«Դատարանները Քաղաքականացնելը Կը Յանգեցնի Սահմանադրական Ճգնաժամի». Արթուր Խաչատրեան

0
221

ԵՐԵՒԱՆ, «Երկիր».- ՀՅԴ Երիտասարդական միութիւնը 1 Օգոստոսին մոմավառութիւն կազմակերպած է Եռաբլուրի մէջ: Միութիւնը միաժամանակ պատրաստակամութիւն յայտնած է աջակցելու պաշտպանութեան նախարարութեան՝ անհրաժեշտութեան պարագային շուրջօրեայ հսկողութիւն կատարելու Եռաբլուրի տարածքին մէջ:

«Առաջին լրատուական»ին հետ ունեցած զրոյցին ընթացքին ՀՅԴ Գերագոյն մարմինի անդամ Արթուր Խաչատրեան շեշտած է, որ պէտք է կանխուին նման երեւոյթներ։ «Իր զազրելիութեամբ եւ սրբապղծութեամբ արտառոց երեւոյթ է. ինչպէ՞ս կարող էր մարդ արարածն այդքան ընկնել, որ կարողանար մեր հերոսների շիրիմները վանդալիզմի ենթարկել. դա ստորութեան գագաթնակէտն է», շեշտած է ան։

Անդրադառնալով դիտարկման, որ Դաշնակցութիւնը քննադատեց գործող իշխանութիւնը՝ սահմանադրական ճգնաժամին մէջ յայտնուելուն համար, Ա. Խաչատրեան բացատրած է, որ խօսքը սահմանադրական ճգնաժամի մասին չէ, այլ այն մասին, որ փորձ կը կատարուի դատարանները քաղաքականացնելու, ինչ որ պատճառ պիտի դառնայ սահմանադրական ճգնաժամի։ «Մենք՝ եօթը կուսակցութիւններով համախոհութեամբ ընդունեցինք այդ յայտարարութիւնը, որովհետեւ դատական համակարգին առնչուող այն զարգացումները, որոնք տեղի են ունենում երկրում, չեն կարող մեզ չմտահոգել։ Դատական համակարգի անկախութիւնը շատ կարեւոր է երկրի զարգացումն ապահովելու համար», շեշտած է ան:

ՀՅԴ Գերագոյն մարմինի անդամը՝ անդրադառնալով ՀՅԴ-ին կողմէ կազմակերպուած «Դեղին քարտ Երեւանի քաղաքապետին» նախաձեռնութեան, նշած է, որ դժգոհ են քաղաքային իշխանութիւններուն աշխատանքէն, Երեւանի մէջ ոչ մէկ ակնառու փոփոխութիւն նկատելի է, տրուած խոստումները չեն յարգուած, աղբահանութիւնը խայտառակ վիճակի մէջ է, չեն լուծուած նաեւ վերելակներու, կանաչապատման խնդիրները, չէ բարելաւուած երթեւեկութիւնը:

Ան ընդգծած է, որ վերլուծած են տնտեսական քաղաքականութիւնը եւ յանգած այն եզրակացութեան, որ կան մտահոգիչ բազմաթիւ հարցեր։

LEAVE A REPLY

Please enter your comment!
Please enter your name here