Փաշինեանը Նուիրատւութիւններու Նուազման Վտանգ Կը Տեսնէ՝ «Հայաստան» Հիմնադրամի Գումարներու Հաւաքագրման Կառուցակազմը Չփոխելու Պարագային

0
475

ՀՀ վարչապետ Նիկոլ Փաշինեան «Հայաստան» համահայկական հիմնադրամի գումարներու հաւաքագրման կառուցակազմը չփոխելու մէջ նուիրատուութիւններու նուազման վտանգ կը տեսնէ: Այս մասին, ըստ Armenpress.am-ի, Փաշինեանը նշեց 18 Յունիսին տեղի ունեցած «Հայաստան» համահայկական հիմնադրամի հոգաբարձուներու խորհուրդի տարեկան ժողովին ընթացքին:

«Մենք ամէն տարի կը խօսինք հաւաքագրումներու մասին: Ես կրնամ երաշխաւորել, որ այս համակարգով հաւաքագրումները անընդհատ պիտի նուազին: Մենք կրնանք վերցնել թիւեր, ուր համեմատաբար աւելի շատ հաւաքուած են գումարներ: Այդ հաւաքագրումներուն քարտէզը բանալու պարագային պիտի տեսնենք, որ ունինք դէպքեր, երբ գործարար մը նուիրաբերած է ընդհանուրի 50%-ը: Ասիկա, ի հարկէ, շատ լաւ է, եւ մենք շատ շնորհակալ պէտք է ըլլանք այդ մարդոց, բայց ահա այս կառուցուածքը այդ նուիրատուներն ալ կը մտահոգէ, որովհետեւ մարդիկ կ՝ըսեն` ինչու ես միայնակ կրնամ 7 միլիոն տալ, ամբողջ մնացեալ հայութիւնը եւս այդքան կամ աւելի քիչ: Այսինքն` մեր քաղաքականութիւնը այստեղ կ՝ապահովէ ոչ թէ անընդհատ ներգրաւուածութիւն, այլ աւելի ու աւելի քիչ շրջանակ կը ներգրաւէ այս թեմային մէջ, որ նոյնպէս կարեւոր խնդիր է»,- ըսաւ Փաշինեան:

«Հայաստան» համահայկական հիմնադրամի հոգաբարձուներու խորհրդի տարեկան ժողովին կը մասնակցէին  Նախագահ Արմէն Սարգսեան, վարչապետ Նիկոլ Բաշինեան, Արցախի հանրապետութեան նախագահ  Բագօ Սահակեան, Հայաստանէն, Արցախէն  եւ Սփիւռքէն   ներկայացուցիչներ:

 

 

LEAVE A REPLY

Please enter your comment!
Please enter your name here