Մեծամօրի Մէջ Յուշարձան՝ Ապրիլեան Պատերազմին Զոհուածներուն Յիշատակին

0
184

ԵՐԵՒԱՆ, «Արմէնփրէս».- Արմաւիր մարզի Մեծամօր քաղաքին մէջ 12 Օգոստոսին բացումը կատարուեցաւ Ապրիլեան պատերազմին զոհուած Սաշա Գալստեանին եւ միւս զինուորներուն նուիրուած յուշարձան՝ Սաշա Գալստեանի ծննդեան օրը, երբ ան պիտի դառնար 23 տարեկան:

Ներկայ էին զոհուած զինուորներուն հարազատները, Հայաստանի պաշտպանութեան փոխնախարար Գաբրիէլ Բալայեան, Հայաստանի վարչապետ Նիկոլ Փաշինեանի տիկինը՝ Աննա Յակոբեան:

Յուշարձանի հեղինակ Արթուր Բաղդասարեան լրագրողներուն հետ ունեցած զրոյցին ընթացքին ըսաւ, որ յուշարձանը նախագծած է՝ նկատի ունենալով յաւիտենութեան խորհուրդը, հայրենասիրութեան գաղափարը:

«Սաշայի ծնողների ու մեր կողմից նախաձեռնուեց ստեղծել մի յուշարձան, որը կը միաւորի մեր ժողովրդին ու մեր հերոսներին: Սա միասնականութեան նպատակ է հետապնդում, որպէսզի այս յիշողութիւնը կենդանի մնայ ու երիտասարդների կեանքը հետագայ սերունդների համար օրինակ դառնայ», յայտնեց Բաղդասարեան՝ նշելով, որ միայն քանի մը ամսուան ընթացքին նախագծած է յուշարձանը։

Անոր համաձայն՝ յուշարձանին հիմքը հայրենիքն է, իսկ երկու սիւներն ալ կը խորհրդանշեն ժողովուրդը, որ երկու ձեռքին մէջ խաչ կը բռնէ իբրեւ յաւերժութեան նշան: Ապրիլեան պատերազմին զոհուած բոլոր զինուորներուն անունները գրուած են յուշարձանի հենասիւներուն վրայ:

Սաշա Գալստեանի հայրը՝ Վաչագան Գալստեան, որուն մտայղացումն էր նման յուշարձան կանգնեցնելը, նշեց, թէ ճիշդ է, որ յուշարձանը իրենց տան առջեւ կանգնած է, սակայն անիկա ապրիլեան քառօրեային զոհուածներուն յիշատակը կը յաւերժացնէ։ «Սաշայի ֆիզիքապէս կենդանութեան օրօք ես մէկ տղայ ունէի, իսկ նրա ու տղաների զոհուելուց յետոյ՝ բոլորն իմն են։ Սաշան մենակ չի արել իր գործը, եւ ես չէի կարող անել մի բան, որտեղ իր եղբայրների անունները չլինէին։ Միակ բանը, որը պէտք է անեմ եզակիօրէն իր համար՝ իր շիրմաքարն է։ Այսօր Սաշան իմ տղան չէ, ազգի տղան է ու նոյն ձեւով մնացած տղաներն իմն են», ըսաւ Վաչագան Սարգսեան՝ աւելցնելով, որ ինք մէկ որդի տուաւ ազգին, փոխարէնը ունենալով 106 տղաք։

Զոհուած Նորայր Գալստեանի մայրը՝ Նունէ Աթաջանեանը, լրագրողներուն հետ ունեցած զրոյցին ընթացքին նշեց, որ շնորհակալ է Սաշա Գալստեանի ընտանիքին, որ յուշարձանի միջոցով, Սաշայի գլխաւորութեամբ, կը յաւերժացնէ 107 տղոց յիշատակը։

Սաշային մայրը ըսաւ, որ երկու տարիէ տխրութեամբ կը նշէին իր որդիին տարեդարձը, սակայն ասկէ ետք տարբեր պիտի ըլլայ. «Ես Սաշին խօսք եմ տալիս, որ այսուհետեւ իր ծնունդներն ուրախ եմ դիմաւորելու, քանի որ նա կայ», յայտնեց ան։

Յուշարձանը կեանքի կոչուած Է Սաշային հօր, անոր ընկերներուն ու Գալստեաններու ընտանիքի բարեկամ Խորէն Քոթանջեանի աջակցութեամբ։

LEAVE A REPLY

Please enter your comment!
Please enter your name here