Արայիկ Յարութիւնեան Պիտի Մասնակցի 2020-ին Արցախի Մէջ Տեղի Ունենալիք Նախագահական Ընտրութիւններուն

0
373

Ըստ «Արցախփրէս»ի՝ Արցախի մէջ գործող «Ազատ Հայրենիք» կուսակցութեան ղեկավար Արայիկ Յարութիւնեան հանդէս եկաւ ծրագրային ելոյթով՝ ներկայացնելով կուսակցութեան նոր օրակարգը, յառաջիկայ ծրագիրները ու ընելիքները, ինչպէս նաեւ յստակ դիրքորոշում արտայայտեց սպասուող համապետական ընտրութիւններուն կառոյցին մասնակցութեան եւ ստեղծուած ներքաղաքական իրավիճակին շուրջ ունեցած իր տեսլականի վերաբերեալ:

Հանդիպման ընթացքին «Ազատ Հայրենիք» կուսակցութեան Քաշաթաղի շրջանի պատասխանատու Արտուշ Մխիթարեան իր ելոյթին մէջ ըսաւ, որ Բերձորի տարածքային գրասենեակին մէջ տեղի ունեցած կուսակցութեան համաժողովին ընթացքին, ի թիւս այլ հարցերու, քննարկուեցաւ նաեւ կուսակցութեան յառաջիկայ համագումարին կառոյցի նոր նախագահին, 2020-ին Արցախի մէջ տեղի ունենալիք նախագահական ընտրութիւններուն թեկնածուի առաջադրման հարցը: Համաժողովին մասնակցողները միաձայնութեամբ որոշեցին թեկնածու առաջադրել «Ազատ Հայրենիք» կուսակցութեան գործող նախագահ Արայիկ Յարութիւնեանը:

Վերջինս շնորհակալութիւն յայտնեց վստահութեան համար եւ իր համաձայնութիւնը տուաւ առաջարկին: Ան ըսաւ, որ հանդիպման օրը իր կողմէ պատահական չէ ընտրուած, որոքվհետեւ 18 Մայիս 1992-ին իրականացաւ իր նուիրական երազը՝ Մայր Հայաստանի հետ Արցախի վերամիաւորումը:

«Իմ հանդիպումներու շարքը սկսայ Իշխանաձորէն, որովհետեւ այս համայնքը վերջին տարիներուն եղած է ամէնէն աւելի զարգացող գիւղերէն մէկը: Այստեղ ես պատասխան կու տամ մատրիտեան սկզբունքներուն, քազանեան համաձայնագիրին եւ բանակցային գործընթացին վերաբերող մնացած հարցերուն: Մենք Սահմանադրութեամբ ամրագրուած հայրենիք ունինք, եւ պարտաւոր ենք քայլ առ քայլ հասնելու մեր վերջնական նպատակին: Ես այստեղ երդում կու տամ, որովհետեւ այստեղ են իմ մարտական եւ կուսակից ընկերները, համախոհները, հայրենակիցները, իմ ընտանիքը, որովհետեւ կը գիտակցիմ ինչ պատասխանատուութիւն պէտք է ստանձնեմ ձեր վստահութեան քուէն ստանալէն ետք: Տասը տարի Արցախի վարչապետը ըլլալով եւ գրեթէ մէկ տարի պետնախարար կը գիտակցիմ Արցախի մէջ տակաւին չլուծուած հարցերուն ծաւալին եւ անոնց լուծման եղանակներուն», ըսաւ Յարութիւնեան:

LEAVE A REPLY

Please enter your comment!
Please enter your name here