Իսլամացուած Հայերու Մասին Ֆիլմը 16 Յունիսին Պիտի Ցուցադրուի Տիգրանակերտի Մէջ

0
105

ԵՐԵՒԱՆ, «Էրմենիհապեր».- Կիրակի, 16 Յունիսին տեղի պիտի ունենայ Տիգրանակերտի Էղիլ շրջանի իսլամացուած հայերուն մասին պատմող «Պահուած Խաչ» վաւերագրական ֆիլմին անդրանիկ ցուցադրութիւնը:

Լրագրող Ալթան Սանճարի բեմադրութեամբ պատրաստուած ֆիլմը պիտի ցուցադրուի քաղաքապետարանի մշակոյթի եւ համաժողովներու կեդրոնին մէջ:

«Էղիլ շրջանը մինչեւ 1915 հայերով բնակուած եւ մեծամասնութեամբ հայ շրջաններէն մէկն էր Տիգրանակերտի մէջ: 1915-ին եւ անկէ ետք տեղի ունեցած կոտորածներէն ու բռնագաղթէն ետք, հայկական մշակոյթը ամբողջութեամբ ջնջուեցաւ այնտեղէն, իսկ ողջ մնացած հայ երեխաները եւ մնացած հայ բնակչութիւնը իսլամացուեցան: Հասարակութեան կողմէ «իսլամացուած հայեր» կոչուող բնակչութեան առաջին եւ երկրորդ սերունդները կը շարունակեն ապրիլ իրենց ինքնութենէն հեռացած: Էղիլի մէջ, ուր վերջին տարիներուն իրականացուող ուսումնասիրութիւններու, հաղորդումներու եւ ժողովներու իբրեւ արդիւնք՝ շատցած են ինքնութեան փնտռտուքները, սկսած է ի յայտ գալու «հայկականութեան հանգամանքը»», կ՛ըսուի ֆիլմին նկարագրութեան մէջ:

Երկու մասէ բաղկացած ֆիլմին առաջին մասը կեդրոնացած է 1915-ին տեղի ունեցած կոտորածներուն վրայ, իսկ 2րդ մասը կը պատմէ ինքնութեան ճգնաժամի, վերքերու եւ փնտռտուքներու մասին:

Լրագրողներ Ալթան Սանճարի եւ Սերհաթ Թեմելի մէկ տարուան աշխատանքով պատրաստած ֆիլմը նպատակ ունի Թուրքիոյ ժողովրդավարացման մէջ մեծ կարեւորութիւն ունեցող 1915-ի Հայոց Ցեղասպանութիւնը օրակարգի վրայ բերելով՝ կազմակերպել անոր հետ արդար առերեսումը:

LEAVE A REPLY

Please enter your comment!
Please enter your name here