Ստեփանակերտի Մէջ Քննարկուեցան Համահայկական 7-րդ Ամառնային Խաղերու Կազմակերպչական Հարցերը

0
1466

ՍՏԵՓԱՆԱԿԵՐՏ.- Արցախի Հանրապետութեան պետական նախարար Գրիգորի Մարտիրոսեան 14 Մայիսին ընդունեց Համահայկական խաղերու համաշխարհային կոմիտէի նախագահ Իշխան Զաքարեանի գլխաւորած պատուիրակութիւնը, որուն կազմին մէջ էին գլխաւոր բեմադրիչ Ռուբէն Յովհաննիսեան եւ տարբեր երկիրներու հետ աշխատանքներ իրականացնող պատասխանատուներ:

Ողջունելով ներկաները՝ պետական նախարարը նշեց, որ աշխատանքային խորհրդակցութիւնը նուիրուած է Համահայկական 7-րդ ամառնային խաղերու բացման եւ հիւրերու կեցութիւնը ապահովելու համար կազմակերպական հարցերը քննարկելուն:

«Մենք համապատասխան ժամանակամիջոցի մը մէջ պէտք է կարենանք աշխատանքները այնպէս իրականացնել, որ բացման հանդիսաւոր արարողութիւնը տեղի ունենայ բոլոր չափանիշներուն համապատասխան, այդ իսկ պատճառով, բոլոր գերատեսչութիւններուն կը յորդորեմ աշխատանքները կազմակերպել համակարգուած եւ փոխգործակցութեան հիմքերու վրայ», նշեց Մարտիրոսեան:

Շնորհակալութիւն յայտնելով ջերմ ընդունելութեան համար՝ Իշխան Զաքարեան նշեց, որ տարբեր ուղղութիւններով ձեւաւորուած աշխատանքային խումբերու համատեղ ջանքերուն շնորհիւ միայն կարելի է բոլոր հարցերուն շուրջ ունենալ կիրառելի լուծումներ: «Այդ օրերուն հանրապետութեան տարանցիկ ճանապարհները, քաղաքները, համայնքները պէտք է տօնական տեսք ունենան, աշխատանքներուն մէջ պէտք է ընդգրկենք մեծ թիւով կամաւորներ, իսկ կեցութեան վերաբերող հարցերուն լուծման ուղղութեամբ պէտք է օգտագործենք կարելի բոլոր տարբերակները», ըսաւ Զաքարեան:

Հանդիպման աւարտին տեղի ունեցաւ միտքերու փոխանակում, եւ պետական նախարարին կողմէ տրուեցան համապատասխան յանձնարարականներ:

Խորհրդակցութեան մասնակցեցան Պաշտպանութեան բանակի հրամանատար Կարէն Աբրահամեան, կրթութեան եւ գիտութեան նախարար Նարինէ Աղաբալեան, մշակոյթի, երիտասարդութեան հարցերու եւ զբօսաշրջութեան նախարար Լեռնիկ Յովհաննիսեան, քաղաքաշինութեան նախարար Կարէն Շահրամանեան, Ստեփանակերտի քաղաքապետ Սուրէն Գրիգորեան եւ պաշտօնատար այլ անձեր:

LEAVE A REPLY

Please enter your comment!
Please enter your name here