Հանդիպում` Ընկերային Հարցերու Նախարար Տոքթ. Ռիշար Գույումճեանի Հետ

0
300

Երեսփոխան Յակոբ Բագրատունի, ընկերակցութեամբ Երեսփոխանական գրասենեակի տնօրէն Ռաֆֆի Մարգարեանի, Լիբանանահայ օգնութեան խաչի, «Գարակէօզեան» հիմնարկի, Ընկերային ծառայողներու միութեան, «Ճինիշեան» հաստատութեան եւ «Զուարթնոց» կեդրոնի ներկայացուցիչներուն, հանդիպում ունեցաւ ընկերային հարցերու նախարար տոքթ. Ռիշար Գույումճեանի հետ:

Հանդիպման ընթացքին իւրաքանչիւր հաստատութեան ներկայացուցիչ սպառիչ տեղեկութիւններ տուաւ իր մարզին մասին, յատկապէս անդրադառնալով կատարուած աշխատանքներուն, ապա թուելով այն դժուարութիւնները, որոնք կը յամենան այս կառոյցներուն մօտ, ինչ կը վերաբերի պետական տարբեր միաւորներու եւ հաստատութեանց հետ գործակցութեան:

Նախարար Գույումճեան լայն բացատրութիւններ խնդրեց ներկայացուցիչներէն` պատրաստակամութիւն յայտնելով անհրաժեշտ դասաւորումները կատարել լաւագոյն լուծումներուն հասնելու նպատակով:

Քննարկում Պուրճ Համուտի Ջրամատակարարման Խնդիրին

Աւելի ուշ, ընկերակցութեամբ Պուրճ Համուտի քաղաքապետ Մարտիկ Պօղոսեանի, Բագրատունի այցելեց Պէյրութի եւ Լեռնալիբանանի ջուրի սպասարկութեան ընդհանուր տնօրէն Ժան Ժըպրանի:

Քննարկումի նիւթ դարձաւ Պուրճ Համուտի ջրամատակարարման հարցը` ծանրանալով հաւասարակշռուած ջրաբաշխման անկանոնութիւններն ու հակաօրինական խախտումները սանձելու անհրաժեշտութեան եւ այս իմաստով ջուրի ընկերութեան եւ քաղաքապետութեան միջեւ գործակցութեան հրամայականին վրայ:

LEAVE A REPLY

Please enter your comment!
Please enter your name here