Հայ Ճարտարագիտական Խումբը Կ՛ողջունէ Հայաստանի Գործակցութիւնը Ուտեստեղէնի Եւ Երկրագործութեան Կազմակերպութեան Հետ

0
142

ՖՐԵԶՆՕ.- Երկրագործութեան մարզին մէջ Հայաստանի եւ Արցախի ժողովուրդին 30 տարիներէ ի վեր սպասարկող եւ Ֆրեզնօ հաստատուած Հայ ճարտարագիտական խումբը (ATG) կ՛ողջունէ 24-էն 26 Յուլիսի միջեւ, Երեւանի մէջ տեղի ունեցած աշխատանիստը, որ իրականացաւ Հայաստանի կառավարութեան եւ Ուտեստեղէնի ու երկրագործութեան կազմակերպութեան Բոյսերու պաշտպանութեան միջազգային քարտուղարութեան միջեւ համագործակցութեան շնորհիւ։

Եռօրեայ աշխատանիստը նուիրուած էր յատկապէս խաղողներու վնաս հասցնող մակաբոյծ միջատներու (ֆիլոքսերա) դէմ խաղողներու դիմադրականութիւնը զօրացնելու ջանքերուն, յատկապէս որովհետեւ այդ միջատներուն տարածումը սկսած էր մտահոգիչ մակարդակի հասնելու Հայաստանի նախորդ իշխանութիւններուն օրերուն, հասնելով մինչեւ Արարատեան հովիտ։

1997-էն ի վեր այս հարցը հետապնդող Հայ ճարտարագիտական խումբը, համագործակցութեամբ տեղացի մասնագէտներու եւ կազմակերպութեան նուիրատուներուն հետ, այդ միջատին դիմադրականութիւն ունեցող այգիներ ցանեց Արցախի Հանրապետութեան Ասկերան շրջանի Աղտամի սահմանամերձ Խրամորթ գիւղին մէջ, մօտաւորապէս 200 արտավար տարածքով, մնայուն աշխատանքի առիթներ ստեղծելով 53 ընտանիքներու։ Սակայն Արցախի մէջ խաղողագործութեան վերականգնումի ջանքերը վնաս կրեցին Արցախի նախկին վարչապետ Արայիկ Յարութիւնեանի օրերուն, որ խաղողագործներուն կը պարտադրէր շուկայի գինէն շատ աւելի ցած գինով խաղողը իրեն վաճարել, շահագործելով իր դիրքը։ Այս պատճառով շատեր նոյիսկ արմատախիլ ըրին իրենց այգիները։ Աւելի ուշ, Հայ ճարտարագիտական խումբը ֆիլոքսերա միջատներու դիմադրականութիւն ունեցող խաղողներու իր պահեստը յանձնեց յայտնի գինեգործ Վահէ Քէօշկէրեանին, ինչ որ կ՛երաշխաւորէ նաեւ այգիներու պահպանումը Արցախի մէջ։

Մինչ այդ, Հայաստանի մէջ այս մակաբոյծ միջատին տարածումը զսպելու նպատակով, 2014-էն ի վեր Հայ ճարտարագիտական խումբին կողմէ կատարուող կոչերը անտեսուած են իշխանութիւններուն կողմէ, սակայն վերոյիշեալ աշխատանիստը յոյսեր կու տայ այս վտանգին դէմ դնելու բազմաճակատ պայքարի մը շնորհիւ։

Հայ ճարտարագիտական խումբին գործունէութեան նպաստելու համար, տուրքերէ զուրկ նուիրատուութիւնները կարելի է կատարել ATG, P.O. Box 5929, Fresno, CA, 93755 հասցէին, այցելելով

www.atgusa.org կայքը, դիմելով (559) 224-1002 թիւին կամ

[email protected] հասցէին։

LEAVE A REPLY

Please enter your comment!
Please enter your name here