Պոլսոյ Պատրիարքի Տեղապահի Ընտրութիւնը Կուսակալութեան Հրահանգով Յետաձգուեցաւ

0
398

ՊՈԼԻՍ, «Մարմարա», «Ակօս».- Պոլսոյ Հայոս պատրիարքական ընտրութեան հարցը դժբախտաբար անգամ մը եւս մտաւ դժուարութիւններու եւ բամբասանքներու գործընթացի մը մէջ։ Ի՞նչ կ՛անցնի կը դառնայ, շատ յայտնի չէ, եւ պատրիարքարանի պատասխանատուութիւնը ստանձնած հոգեւորականները ոչ միայն գոհացուցիչ պատասխաններ չունին, այլ նաեւ ներքին պառակտումի մը մէջ ինկած ըլլալ կը թուին։

Ինչպէս յայտնի է, 27 Յունիսին տեղի պիտի ունենար տեղապահի ընտրութիւն եւ երկու թեկնածուներն էին՝ Արամ արք. Աթէշեան ու Սահակ եպս. Մաշալեան։ Ամէն մարդ կը հաւատար, որ տեղապահի ընտրութեամբ առաջին լուրջ քայլը առնուած պիտի ըլլար դէպի պատրիարքական ընտրութիւն։ Բայց, 26 Յունիսի երեկոյեան, Արամ սրբազանի ստորագրութեամբ հրատարակուցաւ զեկոյց մը՝ ըստ որուն, Պոսլոյ կուսակալութիւնը ջնջած է 27 Յունիսի ընտրութիւնը եւ մէկ շաբաթով յետաձգած է զայն։ Պատճառին մասին լուսաբանութիւն մը չկար։

Այս անհաճոյ լուրին հրապարակումէն անմիջապէս ետք, ընկերային ցանցերու վրայ սկսաւ բանավէճ մը Արամ սրբազանի կողմնակիցներուն եւ հակառակորդներուն միջեւ ու ոմանք դարձեալ Արամ սրբազանը պատասխանատու նկատեցին այս յետաձգումին, պնդելով, որ վախցած է չընտրուելու հաւանականութենէն։

Արամ սրբազանը աւելի ուշ գրեց հետեւեալը. «Պետութիւնը նիւթի մը շուրջ որոշում մը կ՛առնէ. կարգ մը անձեր, որոնք յետին նպատակ ունին, պետութեան այդ որոշումն ալ ինծի կը վերագրեն։ Ես ինչ եմ եղեր, որ չէի գիտեր։ Ես կը սպասեմ, որ Սահակ սրբազանը անոնց պատասխան մը տայ, որովհետեւ ան լուր ունի բոլոր այս զարգացումներէն։ Տեղապահի ընտրութիւնը կուսակալութենէն եկած գրաւոր հրահանգով մը 4 Յուլիսին յետաձգուեցաւ»։

«Մարմարա»ն 27 Յունիսին կապ հաստատեց Սահակ սրբազանին հետ, որ կրկնեց Արամ սրբազանի պնդումները։

Իր կարգին, Ս. Փրկիչ հիւանդանոցի հոգաբարձութեան ատենապետ Պետրոս Շիրինօղլու յայտնեց, թէ պետութիւնը կը պնդէ, որ տեղապահ կրնան ընտրուիլ միայն այն հոգեւորականները, որոնք առնուազն հինգ տարի պաշտօնավարած են Թուրքիոյ մէջ։

«Տակաւին երէկ (25 Յունիսին) կը կարծէինք, թէ տեղի պիտի ունենայ տեղապահի ընտրութիւն, թէեւ շատ հաւատալիք բան չէ բայց, թերեւս մեր հոգեւորականները ունենան որոշ անհատական հեղինակութիւն, թէ՛ ժողովուրդին եւ թէ իրենց սեփական կամքով ընտրեն տեղապահը: Այսօր հնչած ծանուցումով յայտնի եղաւ, թէ փոխուած է տեղապահի ընտրութեան թուականը: Պատրիարքարանէն եկած գրութեան մէջ գոհացուցիչ ոչ մէկ բացատրութիւն կար կատարուածին մասին», կը գրէ «Ակօս»ը՝ աւելցնելով. «Վերջին պահուն գործադրուած խաղով մը տեղապահի թեկնածութեան իրաւունքը յափշտակուած էր Պէքճեան սրբազանէն։ Ան յայտարարեց, որ կատարուելիք տեղապահի ընտրութիւններուն կը զօրակցի Մաշալեան եպիսկոպոսին՝ գրելով. «Զիս չհրաւիրեցին Պոլիս: Արգելք հանդիսացան ընտրութեան մասնակցելուս: Ես ամենաճիշդը կը գնահատեմ Սահակ եպս. Մաշալեանի տեղապահ ընտրուիլը: Այսպիսով աւելի թափանցիկ գործընթացք մը կրնանք ունենալ: Հոգեւորականները իրենց ձայները պէտք է տան Սահակ սրբազանին»:

LEAVE A REPLY

Please enter your comment!
Please enter your name here