Ատրպէյճանի Նախագահի Հետ Թէժ Գիծը Աշխատում Է, Սակայն Չի Երաշխաւորում, Որ Զոհեր Չեն Լինելու. Փաշինեան

0
654

ԵՐԵՒԱՆ.- Հայաստանի վարչապետին եւ Ատրպէյճանին նախագահի միջեւ թէժ գիծը կը գործէ, բայց անիկա, ցաւօք, չ՛երաշխաւորեր, որ ճակատի վրայ զոհեր պիտի չըլլան:

Այս մասին յայտարարեց Նիկոլ Փաշինեան՝ «Ազատութիւն» կայանի տնօրէն Հրայր Թամրազեանին տուած հարցազրոյցին ընթացքին:

Ստորեւ կը ներկայացնենք տարբեր հարցումներու՝ Փաշինեանի տուած պատասխաններէն հատուածներ.

«Բայց մենք աշխատում ենք դրա համար, որպէսզի բանակցութիւնները ունենան յստակ արդիւնք: Ինչո՞ւ բանակցութիւնները չունեն յստակ արդիւնք: Ես հիմա միջազգային հանրութեան ներկայացուցիչների հետ, երբ ուզում եմ նկարագրեմ իրավիճակը, թէ ինչո՛ւ բանակցութիւնները առաջ չեն գնում, ասում եմ, որ ընդամէնը կայ մէկ պատճառ եւ մէկ նախադասութիւն: Երբ ընտրուեցի ՀՀ վարչապետ, Ազգային ժողովի ամբիոնից յայտարարեցի, որ Ղարաբաղի հարցի լուծման որեւէ տարբերակ պէտք է ընդունելի լինի Հայաստանի ժողովրդի, Ղարաբաղի եւ Ադրբեջանի ժողովրդի համար: Սա աննախադէպ յայտարարութիւն էր մեր իրականութեան մէջ, որովհետեւ Հայաստանի Հանրապետութեան ոչ մի ղեկավար չի ասել, որ որեւէ լուծում պէտք է նաեւ Ադրբեջանի ժողովրդի համար ընդունելի լինի:

Սա շատ կարեւոր յայտարարութիւն է եւ լուրջ հիմք է ստեղծում բանակցային առաջընթացի համար: Հետեւաբար, ինչո՞ւ չկայ այդ առաջընթացը, շատ պարզ պատճառով, որովհետեւ Ադրբեջանի նախագահը նոյն նախադասութիւնը հրաժարւում է արտաբերել: Նա էլ պէտք է ասի, որ Ղարաբաղի հարցի ցանկացած տարբերակ պէտք է ընդունելի լինի Ադրբեջանի, Ղարաբաղի եւ Հայաստանի ժողովրդի համար», ընդգծեց Փաշինեան:

«Հետեւաբար, որեւէ մէկը, որ մտածում է, որ Ղարաբաղի հարցի լուծումը կարող է ընդունելի լինել Ադրբեջանի ժողովրդի համար եւ ընդունելի չլինել Ղարաբաղի ու Հայաստանի ժողովրդի համար, նա ոչ Ղարաբաղի ժողովրդին է ճանաչում, ոչ էլ Հայաստանի ժողովրդին», ըսաւ Փաշինեան:

Փաշինեանի պատասխանները՝ այլ հարցերու շուրջ.

Փաշինեան քաղաքական բանտարկեալ չի նկատեր Ռոպերթ Քոչարեանը:

«Բոլոր նրանք, ովքեր ասում են, որ Ռոբերտ Քոչարեանը քաղբանտարկեալ է, նրանք ասում են, որ ես այսօր իրաւունք ունեմ ՀՀ զինուած ուժերը, տանկերը մտցնել Երեւան քաղաք եւ ցանկացած ընդդիմադիր դրսեւորում տանկերի թրթուրների տակ ճզմել: Եթէ ես իրաւունք չունեմ այդպիսի բան անելու, ուրեմն Ռոբերտ Քոչարեանը չի կարող քաղբանտարկեալ լինել», ըսաւ Փաշինեան:

Սահմանադրական դատարանի խնդրի հանգուցալուծման մասին՝ Փաշինեան Սահմանադրական դատարանին շուրջ ստեղծուած իրավիճակը լուծելու հարցին մէջ չի բացառեր սահմանադրական փոփոխութիւններու իրականացումը, սակայն, ճիշդ չի նկատեր երկրին մէջ սահմանադրութիւններու յաճախակի փոփոխութիւնը:

«Ճիշդ չեմ համարում, որ երկրում սահմանադրութիւնները յաճախակի փոխուեն: Եւ նաեւ կարծում եմ, որ խորհրդարանական կառավարման համակարգը պէտք է Հայաստանում շանս ստանայ, որ մենք հասկանանք՝ ինչ համակարգ է սա: Բայց, ընդհանուր առմամբ, Յուլիսի 5ին ես արձանագրեցի, որ կայ մի շատ կարեւոր եւ արդարացի փաստարկ, որ մենք երբեք ժողովրդի լեգիտիմ (օրինական-Խմբ.) քուէն ստացած սահմանադրութիւն չենք ունեցել, եւ այսօր էլ չունենք: Ես չեմ կարծում, թէ ճիշդ կը լինի, որ կառավարութիւնը կամ խորհրդարանական մեծամասնութիւնը սահմանադրական փոփոխութիւններ նախաձեռնի, որովհետեւ կարող է դա էլի մեկնաբանուել, որ նոր իշխանութիւններն են այժմ ուզում իրենց համար ձեւել այս սահմանադրութիւնը, բայց կարծում եմ, որ հանրութեան մէջ նորմալ է, որ նման նախաձեռնութիւններ լինեն: Կարեւոր է, որ Հայաստանում լինի սահմանադրութիւն, որի օգտին ժողովուրդն իրօք քուէարկի: Իսկ Սահմանադրական դատարանի շուրջ ստեղծուած իրավիճակը հանգուցալուծելու համատեքստում հնարաւոր է նաեւ սահմանադրական փոփոխութիւնների իրականացումը», ըսաւ Փաշինեան:

Վենետիկի յանձնաժողովի արձանագրութեան մասին.

Վենետիկի յանձնաժողովի պաշտօնական դիրքորոշումը եղած է այն, որ Հայաստանի կառավարութեան հետ համագործակցութիւնը կը համարուի արդիւնաւէտ:

«Կարող եմ ասել, որ քաղաքական մակարդակի շփումներում ե՛ւ Եւրախորհուրդը, ե՛ւ Եւրամիութիւնը լիարժէք աջակցութիւն է յայտնել Հայաստանի կառավարութեանը դատաիրաւական բարեփոխումների հարցում», ըսաւ վարչապետը:

նԿառավարման դժուարութիւններու մասին.

«Մենք ունենք վատ կառավարման պրոբլեմ (խնդիր-Խմբ.), դա առաջին հերթին մեր օրակարգի խնդիրն է», յայտնեց Փաշինեան՝ անդրադառնալով Միջազգային հանրապետական հիմնարկութեան (International Republican Institute – IRI) իրականացուցած հասարակական կարծիքի վերջին հարցումներու արդիւնքներուն:

Դիտարկման, որ ըստ հարցման արդիւնքներուն՝ «Իմ Քայլը» կը ստանար շուրջ 60 տոկոս, որ 10 տոկոսով աւելի ցած է, քան անցեալ տարուան Հոկտեմբերին կատարուած նման հարցախոյզի արդիւնքները՝ Փաշինեանն ըսաւ. «Կարող եմ ասել հետեւեալը, որ խորհրդարանական ընտրութիւններից առաջ նաեւ կառավարութիւնը աշխատանքային հարցումներ է իրականացրել, եւ խորհրդարանական ընտրութիւններից առաջ ինձ բերած վերջին հարցումը կանխատեսում էր «Իմ Քայլը» դաշինքին՝ 60 տոկոս: Բայց ընտրութիւնների արդիւնքում մենք ստացանք 70 տոկոս ձայն, ի՞նչ բացատրութիւն սա ունի. հարցմանը մասնակցում է պատասխանողների 100 տոկոսը, իսկ ընտրութիւններին մասնակցում է ընտրողների ոչ 100 տոկոսը: Եւ ինձ համար մեր հարցումներով, որոնցից այս ընթացքում ես միշտ օգտւում եմ, դա որոշակի մեխանիզմներով է արւում, մենք այդ հարցումներում այդպիսի տատանումներ չենք արձանագրում»:

Անդրադառնալով դիտարկման՝ թէ կայ կարծիք, որ կառավարութեան որակը բարձր չէ, եւ հարցախոյզները ցոյց կու տան, որ վարչապետին գրասենեակը բարձր ցուցանիշ ունի, բայց նախարարական դահլիճին հանդէպ չկայ վստահութիւն, զայն կը նկատեն անփորձ, հետեւաբար ամէն ինչ Փաշինեանի ուսերուն է՝ վարչապետը արձագանգեց. «Կա՞յ արդեօք Հայաստանի Հանրապետութիւնում վատ կառավարում, իհարկէ կայ: Ի՞նչ կապ ունի դրա հետ, այսպէս ասած, նոր երիտասարդ թիմը: Եկէք պատկերացնենք կառավարման համակարգը: Դա 1 տոկոս, 2 տոկոս նոր եկած երիտասարդ թիմ է, եւ 98 տոկոսն էլ կառավարման այն համակարգն է, որը մենք ունեցել ենք նաեւ իշխանափոխութիւնից առաջ: Այստեղ պրոբլեմը ոչ այնքան մարդկային է, որովհետեւ այս կառավարման համակարգը, ի վերջոյ, այն գոյութիւն է ունեցել շատ երկար տարիներ»:

Ըստ Փաշինեանի՝ այսօր կառավարութիւնը կը պայքարի կաշառակերութեան (կամ զեղծարարութեան) դէմ, եւ քիչերը կը նկատեն, որ կաշառակերութիւնը կառավարման որոշակի համակարգ է. «Մենք պայքարում ենք կոռուպցիայի (կաշառակերութեան-Խմբ.) դէմ, ասում ենք՝ կոռուպցիան վատ երեւոյթ է, բայց մեզնից քչերն են նկատում, որ կոռուպցիան նաեւ կառավարման որոշակի համակարգ է, որովհետեւ ես որպէս պետական պաշտօնեայ, պէտք է ընտրութիւն կատարեմ, թէ ի՛նչ ընթացք տամ այս մի բաժակ խնդրին կամ պոտենցիալ (հաւանական-Խմբ.) յաւակնորդներից ո՞ւմ վերապահեմ այս մի բաժակ ջուրը կառավարելու իրաւունքը: Երբ կայ կոռուպցիոն համակարգ, խնդիրը շատ է, ով շատ տուեց, իրեն էլ տալիս ենք այս ջուրը: Իսկ երբ չկան կոռումպացուած համակարգեր, եւ կառավարութիւնը ստիպուած է գործել օրէնքներով, պարզւում է՝ շատ օրէնքներ գոյութիւն ունեն, բայց իրենք գոյութիւն են ունեցել միայն Վենետիկի յանձնաժողովի եւ այլ կառոյցների համար: Եւ հիմա եթէ դու փորձում ես աշխատել օրէնքով, պարզւում է, որ այդ օրէնքը աշխատելու համար չէ, այլ ցոյց տալու համար է: Աշխատելու հիմնական մեթոդը եղել է կոռուպցիան»:

LEAVE A REPLY

Please enter your comment!
Please enter your name here