Պաքու Չստորագրեց Արեւելեան Գործընկերութեան Տասնամեակի Հռչակագիրը

0
111

ԵՐԵՒԱՆ, «Ազատութիւն».- Պրիւքսէլի մէջ տեղի ունեցած Արեւելեան գործընկերութեան տասնամեակին նուիրուած հանդիսաւոր հաւաքը 13 Մայիսին շեղեցաւ նախատեսուած ընթացքէն՝ Պաքուի պատճառով: Արդարեւ, գագաթնաժողովի աւարտին, Եւրոպական Միութեան ու ծրագիրի անդամ վեց երկիրներու արտաքին գործոց նախարարները չկրցան միացեալ յայտարարութեան մը տակ ստորագրելու համաձայնութիւն ապահովել, որովհետեւ Պաքու դժգոհութիւն յայտնեց, որ հռչակագիրին մէջ որեւէ յիշատակում չկայ Ատրպէյճանի տարածքային ամբողջականութեան մասին:

Յատկանշական է, որ նախորդ տարիներուն վաւերացուած փաստաթղթերուն մէջ այդ դրոյթը յիշատակուած էր, սակայն այս անգամ եւրոպացի առաջնորդները մերժեցին Պաքուի պահանջը եւ փաստաթուղթը չփոխեցին, որուն իբրեւ հետեւանք՝ ծրագիրին տասը տարիներու պատմութեան մէջ առաջին անգամն ըլլալով ամփոփիչ յայտարարութիւնը ստորագրուեցաւ ոչ թէ հաւաքին բոլոր մասնակցողներուն, այլ միայն Եւրոպական Միութեան արտաքին քաղաքականութեան գլխաւոր յանձնակատար Ֆետերիքա Մոկերինիի կողմէ:

Ատրպէյճանի արտաքին գործոց նախարարը 14 Մայիսին հաստատեց, որ Պրիւքսէլի առաջարկած ձեւակերպումները «անընդունելի են» Պաքուի համար:

Նոյն օրը, Հայաստանի արտաքին գործոց նախարար Զօհրապ Մնացականեան ընդգծեց, որ Հայաստան գոհ է յոբելենական գագաթնաժողովի արդիւնքներէն:

«Մենք սկզբունքօրէն գոհ ենք արդիւքներից: Ինչ վերաբերում է ամփոփիչ յայտարարութեանը, այն եղել է Մոկերինիի կողմից, որը արտայայտում է անդամ պետութիւնների եւ Հայաստանի մօտեցումները», նշեց Հայաստանի արտաքին գործոց նախարարը:

Մնացականեան նաեւ յօդուած մը հրապարակեց «EUobserver» կայքին վրայ՝ ընդգծելով, որ Երեւան բազմաթիւ ձեռքբերումներ ունի Եւրոպական Միութեան հետ գործընկերութենէն եւ պիտի շարունակէ խորացնել յարաբերութիւնները եւրոպական ընտանիքին հետ, աւելցնելով, որ Երեւան յաւելեալ աջակցութիւն կ՛ակնկալէ Պրիւքսէլէն Հարաւային Կովկասի մէջ խաղաղութիւն եւ ապահովութիւն հաստատելու ջանքերուն մէջ:

«Օրինակ՝ տեւական աջակցութիւնը Լեռնային Ղարաբաղի ժողովրդի ինքնորոշման կենսական իրաւունքին՝ ԵԱՀԿ Մինսկի խմբի շրջանակներում հակամարտութեան խաղաղ կարգաւորման համար, քննութիւն է, թէ որքանով են մեր դաշնակիցները հետեւողական մեր տարածաշրջանում իրական խաղաղութեանը աջակցելու եւ մեր ժողովուրդների՝ անվտանգութեան վերաբերեալ մտահոգութիւնները փարատելու հարցում», կը գրէ Մնացականեան։

Իր կարգին, Եւրոպական Միութեան ընդարձակման հարցերով յանձնակատար Եոհանս Հան 14 Մայիսին «Ազատութեան» հետ ունեցած զրոյցին ընթացքին պատմեց, որ թէ՛ Հայաստանի վարչապետ Նիկոլ Փաշինեան եւ թէ Ատրպէյճանի նախագահ Իլհամ Ալիեւ 13 Մայիսին անդրադարձան Արցախի հարցին՝ ընդհանուր հաւաքին ընթացքին: «Սակայն, անոնք դէմ առ դէմ չխօսեցան եւ այդպիսի հանդիպում նախատեսուած չէր: Բայց, կը կարծեմ, որ այդ անհրաժեշտ բանակցութիւններու կայացումը կրնայ նոր շրջադարձ ըլլալ եւ Եւրոպական Միութեան նախագահը եւս յստակօրէն ընդգծեց, որ մենք, իբրեւ Եւրոպական Միութիւն, կ՛ակնկալենք հարցին լուծումը: Վստահ եմ, որ եկող ամիսներուն, եւ յոյս ունիմ, որ ոչ թէ տարիներուն, հոս նոր շարժում կ՛ըլլայ եւ կը կարծեմ, որ երկու կողմերն ալ այժմ շահագրգռուած են, որ հարցը առարկայականօրէն քննարկեն», ընդգծեց Հան:

Նշենք, թէ կ՛ակնկալուէր, որ Արեւելեան գործընկերութեան յոբելենական հաւաքին, Ատրպէյճան եւ Եւրոպական Միութիւնը վերջապէս կը ստորագրեն համագործակցութիւնը խորացնելու համաձայնագիրը, որուն շուրջ անոնք կը բանակցին առաւել քան 4 տարիէ ի վեր: Պատասխանելով այն հարցումին, թէ ինչո՛ւ փաստաթուղթը չստորագրուեցաւ՝ Եւրոպական Միութեան ընդարձակման հարցերու յանձնակատարը նշեց, որ կարեւորը որակն է եւ ոչ թէ արագութիւնը՝ նոյն ժամանակ ընդունելով, որ կողմերը տարակարծութիւններ ունին յատկապէս մարդկային իրաւունքներու ոլորտին մէջ:

LEAVE A REPLY

Please enter your comment!
Please enter your name here