Սահմանամերձ Շրջաններու Շուրջ 700 Մանուկներ Երեւան Կ՛այցելեն

0
211

ԵՐԵՒԱՆ, «ՓանԱրմինիըն».- Հայաստանի վարչապետ Նիկոլ Փաշինեանի տիկնոջ՝ «Իմ քայլը» եւ «Ժպիտների քաղաք» հիմնարկներու հոգաբարձուներու խորհուրդի նախագահ Աննա Յակոբեանի նախաձեռնութեամբ սահմանամերձ համայնքներու 9-էն 13 տարեկան շուրջ 700 երեխաներ իրենց ամառնային արձակուրդի օրերուն, Երեւանի մէջ կը մասնակցին զանազան նախաձեռնութիւններու։

Յակոբեանի պաշտօնական կայքին համաձայն՝ 31 Յուլիսին, Արարատի մարզի սահմանամերձ Արմաշ գիւղի 60 երեխաներ այս ծիրին մէջ այցելեցին Հայաստանի Ազգային պատկերասրահը եւ մասնակցեցան պատկերասրահի կրթական խտացեալ ծրագիրին, այնուհետեւ այցելեցին «Յաղթանակի Զբօսայգի»ն, Երեւանի կենդանաբանական պարտէզը եւ շրջեցան քաղաքի նորաբաց այգիներուն մէջ:

Ծրագիրը սկսած էր 26 Յուլիսին: Արդէն իսկ Երեւան այցելեցին Տաւուշի մարզի Բաղանիս, Այգեպար, Ոսկեպար, Ներքին Կարմիրաղբիւր, Վերին Կարմիրաղբիւր, Արարատի մարզի Երասխ եւ Արմաշ գիւղերու երեխաները: Ծրագիրը պիտի շարունակուի մինչեւ 16 Օգոստոս։

Այս մէկը իրականութիւն կը դառնայ Հայաստանի վարչապետի աշխատակազմի պահեստային ֆոնտին աջակցութեամբ: Ծրագիրը կազմակերպելու համար տրամադրուած է 3,6 միլիոն դրամ:

Խումբերը բաղկացած կ՛ըլլան 50-60 հոգիէ. անոնք ամբողջ օր մը կ՛անցընեն Երեւանի մէջ։

LEAVE A REPLY

Please enter your comment!
Please enter your name here