«Պահուած Խաչը» Ֆիլմին Բեմադրիչներուն Ազգայնամոլներուն Դէմ Դատը Կը Մերժուի

0
1055

ՊՈԼԻՍ, «Մարմարա».- Ինչպէս նախապէս հաղորդած էինք, իսլամացուած հայերու նուիրուած «Պահուած Խաչը» վաւերագրական ֆիլմին երկու բեմադրիչները պահանջած էին դատ բանալ «Ենի Աքիթ» թերթին դէմ, որուն մէջ ազգայնամոլներու կողմէ հրապարակուած էր բաւական ծանր յօդուած մը՝ բեմադրիչները իբրեւ թիրախ ցոյց տալով։ Կը հաղորդուի, որ դատարանը չընդունեց բեմադրիչներուն դիմումը։

Դիմումը քննարկուեցաւ Տիգրանակերտի 4րդ հաշտարար դատարանին կողմէ։ Դատարանը նշեց, որ թէեւ թերթին լրատուութեան մէջ տեղ գտած են կարգ մը նախադասութիւններ, որոնք բաւական խիստ ձեւակերպում ունին, սակայն նիւթը չի կրնար անձնական յարձակում նկատուիլ։

Յիշեցնենք, որ «Ենի Աքիթ»ի յօդուածին մէջ բեմադրիչներուն տրուած է «դաւաճան» պիտակաւորումը եւ հոն նաեւ նշուած է. «Քիւրտիստանի բանուորական կուսակցութեան համակիրներ Թուրքիոյ մէջ կ՛աջակցին Արեւմուտքի այն պնդումներուն, որոնք կը վերաբերին հայերը ցեղասպանութեան ենթարկելու հարցին եւ այս մասին Թուրքիոյ ուղղեալ մեղադրանքներուն։ Բեմադրիչ Ալթան Սանճար կ՛ըսէ, թէ ինք հայու թոռ է եւ իր պատրաստած ժապաւէնով կ՛աջակցի հայկական պնդումներուն»։

LEAVE A REPLY

Please enter your comment!
Please enter your name here