Կաթողիկոսը Հիւրընկալեց 15 Երկիրներէ Ժամանած 40 Սփիւռքահայ Ուսուցիչներ

0
169

Գարեգին Բ․ Ամենայն Հայոց Կաթողիկոսը Մայր Աթոռ Սուրբ Էջմիածինի մէջ հիւրընկալեց   15 երկիրներէ Հայաստան ժամանած 40 սփիւռքահայ ուսուցիչներ` Խ. Աբովեանի անուան հայկական պետական մանկավարժական համալսարանի տնօրէն Ռուբէն Միրզախանեանի ուղեկցութեամբ:

Սփիւռքահայ ուսուցիչները համալսարանի նախաձեռնութեամբ Հայաստանի մէջ կը մասնակցին վերապատրաստման մէկամսեայ դասընթացքներուն:

Ռուբէն Միրզախանեան շնորհակալութիւն յայտնեց  Նորին Սրբութեան` ընդունելութեան համար եւ ընդգծեց  Հայ Եկեղեցւոյ եւ մասնաւորաբար Վեհափառ Հայրապետին կողմէ հայապահպանութեան ուղղուած լայնածաւալ աշխատանքները:

Ապա ուսուցիչներուն իր հայրական օրհնութիւնը տուաւ Ամենայն Հայոց Կաթողիկոսը` կարեւոր համարելով արդէն աւանդոյթ դարձած այս գեղեցիկ նախաձեռնութիւնը:

Վեհափառը  յոյս յայտնեց, որ այցը Հայաստան եւ մասնակցութիւնը դասընթացներուն դրական լիցք  կը հաղորդեն ուսուցիչներուն` նոր ուժով եւ աւիւնով շարունակելու իրենց բարդ ու դժուարին առաքելութիւնը:

Բարձր գնահատելով հայապահպանութեան գործին մէջ սփիւռքահայ ուսուցիչներու դրսեւորած նախանձախնդրութիւնը` Գարեգին Երկրորդ Հայրապետը շեշտեց, թէ  մանկավարժները կարեւոր պատասխանատւութիւն կը կրեն այսօրուան եւ գալիք սերունդներու դաստիարակութեան եւ կրթութեան համար:

Հանդիպման  ընթացքին  Նորին Սրբութիւնը նաեւ հետաքրքրուեցաւ  Սփիւռքի մէջ գործող հայկական կրթօջախներու իրավիճակով եւ ուսուցիչները յուզող խնդիրներով:

LEAVE A REPLY

Please enter your comment!
Please enter your name here