Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԻՐ ԶՕՐԱԿՑՈՒԹԻՒՆԸ ԿԸ ՅԱՅՏՆԷ ՊԷՅՐՈՒԹԻ ԱՄԵՐԻԿԵԱՆ ՀԱՄԱԼՍԱՐԱՆԻՆ ՄԷՋ ՀԱՍՏԱՏՈՒԵԼԻՔ ՀԱՅԱԳԻՏԱԿԱՆ ՈՒՍՄԱՆՑ ԾՐԱԳԻՐԻՆ

0
456

Ուրբաթ, 12 Յուլիս 2019-ի առաւօտեան, Վեհափառ Հայրապետը ընդունեց այցելութիւնը Պէյրութի Ամերիկեան համալսարանին (AUB) արուեստի ու գիտութեանց բաժանմունքի տնօրէնուհի Դոկտ. Նատիա Էլ Շէյխի, ընկերակցութեամբ նոյն բաժանմունքին քաղաքական գիտութեանց ճիւղի դասախօս Դոկտ. Ժան Կէօքճեանի:

Այցելութեան նպատակն էր Նորին Սրբութեան հետ խորհրդակցիլ համալսարանէն ներս հայագիտական ուսմանց ծրագիր մը հաստատելու գծով: Մօտէն իմանալէ ետք ծրագիրին մանրամասնութիւնները, Վեհափառ Հայրապետը, որ նաեւուսանող եղած է յիշեալ համալսարանին մէջ, իր գնահատանքն ու զօրակցութիւնը յայտնեց նման ծրագիրի մը իրագործման:

Հայագիտական ուսմանց անունը կրող ծրագիրը պիտի ներառէ հայագիտական նիւթի մը առնչուած դասընթացք, դասախօսութիւն, սեմինար, օտար դասախօսներու կողմէ ներկայացումներ, ուսումնասիրութիւններ եւ հրատարակութիւններ՝ ըստ յարմարութեան:

Ծրագիրը կարելի է սկսիլ մէկ միլիոն ամերիկեան տոլարի դրամագլուխով, որուն տարեկան տոկոսը պիտի տրամադրուի յիշեալ ծրագիրներուն: Ծրագիրին պատրաստութեան ու գործադրութեան հսկող յանձնախումբ մը պիտի նշանակուի, որուն մաս պիտի կազմեն նաեւ մեկենասները:

Վեհափառ Հայրապետը մեծապէս ողջունելի ու գնահատելի կը գտնէ նման նախաձեռնութիւն մը, նկատի ունենալով Լիբանանի հայ համայնքի ներկայացուցած կարեւորութիւնը երկրէն ներս, ինչպէս նաեւ ամերիկեան համալսարանին ունեցած վարկը Միջին Արեւելքէն ներս:

 

LEAVE A REPLY

Please enter your comment!
Please enter your name here