Մարալ Այվազի Անդրանիկ Ձայնասկաւառակը` «Մարալի Պէս»

0
338

Մարալ Այվազ, որ իր մանուկ տարիքէն սկսեալ հայ եկեղեցւոյ դպրաց դասու աշխատութեանց մասնակցելով` քայլ նետած է իր երաժշտութեան կեանքէն ներս, բազմաթիւ համերգներու եւ համայնքային զանազան ձեռնարկներու միջոցին մեներգներով բեմ բարձրացած է, այժմ կը ներկայանայ ունկնդրին իր անդրանիկ ձայնասկաւառակի ծրագրով:

Ալպոմը, որուն մէջ կան ժողովրդական եւ արդիական հայերէն երգերու իրարմէ անկախ բնօրինակ մշակումները, հանդիսականին ուշադրութիւնը կը գրաւէ արդիական եւ հայ դասական գործիքներուն ներդաշնակ համադրումով ու գեղաձայն երգչուհիին ինքնայատուկ մեկնաբանութեամբ:

Ալպոմին երաժշտական ղեկավարը յաջող երաժիշտ, ձայնագրող Արի Հերկելն է, որ նաեւ ալպոմին մէջի եօթը երգերուն մշակումը կատարած է: Իսկ «Վայրի ծաղիկ» անուն երգին յօրինողն է ֆրանքֆորթաբնակ կիթառահար, երգիչ, երաժիշտ Արէն Էմիրզէն: Երգը ձայնագրուած է Գերմանիոյ մէջ:

Ալպոմին ամէնէն ուշագրաւ երգն է` «Անվերջ խաւար»: Երգչուհին, աշխարհահռչակ երաժիշտ, ուտահար Արա Տինքճեանի «Picture/Agladikջa» անուն յօրինումին հայերէն խօսքերը գրած ու երգը ձայնագրած է:

Մարալ Այվազին փափաքն է, որ իր այս աշխատանքը, որուն ամէն փուլին նախանձախնդրութեամբ հոգ տարած է, տարածուի նռան հատիկներու պէս, հասնի ամէնուն, բոլոր ազգերուն:

LEAVE A REPLY

Please enter your comment!
Please enter your name here