ՀԲԸՄ-ի «Սաթամեան» Թատերախումբի «Փարատիսօ Պանդոկը» Կատակերգութիւնը

0
783

ԽԱՉԻԿ ՃԱՆՈՅԵԱՆ

Շաբաթ, 15 եւ Կիրակի, 16 Յունիսին, ՀԲԸՄ-ի Վաչէ եւ Թամար Մանուկեան կեդրոնի շատ գեղեցիկ սրահին մէջ տեղի ունեցան «Փարատիսօ Պանդոկը» կատակերգութեան ներկայացումները:

Յառաջիկայ Շաբաթ, 22 Յունիսին, երեկոյեան ժամը 8-էն սկսեալ եւ Կիրակի. 23 Յունիսի  երեկոյեան ժամը 6-էն սկսեալ, անգամ մը եւս պիտի ներկայացուի թատերախաղը:

Ինչպէս աշխարհի բոլոր հայաշատ գաղութներուն մէջ, քառասուն տարիներ առաջ, ՀԲԸՄ-ի ղեկավարները Լոս Անճելըսի մէջ եւս հիմը դրին նախ՝ «Արտաւազդ», ապա՝ «Սաթամեան» անունը կրող թատերախումբին:

Սկզբնական տարիներուն, խումբը ղեկավարած էին Լութֆի Թապագեան, Հայկազ Ստեփանեան, Ժիրայր Փափազեան եւ ուրիշներ, իսկ 30-35 տարիներէ ի վեր, խումբը կը ղեկավարէ այժմու ղեկավար, տաղանդաշատ դերասան, թատրոնի իսկական ղեկավար նոյնինքն՝ Գրիգոր Սաթամեան, իր շուրջ ունենալով ՀԲԸՄ-ի շրջանիս ղեկավարները, բարերարները եւ վարչականներու մեծ խումբ մը:

Քառասուն տարիներու այս խումբը ներկայացուցած է առաւել քան յիսուն մեծանուն հայ կամ օտար գրողներու թատրերգութիւններ եւ օփերէթներ:

Այս գործերուն մեծ մասը ներկայացուած է վարպետին՝ Գրիգոր Սաթամեանի ղեկավարութեամբ: Այս գործերուն մեծ մասը օտար լեզուով գրուած են, որ հայերէնի թարգմանած եւ հայացուցած է խումբին ղեկավարը:

Քառասուն տարիներու ընթացքին, մենք միշտ ներկայ եղած ենք բոլոր գործերուն եւ հիացած ենք այս խումբի ներկայացումներուն վրայ: Արհեստավարժութիւն, մակարդակ, յուզում, ծիծաղ, մարդկային նկարագիրի բացայայտում՝ այնքան գեղեցկօրէն տրուած են այս խումբին եւ ղեկավարին կողմէ, որոնք միշտ ալ արժանացած են ներկայ հանդիսականներու ամենաբարձր գնահատանքին:

***

Ահա այսպիսի վայելք մը ունեցանք Կիրակի, 16 Յունիսին, երբ ներկայ եղանք Ժորժ Ֆէյտոյի հեղինակած «Փարատիսօ Պանդոկը» երեք արարով կատակերգութեան: Մոլիէրէն ետք, Ֆրանսայի մեծագոյն երգիծականներէն մէկն է Ժորժ Ֆէյտօ (1862-1921): Ան գրած է առաւել քան վաթսուն թատերախաղեր, որոնցմէ շատերը ֆիլմի վերածուած են:

«Փարատիսօ Պանդոկը»ի թատերախաղին նիւթը հիմնուած է Ժորժ Ֆէյտոյի օրերու փարիզեան կեանքին վրայ, ուր հասարակութիւնը նիւթապէս բարօր վիճակ մը ունէր եւ քաղքէնիութիւնը իր բոլոր ազատամտութեամբ կ՛ապրէր Փարիզի մէջ:

«Փարատիսօ Պանդոկը» անբարոյական արարքներու եւ ժամադրութիւններու վայր մըն էր։ Քանի մը զոյգերու ընտանեկան վէճերուն իբրեւ արդիւնք՝ ազատամտութեան պայմաններէ քաջալերուած, կերպարները այս պանդոկը կը մեկնին իրենց բնազդներուն յագուրդ տալու: Հոս է, որ գրեթէ ամբողջ թատրերգութիւնը կ՛ընթանայ:

Կ՛արժէ տեսնել եւ վայելել այս թատրերգութիւնը, որ լիաթոք ծիծաղ պարգեւելու կողքին, կը ցուցադրէ արուեստի շատ գեղեցիկ գործ մը:

Գրիգոր Սաթամեանի մեծագոյն յաջողութիւնը այն է, որ կրցած է այս բոլոր տարիներու թատերախումբը թարմացնել նոր եւ երիտասարդ ուժերով, որդեգրելով ժամանակակից արդի թատրոնի մեթոտները:

Թատրոնը՝ իբրեւ դպրոց, հասարակութեան ծիծաղով բացայայտած է ընկերային յոռի բարքերը:

Այդ օր, բեմին վրայ ներկայացան 20-22 անձեր՝ բոլորն ալ երիտասարդ, եւ կրցան շնորհալի դերասանութեամբ ներկայացնել իրենց դերերը:

Իսկ վարագոյրի ետին, շատ գեղեցիկ բեմայարդարումով պատրաստուած էր բեմը:

Ջերմօրէն կը շնորհաւորենք Գրիգոր «Սաթամեան» թատերախումբը այս նոր յաղթանակին համար եւ անոր քառասնամեայ վաստակին առիթով։ Ամէն բանէ առաջ կը շնորհաւորենք հայրենիքի եւ Սփիւռքի մեծանուն դերասանապետ Գրիգոր Սաթամեանը, մաղթելով թատերախումբին կանաչ եւ նորանոր յաղթանակներով ճանապարհ մը:

«Փարատիսօ Պանդոկը» թատերախաղին ներկայ եղէք, մեծ հաճոյք եւ վայելք պիտի պարգեւէ ներկայ եղողներուն, նկատի առէք Շաբաթ, 22 եւ Կիրակի, 23 Յունիս թուականները:

LEAVE A REPLY

Please enter your comment!
Please enter your name here