Արտասահմանցի Բնակիչներու Կողմէ Հայաստանեան Դրամատուներուն Մէջ Ներդրուած Աւանդը 51 Տոկոսով Աւելցած Է

0
189

ԵՐԵՒԱՆ, «Արմէնփրէս».- Հայաստանի մէջ վարկերու եւ աւանդներու ծաւալները 2019-ի Յունիսի վերջին, նախորդ տարուան նոյն ժամանակաշրջանին հետ բաղդատելով, էականօրէն աւելցած են:

Հայաստանի Կեդրոնական դրամատունը հրապարակեց 2019 թուականի Յունիսի դրութեամբ հայաստանեան առեւտրային դրամատուներուն կողմէ տրամադրուած վարկերու եւ դրամատուներուն մէջ ներդրուած աւանդներուն ցուցանիշները։

Ըստ պաշտօնական տուեալներուն՝ ընթացիկ տարուան Յունիսին, նախորդ տարուան նոյն ժամանակաշրջանին հետ բաղդատելով, վարկերու եւ աւանդներու քանակը աւելցած է: Առեւտրական դրամատուներուն կողմէ քաղաքացիներուն տրամադրուած վարկերուն ծաւալը կազմած է 2 թրիլիոն 934 միլիառ դրամ, որ նախորդ տարուան նոյն ժամանակաշրջանին հետ բաղդատելով, աւելցած է 13  տոկոսով, իսկ աւանդներու ծաւալը աւելցած է 18 տոկոսով՝ կազմելով 3 թրիլիոն 90 միլիառ դրամ։

Ընթացիկ տարուան Յունիսին Հայաստան բնակող արտասահմանցիներու կողմէ դրամատուներուն մէջ ներդրուած աւանդներուն քանակը աւելցած է 51 տոկոսով՝ կազմելով  813 միլիառ դրամ, իսկ բնակիչներուն կողմէ ներդրուած աւանդներուն գումարը աւելցած է 9 տոկոսով կամ 1 թրիլիոն 9 միլիառ դրամով՝ կազմելով 2 թրիլիոն 277 միլիառ դրամ։

LEAVE A REPLY

Please enter your comment!
Please enter your name here