«Զանգեզուրի Պղնձամոլիբդենային Կոմբինատ»ը Կը Գլխաւորէ 1000 Խոշոր Հարկատուներու Ցանկը

0
145

ԵՐԵՒԱՆ, «Արմէնփրէս».- Հայաստանի կառավարութեան առընթեր Պետական եկամուտներու կոմիտէն հրապարակեց 2019-ի առաջին կիսամեակի 1000 խոշոր հարկատուներու ցանկը, ըստ որուն, հաւաքուած է 511 միլիառ դրամի հարկ՝ 64 միլիառով (14,4 տոկոս) աւելի, քան նախորդ տարուան նոյն ժամանակաշրջանին։

Հաւաքուած հարկերուն շուրջ 80,9 տոկոսը կամ 413,9 միլիառ դրամը հաւաքուած է հարկային մարմիններուն կողմէ, իսկ մնացած 19,1 տոկոսը՝ մաքսային մարմինին կողմէ։ Հայաստանի 10 մեծագոյն հարկատուները միասին 2019-ի առաջին կիսամեակին վճարած են 131,4 միլիառ դրամի հարկ, որ կազմած է 1000 խոշոր հարկատուներուն վճարածին շուրջ 26 տոկոսը:

Ընթացիկ ֆինանսական տարուան առաջին կիսամեակի արդիւնքներով՝ Հայաստանի խոշոր հարկատուներու ցանկը կը գլխաւորէ «Զանգեզուրի պղնձամոլիբդենային կոմբինատը»: Տուեալ ժամանակաշրջանին ընկերութիւնը պետական պիւտճէին վճարած է 29,5 միլիառ դրամի հարկեր: Երկրորդ խոշոր հարկատուն «Գրանդ Տոբակօ» ընկերութիւնն է՝ վճարած 28,2 միլիառ դրամ հարկերով։ Վերջինիս կը յաջորդէ «Գազպրոմ Արմէնիա» ընկերութիւնը, որուն վճարած հարկերը կազմած են 22,7 միլիառ դրամ։ Ընդհանուր առմամբ՝ 1000 խոշոր հարկատուներու առաջին երեք կազմակերպութիւնները միասին վճարած են ընդհանուր հարկերուն շուրջ 16 տոկոսը։

Չորրորդ խոշոր հարկատուն «Ինտերնէյշնըլ Մասիս տաբակ»ն է՝ վճարած 9,4 միլիառ դրամ հարկերով։ Յաջորդ խոշոր հարկատուներն են «Գոեպրոմայնինգ գոլդը»՝ 9., միլիառ դրամ, «Հայաստանի էլեկտրական ցանցերը»՝ 7.7 միլիառ դրամ, «Ֆլեշ» ընկերութիւնը՝ 7,6 միլիառ դրամ, «Ակվիլոն Թրէյդ»ը՝ 6,5 միլառ դրամ, «Ֆիլիպ Մորիս Արմէնիա»ն՝ 5,1 միլիառ դրամ վճարած հարկերով։

Խոշոր հարկատուներուն առաջին տասնեակը կ՛եզրափակէ «ԱՐՄԷՆԻԱ» միջազգային օդանաւակայաններ» ընկերութիւնը, որ նախորդ տարուան նոյն ժամանակաշրջանին հետ բաղդատելով բարելաւած է դիրքը 18 կէտով կամ 2,2 միլիառ դրամով աւելի հարկեր վճարած է պետական պիւտճէին։

 

LEAVE A REPLY

Please enter your comment!
Please enter your name here