Մոսկուա Արցախի Պատերազմի Զինադադարի 25-ամեակին Առթիւ Յայտարարութիւն Կը Հրապարակէ

0
458

ՄՈՍԿՈՒԱ.- Կիրակի օր կ՛ամբողջանայ Պիշքեքի արձանագրութիւններուն 25-ամեակը եւ այս առիթով, Ռուսիոյ արտաքին գործոց նախարարութիւնը 10 Մայիսին հրապարակեց յատուկ յայտարարութիւն մը:

Մոսկուայի տարածած յայտարարութեան մէջ կը նշուի, որ Ատրպէյճանի, Հայաստանի եւ Լեռնային Ղարաբաղի ստորագրած համաձայնագիրը ի զօրու դարձաւ 12 Մայիս 1994-ին։

Համաձայնութիւնը ձեռք բերուեցաւ Ռուսիոյ ուղղակի միջնորդութեամբ եւ անոր շնորհիւ դադրեցան զանգուածային արիւնահեղութիւնները եւ սկսաւ Արցախի հակամարտութեան կարգաւորման գործընթացը՝ քաղաքական եւ դիւանագիտական միջոցներով: Մինչեւ այսօր  համաձայնագիրը կը շարունակէ մնալ հրադադարի պահպանման հիմքը։

Սերկէյ Լաւրովի գլխաւորած գերատեսչութիւնը կը նշէ, որ կարգաւորման շուրջ բանակցութիւնները բարդ գործընթաց է, եւ կարգաւորման առանցքային հարցերուն շուրջ համաձայնութեան գալը կը պահանջէ ժամանակ ու քաղաքական կամք:

Յայտարարութեան մէջ գրուած է, որ Մոսկուա հակամարտող կողմերուն՝ խաղաղութեան հասնելու ուղղուած համատեղ աշխատանքները շարունակելու պատրաստակամութիւնը կը նկատէ՝ իբրեւ այդ հաստատումին փաստ, նշելով, որ Հայաստանի եւ Ատրպէյճանի ղեկավարներուն միջեւ Վիեննայի մէջ տեղի ունեցած վերջին հանդիպումը եւ երկու երկիրներուն արտաքին գործոց նախարարներուն միջեւ Մոսկուայի մէջ տեղի ունեցած բանակցութիւնները:

Հաղորդագրութեան մէջ նաեւ կ՛ըսուի, որ Մոսկուա իր կողմէ փոխզիջումային հանգուցալուծումներ գտնելու աշխոյժ աջակցութիւն պիտի ցուցաբերէ: «Մենք պիտի  շարունակենք մեր միջնորդական ջանքերը՝ Մինսկի խմբակի ծիրին մէջ՝ Միացեալ Նահանգներու եւ Ֆրանսայի հետ», կը նշուի յայտարարութեան մէջ:

Յիշեցնենք, որ 25 տարի առաջ ռազմական պարտութիւնը ստիպեց Ատրպէյճանին ընդունիլ Մոսկուայի զինադադարի առաջարկը, որ առաջնորդեց հրադադարի համաձայնագիրի ստորագրութեան, Հայաստանի եւ Ատրպէյճանի պաշտպանութեան նախարարներուն, նաեւ Լեռնային Ղարաբաղի բանակի հրամանատարին միջեւ:

LEAVE A REPLY

Please enter your comment!
Please enter your name here