՞յն ալ պիտի աւելցնենք եւ հայու նոր տեսակ մըն ալ պիտի շինե՞նք:

-Մի տարանջատէք Հայաստանն ու Արցախը, կ’ըսէր բարեկամ մը եւ առնուազն՝ Հայաստանի Հանրապետութիւն եւ Արցախի Հանրապետութիւն բնորոշումները պահեցէք երբ կը խօսիք անոնց մասին:

-Ի՞նչ պիտի պատահի, եթէ յանկարծ պետութիւն մը ճանչնայ Արցախի Հանրապետութիւնը:

Այս առիթով, պիտի ուզէինք առաջարկել հետեւեալը.

Ճիշդ է որ քաղաքական նկատառումներով Հայաստանի Հանրապետութեան կողքին գոյութիւն ունի Արցախի Հանրապետութիւնը եւ այդ իրավիճակը կապուած է շրջանային ու միջազգային քաղաքական կացութիւններու, ինչպէս նաեւ՝ բանակցային դրոյթներու եւ հոլովոյթներու հետ, բայց ժողովրդային, մտաւորական ու լրագրական մակարդակներու վրայ, Արցախը է ու պէտք է մնայ Հայաստանի մէկ մասը՝ իբրեւ մարզ…եւ վերջակէտ:

Անշուշտ մօտիկ ապագային նաեւ տէ ժիւրէ զայն Հայաստանի մէկ մարզը տեսնելու յոյսով:

Թերեւս բանակցային մակարդակի վրայ, Արցախի Հանրապետութիւնը, իբրեւ քաղաքական միաւոր կրնայ մարտավարական խօսակցութիւններու նիւթ ծառայել, բայց ժողովրդային մակարդակի վրայ մենք պէտք չունինք քայլ պահելու մարտավարական ճկունութեանց հետ:

Արցախը, ինչպէս միւս բոլոր մարզերը՝ Արագածոտն, Արարատ, Արմաւիր, Գեղարքունիք, Լոռի,  Կոտայք, Շիրակ, Սիւնիք, Վայոց ձոր եւ Տաւուշ, մաս կը կազմէ Հայաստանի հանրապետութեան:

Եւ վերջ:

Հետեւաբար, մամլոյ մեր պաշտօնակիցներուն եւ ընկերային ցանցերու այցելուներուն կ’առաջարկենք գործածել «Արցախի մարզ» բնորոշումը երբ կը խօսին «լեռնային Ղարաբաղի» մասին:

LEAVE A REPLY

Please enter your comment!
Please enter your name here