«ԹԵՐԹ»Ի ՀԱՐՑԱԶՐՈՅՑԸ ՔԱՂԱՔԱԳԻՏՈՒԹԵԱՆ ԴՈԿՏՈՐ ՎԻԳԷՆ ՅՈՎՍԷՓԵԱՆԻ ՀԵՏ

0
517

«Խիստ Անհաւանական Է, Որ Իրանի Մասին Արարատ Միրզոյեանի Կամ Հայկական Կողմի Այլ Դիմումները Որեւէ Փոփոխութիւն Մտցնեն ԱՄՆի Դիրքորոշման Մէջ»

 Վարեց՝ ՀՌԻՓՍԻՄԷ ՅՈՎՀԱՆՆԻՍԵԱՆ

Tert.am-ը քաղաքագիտութեան դոկտոր, ամերիկահայ Վիգէն Յովսէփեանի հետ զրուցել է ԱԺ նախագահ Արարատ Միրզոյեանի գլխաւորած պատուիրակութեան ԱՄՆ այցի բովանդակութեան եւ հնարաւոր արդիւնքների մասին: Նրա խօսքով՝ այն հանգամանքը, որ հայկական պատուիրակութիւնը հանդիպել է թէ՛ ԱՄՆ Ներկայացուցիչների պալատի խօսնակ Նենսի Փելոսիի, եւ թէ՛ Սենատի մեծամասնութեան հանրապետական ղեկավար Մաքքոնելի հետ, արդէն ցոյց է տալիս այն յարգանքը եւ համակրանքը, որ Կոնգրեսի ղեկավարութիւնն ունի Հայաստանի եւ հայութեան նկատմամբ։

 

ՀՌԻՓՍԻՄԷ ՅՈՎՀԱՆՆԻՍԵԱՆ.- Պարո՛ն Յովսէփեան, աւարտուել է ԱԺ նախագահ Արարատ Միրզոյեանի գլխաւորած պատուիրակութեան այցը ԱՄՆ: Եղել են հանդիպումներ ԱՄՆ միայն դեմոկրատ կոնգրեսականների, Սենատի մեծամասնութեան հանրապետական ղեկավար Միչ Մաքքոնելի, ԱՄՆ Ներկայացուցիչների պալատի խօսնակ Նենսի Փելոսիի հետ, Արարատ Միրզոյեանը չի հանդիպել ԱՄՆ վարչակազմի բարձրաստիճան պաշտօնեաներից եւ ոչ մէկի հետ: Ձեր տպաւորութեամբ՝ երկար պատրաստուած, թիրախային հանդիպումներով եւ օրակարգով կազմակերպուած ա՞յց էր, թէ, այնուամենայնիւ, քիչ հնարաւորութիւններ ստեղծող էր այն:

ՎԻԳԷՆ ՅՈՎՍԷՓԵԱՆ.- Պարզ է, որ այցի գլխաւոր առիթը House Democracy Partnership կոչուած միջխորհրդարանական համագումարն էր, որ տարբեր երկրների խորհրդարանների միջեւ բաւականին հեղինակաւոր ֆորում է: Այս իմաստով էլ այն ծառայում է ոչ միայն ԱՄՆ Կոնգրեսի շատ անդամների, այլ նաեւ՝ տարբեր երկրների խորհրդարանականների հետ շփումներ ունենալուն: Պէտք է շեշտել, որ այս նախաձեռնութիւնը եւ ֆորումն ինքնին մէկ կամ միւս կուսակցութեան հովանաւորութեամբ չէ կազմակերպուած, այլ երկուսի: Համանախագահներից մէկն էլ հանրապետական է, միւսը՝ դեմոկրատ: Հետեւաբար, Հայաստանի ԱԺ պատուիրակութեան մասնակցութիւնը (եթէ չեմ սխալւում առաջին անգամ) ողջունելի իրադարձութիւն է: Իսկ այն հանգամանքը, որ թէ՛ Փելոսիի, եւ թէ՛ Մաքքոնելի հետ է հանդիպել պարոն Միրզոյեանը, արդէն ցոյց է տալիս այն յարգանքը եւ համակրանքը, որ Կոնգրեսի ղեկավարութիւնն ունի Հայաստանի եւ հայութեան նկատմամբ:

Իսկ ինչ վերաբերում է այլ պաշտօնեաների հետ հանդիպմանը, եթէ խօսքը վարչակազմի ներկայացուցիչների մասին է, ապա դա արդէն ընթացիկ եւ ընդունուած երեւոյթ չէ նման միջոցառումների ժամանակ:

 

ՀՌԻՓՍԻՄԷ ՅՈՎՀԱՆՆԻՍԵԱՆ.- Հանդիպումներում ԱԺ նախագահը հիմնականում անդրադարձել է ՀՀում տեղի ունեցած փոփոխութիւններին եւ ժողովրդավարութեան հաստատման համար ԱՄՆի աջակցութեան կարեւորութեանը: Ձեր կարծիքով՝ ճի՞շդ էին ընտրուած «մեսիջները» (պատգամները-Խմբ.), նկատելի՞ էր՝ ՀՀ պատուիրակութիւնն ի՞նչ էր ցանկանում ամերիկեան կողմից:

ՎԻԳԷՆ ՅՈՎՍԷՓԵԱՆ.- Մենք տեղեակ ենք միայն այն խօսակցութիւններին եւ նիւթերին, որոնց մասին հրապարակել են մինչեւ այսօր, եւ բնական է, եւ գործնական, որ առաւելապէս խօսած լինեն այն թեմաներից, որոնք Կոնգրեսի հակակշռի տակ են, այսինքն՝ արտաքին օժանդակութիւն, արտաքին քաղաքականութեան հետ առնչուող ընդհանուր ուղղութիւններ եւ այլն:

Ենթադրում եմ, որ մի քանի այլ հարցերի եւս անդրադարձել են, որոնք տեղեկատուութեան մէջ հրապարակուած չեն ինչ-ինչ պատճառներով: Նկատի ունենալով, որ նման հանդիպումները բանակցութիւններ չեն, այլ ընդհանուր ուղղութիւնների շուրջ եւ դիրքորոշումների բովանդակութիւն, կարելի է ասել, որ հայկական կողմի փոխանցուածները տեղին ծրագրուած պատգամներ են:

 

ՀՌԻՓՍԻՄԷ ՅՈՎՀԱՆՆԻՍԵԱՆ.- Atlantic Council կենտրոնում Արարատ Միրզոյեանը ելոյթի ընթացքում յայտարարել է, թէ Հայաստանը չի կարող հրաժարուել պատժամիջոցների տակ յայտնուած Իրանից գազ գնելուց: Նախ որքանո՞վ էր ճիշդ ընտրուած գիտական կենտրոնը նման յայտարարութիւն անելու համար, եւ արդեօք յայտարարութիւնն ընկալելի է ԱՄՆում:

ՎԻԳԷՆ ՅՈՎՍԷՓԵԱՆ.- Atlantic Council-ը բաւականին հեղինակաւոր հաստատութիւններից, think-tank-երից (վերլուծական կենտրոն) մէկն է, որը կուսակցական ազդեցութիւններից զուրկ է: Վստահաբար գիտէք, որ այսպիսի կազմակերպութիւնները եւ իրենց տարածած կարծիքները ԱՄՆում մեծ ազդեցութիւն ունեն որոշում կայացնողների մօտ՝ լինեն նրանք վարչակազմի պաշտօնեաներ, դիւանագէտներ, կոնգրեսականներ, թէ լրագրողներ:

Իսկապէս, հեռահար շնչով կարծիք մշակելու համար եւ նաեւ յատկապէս արտաքին քաղաքականութեան վրայ ազդելու անուղղակի ձեւեր որդեգրելու նպատակով, think tank-երում հետեւողական աշխատանք տանելը շատ կարեւոր է: Քանի անգամ առիթ ունեցել եմ նշելու, որ այս հարցում մեր բացակայութիւնը ամենամեծ բացթողումն է եղել տարիների ընթացքում: Եւ ուրեմն այս դէպքում ողջունում եմ Atlantic Council-ում Արարատ Միրզոյեանի ելոյթ ունենալը:

Իսկ ինչ վերաբերում է իրանական գազին կամ ընդհանրապէս Իրանի հետ յարաբերութիւնների մասին եղած բացատրութիւններին, ապա դրանցից եւ ոչ մէկը անծանօթ բան չէ ԱՄՆում բանիմաց մարդկանց համար: Բնականաբար, նոյնիսկ եթէ Թրամփի վարչակազմի համար տրամաբանօրէն ընկալելի լինեն հայկական կողմի արդարացումները, միեւնոյն է, պիտի շարունակի այդ գծով ճնշումները: Իրանին որոշ տեղ բերելու հրամայականը այսօրուայ ԱՄՆ արտաքին քաղաքականութեան կարեւորագոյն խնդիրներից մէկն է: Ուստի, եթէ նոյնիսկ Հայաստանի Հանրապետութեան պարագայում աչք փակելու միտում ունենայ, անհաւանական է, որ դա պաշտօնական դրսեւորում ունենայ,  քանզի դա սպառնալու է ներկայում գոյութիւն ունեցող դիրքորոշմանը:

Դեռ չենք խօսում հրէական լոբբիի դերակատարութեան մասին, եւ նրա մասին, թէ ինչ մեծ ճիգեր է վերջինս գործադրել, որ Իրանի հանդէպ ԱՄՆի դիրքորոշումը հասցնի այսօրուայ ծայրայեղութեանը, եւ ուրեմն անխնայ կերպով պէտք է հետամուտ լինի դրա ամբողջական կիրարկմանը: Հետեւաբար, խիստ անհաւանական է, որ պարոն Միրզոյեանի կամ հայկական կողմի այլ դիմումները որեւէ փոփոխութիւն մտցնեն:

 

ՀՌԻՓՍԻՄԷ ՅՈՎՀԱՆՆԻՍԵԱՆ.- Ենթադրւում է, որ նմանատիպ այցերը պէտք է ունենան յետագայ զարգացումներ: Ին՞չ էր ակնկալւում այս այցից եւ ի՞նչ արդիւնքներով է հայկական պատուիրակութիւնը վերադառնում:

ՎԻԳԷՆ ՅՈՎՍԷՓԵԱՆ.- Այն, որ այցը ինքնին կ՛ունենայ յետագայ զարգացումներ, ես կասկած չունեմ: Ընդ որում, դրական հետեւանքներ, նոյնիսկ եթէ դրանք առայժմ շօշափելի չլինեն կամ դրանց մասով չափորոշիչները պարզ չլինեն: Իսկ թէ ինչ արդիւնքներով է պատուիրակութիւնը վերադարձել, պէտք է հարցնել պատուիրակութեան անդամներին:

LEAVE A REPLY

Please enter your comment!
Please enter your name here