Լիբանանի Հիւանդանոցներու Պատկերը

0
293

Յ. ԼԱՏՈՅԵԱՆ

20-րդ դարու վերջաւորութեան Պէյրութը ծանօթ էր իբրեւ արաբական աշխարհի հիւանդանոցային սպասարկութեան ռահվիրան:

21-րդ դարու սկիզբէն ի վեր Լիբանանի հիւանդանոցներու բժշկական սարքերու եւ ծառայութեան մակարդակի բարձրացումը մեծ ոստում արձանագրեց:

Իւրաքանչիւր հազար քաղաքացիի 4 բժիշկ կը ծառայէ, թիւերը այդ ցոյց կու տան:

Լիբանանի հիւանդանոցային սպասարկութեան 90 տոկոսը անձնական է, իսկ 10 տոկոսը` պետական:

Անձնական հիւանդանոցներու մուտքերը չորս տեղերէ են.

Ա.- Պետական ծածկոյթ (ուիզարա),
Բ.- Ընկերային ապահովութեան սնտուկ (տաման),
Գ.- Ապահովագրութեան ընկերութիւններ եւ առողջապահական սնտուկներ (Ինշուրընս քոմփընիզ),
Դ.- Անձնական (փրայվըթ):

Լիբանանի բժշկական խնամքը լաւ ցուցանիշ մըն է Միջին Արեւելքի երկիրներու մէջ: Այսինքն երկար ապրելու իմաստով, եթէ Ֆրանսայի եւ Անգլիոյ մէջ  միջին տարիքը 80 է, Լիբանանի մէջ 74 է, իսկ Հայաստանի մէջ` 68:

Փաստօրէն, Լիբանանի բժշկական եւ հիւանդանոցային ծառայութիւնները մասնագիտական եւ լաւ մակարդակ մը ունենալով հանդերձ, միշտ ալ այս գծով դժգոհութիւններ կ՛արձանագրուին: Լիբանանի մէջ ակնյայտ է նաեւ այն, որ վերջին տարիներուն Սուրիոյ քաղաքացիական պատերազմի պատճառով, գաղթականներու հոսքը հիւանդանոցներու ծառայութեան եւ ֆիզիքական տեղի իմաստով, բաւական դժուարութիւններ յառաջացուց:

Լիբանանի հիւանդանոցներու անկողիններու թիւի պատկեր – 2018

Անձնական հիւանդանոց Պետական հիւանդանոց
Պէյրութ 1960 19,9 346 20,5
Պեքաա 1472 14,41 240 14,22
Լեռնալիբանան 3756 36,77 381 22,57
Հարաւ 1578 15,45 224 13,27
Հիւսիս 1448 14,18 497 29,44
———- ———- ———- ———-
10.214 100 1688 100

Լիբանանի հիւանդանոցներու 2018-ի հիւանդներու թիւը

Անձնական հիւանդանոց Պետական հիւանդանոց
Պէյրութ 111775 18,29 13274 15,25
Պեքաա 87766 14,36 6564 7,54
Լեռնալիբանան 207683 33,88 17268 19,84
Հարաւ 101354 16,58 16165 18,57
Հիւսիս 103193 16,88 33766 38,79
———- ———- ———- ———-
611173 100 87037 100

Լիբանանի հիւանդանոցային սպասարկութեան թղթածրարը իր բարդ կառուցուածքով եւ քաղաքականացուած անակնկալներով միշտ ալ տագնապի վիճակի մէջ է:

Հակառակ հիւանդանոցներու թիւի բազմացման կամ գոյութիւն ունեցող հիւանդանոցներու ընդլայնման` լուրջ տնտեսական եւ մարդուժի դժուարութիւններ կը դիմագրաւեն բոլորն ալ անխտիր:

Հիմնականը այն է, որ հիւանդանոցներու գլխաւոր եկամուտը գեղեցկագիտական գործողութիւններու մուտքն է, որ փաստօրէն տարուէ տարի սկսած է աւելի զարգանալ եւ թափ ստանալ: Այս իմաստով ալ կարգ մը հիւանդանոցներ կը նախընտրեն բժշկական, առողջապահական գործողութիւններու փոխարէն` այդ տեսակի գործողութիւններով խճողեն իրենց հաստատութիւնները:

Վերջապէս, այս բոլորէն անդին, մէկ բան ալ կը հաստատենք, որ Լիբանանի բժշկական բնագաւառը` իբրեւ կիրարկում, ախտաճանաչում եւ բուժում, տակաւին բարձր մակարդակի վրայ է եւ մրցակից է` Միջին Արեւելքի եւ Եւրոպայի շատ մը երկիրներու հետ` եւ նորարարութեան հետ` քայլ պահած:

 

LEAVE A REPLY

Please enter your comment!
Please enter your name here