Քոնկրեսական Շըրմըն Ատրպէյճանին Յարձակողական Հակաօդայիններու Վաճառքը Արգիլելու Առաջարկ Ներկայացուց

0
342

ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը հաղորդէ, թէ Քալիֆորնիայէն քոնկրեսական Պրետ Շըրմըն, որ անդամ է Ներկայացուցիչներու տան Արտաքին յարաբերութեան յանձնախումբին, 25 Յունիսին, առաջարկեց 2020-ի ռազմական ամավարկի յաւելուած մը, որուն վաւերացումով պիտի արգիլուի Ատրպէյճանին վաճառել այնպիսի հակաօդայիններ, որոնք կը վտանգեն քաղաքացիական օդանաւերու ապահով թռչիքները։

Այս նախաձեռնութեան նպատակն է արգիլել Պաքուին, որ սպառնայ Ստեփանակերտի քաղաքացիական օդակայանը օգտագործող օդանաւերուն:

«Այս առաջարկը ազդանշան է Ատրպէյճանին, որ չի կրնար այսուհետեւ եւս սպառնալ, թէ պիտի խոցէ քաղաքացիական օդանաւեր: Կարելի չէ արտօնել Ատրպէյճանին, որ նման արարքներով վախի տակ պահէ իր դրացիները», ըսաւ Շըրմըն:

Հայ Դատի յանձնախումբի գործադիր վարիչ Արամ Համբարեան ողջունեց այս քայլը եւ ըսաւ, որ Միացեալ Նահանգները սկզբունքով դէմ է քաղաքացիական օդանաւերու ուղղուած որեւէ սպառնալիքի:

Յիշեցնենք, որ 2011-ին, Ատրպէյճանի քաղաքացիական օդային ճամբորդութեան վարչութեան տնօրէն Արիֆ Մամետով տեղեկացուցած էր, որ Ատրպէյճանի կառավարութիւնը նախազգուշացուցած է Քաղաքացիական օդագնացութեան միջազգային կազմակերպութիւնը (ICAO), որ պիտի չարտօնէ թռիչքներ կատարել դէպի Արցախ, եւ ազդարարած էր, որ օդագնացութեան մասին օրէնքին համաձայն՝ կրնան «ոչնչացնել հոն ուղեւորուող օդանաւեր»: Ատրպէյճան կը շարունակէ հնչեցնել նոյն սպառնալիքները, որոնց իբրեւ հետեւանք՝ վերջին ութ տարիներուն Ստեփանակերտի քաղաքացիական օդակայանը փակ կը մնայ:

Ներկայացուցիչներու տան Օրէնքերու յանձնախումբը 8 Յուլիսի շաբթուան ընթացքին պիտի սկսի քննելու ռազմական ամավարկին մանրամասնութիւնները եւ անոր կից ներկայացուած առաջարկները:

LEAVE A REPLY

Please enter your comment!
Please enter your name here