Սահմանին Ծառայող Զինուորներուն Ամսականը Պիտի Աւելնայ 2000 Դրամով, Միւսներունը՝ 1000ով

0
186

ԵՐԵՒԱՆ, «ՓանԱրմինիըն».- Պարտադիր ժամկէտային զինուորներու դրամական ապահովութեան ամսականը պիտի աւելնայ. հակառակորդին հետ անմիջական շփման պայմաններուն մէջ մարտական հերթապահութիւն իրականացնող զօրամասերու անձնակազմինը պիտի աւելցնէ 2000 դրամով, իսկ մնացած զօրամասերուն պարագային՝ 1000 դրամով:

Որոշումը տրուեցաւ Հայաստանի կառավարութեան 8 Օգոստոսի նիստին։

Հայաստանի զինուած ուժերու հրամանատարութեան կողմէ կատարուած ուսումնասիրութիւններով պարզուեցաւ, որ պարտադիր ժամկէտային զինուորներուն համար սահմանուած դրամական վարձատրութիւնը 2009-էն փոփոխութիւն չէ կրած եւ յաջորդող տարիներուն արձանագրուած շարունակական գնաճին իբրեւ հետեւանք, այդ գումարը չի բաւեր նոյնիսկ անձնական մաքրութեան եւ այլ առաջին անհրաժեշտութեան պարագաներ գնելու համար (օրինակ՝ անձնական մաքրութեան պարագաներու գնաճը կազմած է մօտ 33 տոկոս), ինչ որ ֆինանսական յաւելեալ ծանրաբեռնուածութիւն կը պատճառէ զինուորներուն ընտանիքներուն համար:

Հայաստանի կառավարութեան յառաջիկայ 5-ամեայ ծրագիրով սահմանուած է զինուորներուն համար ծառայութեան բարենպաստ պայմաններու ապահովում եւ դրամական ապահովութեան չափերու շարունակական յաւելում:

LEAVE A REPLY

Please enter your comment!
Please enter your name here