Ատրպէյճան Սկզբունքօրէն Դէմ Է, Որ Արցախ Մասնակցի Բանակցութիւններուն. Մամետիարով

0
146

ԵՐԵՒԱՆ, «Ազատութիւն».- Ատրպէյճան սկզբունքօրէն դէմ է, որ Արցախ մասնակցի բանակցութիւններուն, 14 Մայիսին, Պրիւքսէլի մէջ յայտարարեց Ատրպէյճանի արտաքին գործոց նախարար Էլմար Մամետիարով, պատասխանելով «Ազատութիւն» կայանի հայկական սպասարկութեան լրագրողի հարցումին։

Փորձելով արդարացնել Պաքուի ընդդիմութիւնը Երեւանի այն պնդումին, որ եթէ բանակցային գործընթացին Ստեփանակերտի մասնակցութիւն չըլլայ, կարելի պիտի չըլլայ գտնել հակամարտութեան իսկական կարգաւորում՝ Մամետիարով ըսաւ. «Ես կը կարծեմ, որ այդ մօտեցումը այդքան ալ ճիշդ չէ, որովհետեւ այս բոլոր տարիներուն ընթացքին, որ մենք բանակցութիւններ կը վարէինք, համանախագահները տարածաշրջան այցելելու ընթացքին կ՛երթային նաեւ Ղարաբաղ եւ կը խորհրդակցէին Ղարաբաղի հայկական համայնքի ներկայացուցիչներուն հետ. բացի այդ, թէ՛ նախկին եւ թէ գործող վարչակազմը, յոյս ունիմ, կը տեղեկացնեն Ղարաբաղի հայ համայնքի ներկայացուցիչներուն: Այնպէս որ, արդէն անոնք որոշ չափով ներգրաւուած են բանակցութիւններուն մէջ եւ ձեր ղեկավարութիւնը այս մասին խօսած է: Ես կը կարծեմ, որ հարցի բանալին մասնակցիլ-չմասնակցիլը չէ. հարցը այն է, որ մենք պէտք է լուրջ քաղաքական մօտեցում ցուցաբերենք, պէտք է նստինք եւ աւարտենք այն, ինչը ես կ՛անուանեմ առարկայական բանակցութիւններ, որովհետեւ բոլորը ամէն ինչ շատ լաւ գիտեն, գիտեն, որ սեղանին ինչ փաստաթուղթ դրուած է. ինչո՞ւ պէտք է մենք մեզ խաբենք»:

Մամետիարով չէ կրցած պատասխան մը տալ «Ազատութիւն» կայանի լրագրողի այն հարցումին, թէ Նիկոլ Փաշինեան ինչպէ՞ս կրնայ Արցախի ժողովուրդը ներկայացնել, երբ ինք չէ ընտրուած այդ ժողովուրդին կողմէ:

Մամետիարով նաեւ յայտնեց, թէ ներկայիս Հայաստանի եւ Ատրպէյճանի արտաքին գործոց նախարարներու նոր հանդիպման յստակ ծրագիր չկայ։

LEAVE A REPLY

Please enter your comment!
Please enter your name here