Ճեմալ Փաշայի Թոռնիկը Կը Դատապարտուի

0
323

ԹԵՀՐԱՆ, «Ալիք».- Թուրք յայտնի այլախոհ գրող, լրագրող եւ Հայոց Ցեղասպանութեան գլխաւոր կազմակերպիչներէն Ճեմալ փաշայի թոռնիկը՝ Հասան Ճեմալ դատապարտուեցաւ 3 տարուան եւ 22 օրուան բանտարկութեան, սակայն բողոքարկումներէ ետք բանտարկութիւնը փոխարինուեցաւ 3360 թրքական լիրա (մօտաւորապէս 545 տոլար) տուգանքով:

Հայոց Ցեղասպանութիւնը ճանչցող Հասան Ճեմալի նկատմամբ դատական գործընթաց սկսած էր, երբ քրտական տագնապին մասին անոր մէկ յօդուածը «ահաբեկչութեան քարոզչութիւն» նկատուած էր. ամբաստանութիւն մը, որ թրքական իշխանութիւնները յաճախ կը շահագործեն այլախոհները լռութեան մատնելու նպատակով։

«Իմ մասնագիտական կեանքիս մէջ երբեք չեմ եղած քարոզչութիւն կատարող լրագրող. ես միշտ պաշտպանած եմ խաղաղութիւնը: Քրտական հարցին վերաբերեալ 4 գիրքեր հրատարակած եմ եւ հազարաւոր յօդուածներ գրած: Բոլորին մէջ խաղաղութիւն կայ: Մամուլի ազատութիւն չունեցող երկիր մը չի կրնար խօսիլ ժողովրդավարութեան կամ օրէնքի գերիշխանութեան մասին», նշեց Հասան Ճեմալ:

Նշենք, որ Տիգրանակերտի մէջ տեղի ունեցած քիւրտերու եւ թուրքերու միջեւ բախումներուն վերաբերող վերոնոշեալ յօդուածին մէջ, 75-ամեայ լրագրողը անդրադարձած էր նաեւ հայերուն։ Ներկայացնելով տեղացի կնոջ մը պատմութիւնը, ան գրած էր, թէ անոր մայրն ու հայրը հայեր էին, որոնք իրեն ամուսնացուցած էին 15 տարեկանին՝ քիւրտի մը հետ: «Վախէս ոչ ոքի կ՛ըսէի, որ հայ եմ: 4րդ դասարան էի, երբ իմացայ, որ հայ եմ: Դպրոցին մէջ, թաղամասին մէջ, վատ բան էր «հայ» բառը: Մօրս հարցուցի, թէ ի՛նչ է հայը եւ այն ատեն ըսաւ, որ մենք հայ ենք, բայց խստօրէն զգուշացուց, որ այդ մասին չխօսիմ: Տիգրանակերտի մէջ շատ իսլամացուած հայեր կան»:

LEAVE A REPLY

Please enter your comment!
Please enter your name here