«Լեռնային Ղարաբաղի Հիմնահարցի Լուծման Բեմագրութիւնը Պէտք Է Ընդունելի Ըլլայ Հայաստանի, Արցախի Եւ Ատրպէյճանի Ժողովուրդներուն Համար». Նիկոլ Փաշինեան

0
193

ԵՐԵՒԱՆ.- Հայաստանի Հանրապետութեան վարչապետ Նիկոլ Փաշինեան յղեց ուղերձ մը արցախեան տագնապի հրադադարի հաստատման 25-ամեակին առիթով:

Ստորեւ սոյն յայտարարութիւնը.

«Հիմնախնդրի կարգաւորմանն առնչուող այս կարեւորագոյն փաստաթուղթը ստորագրել են Ադրբեջանի պաշտպանութեան նախարար Մամեդրաֆի Մամեդովը՝ 9 Մայիս 1994-ին, ՀՀ պաշտպանութեան նախարար Սերժ Սարգսեանը՝  10 Մայիսին, Լեռնային Ղարաբաղի Պաշտպանութեան բանակի հրամանատար Սամուէլ Բաբայեանը՝  11 Մայիսին:

Հրադադարի մասին գրաւոր համաձայնութիւնն ուժի մէջ մտաւ 14 Մայիսի 1994-ի կէսգիշերին եւ այս տարիների ընթացքում հայկական կողմերը մշտապէս հաւատարիմ են եղել եւ շարունակելու են հաւատարիմ մնալ այդ կարեւորագոյն համաձայնագրի իրականացմանը:

Քառորդ դար է անցել այդ պահից, որի ընթացքում հրադադարը, ցաւօք, չի վերածուել խաղաղութեան:

Ընդգծելով տարածաշրջանի ժողովուրդներին հակամարտութեան խաղաղ կարգաւորմանը նախապատրաստելու կարեւորութիւնը՝ ցանկանում եմ եւս մէկ անգամ նշել, որ հիմնախնդրի կարգաւորման սցենարը պէտք է ընդունելի լինի բոլոր երեք կողմերի՝ Հայաստանի, Արցախի եւ Ադրբեջանի ժողովուրդների համար:

Առարկայական բանակցութիւններ եւ արդիւնք հնարաւոր են միայն այն դէպքում, երբ Արցախը կը ներգրաւուի այն գործընթացում, որն ի վերջոյ որոշելու է նրա կարգավիճակն ու ապահովելու է այնտեղ ապրող մարդկանց անվտանգութեան երաշխիքները:

Մենք վստահ ենք, որ եռակողմ համաձայնութիւնն այն իրական հիմքն է, որի հիման վրայ հնարաւոր է կառուցել երկարատեւ խաղաղութիւն եւ համագործակցութիւն:

Ցանկանում եմ շեշտել, որ ես՝ որպէս Հայաստանի Հանրապետութեան վարչապետ, պատրաստ եմ երաշխաւորել, որ Հայաստանը շարունակելու է հաւատարիմ մնալ հրադադարի պահպանման համաձայնագրի իրականացմանն ու ջանքեր ներդնել՝ հիմնախնդրի կարգաւորման եւ տարածաշրջանում խաղաղութեան հասնելու նպատակով՝ շարունակելով լինել Լեռնային Ղարաբաղի անվտանգութեան երաշխաւորը:

Հրադադարի շարունակական պահպանումն ու երկխօսութիւնը խնդրի հանգուցալուծման միջոցներից, թերեւս, կարեւորագոյններն են: Անհրաժեշտ է զերծ մնալ ատելութեան միջավայրի, անհանդուրժողականութեան եւ լարուածութեան կուտակումներին ուղղուած քայլերից:

Աշխարհում գոյութիւն չունի որեւէ ժողովուրդ, որը խաղաղութիւն չի ցանկանում: Եւ չենք կարծում, որ գոյութիւն ունի որեւէ ծնող, ով սահմանին կանգնած իր զաւակի համար չցանկանայ անամպ երկինք:

Համոզուած եմ, որ հայ եւ ադրբեջանցի ժողովուրդներն արժանի են խաղաղութեան ու առաջընթացի, ուստի կոչ եմ անում բոլորիս գործել յանուն այս նպատակների»։

LEAVE A REPLY

Please enter your comment!
Please enter your name here