Ենգիբարեանի Անուան Մնջախաղի Փառատօնը «Արմէնփրես»-ը Պարգեւատրեց Ոսկիէ Մետալով

0
748

«Արմէնփրես» պետական լրատուական գործակալութիւնը արժանացաւ Լէոնիտ Ենգիբարեանի անուան մնջախաղի միջազգային փառատօնի ոսկիէ մետալին` իբրեւ փառատօնի գլխաւոր տեղեկատուական գործընկեր: «Արմէնփրես»-ի փոխանցումով` 14 օգոստոսին, փառատօնի փակման հանդիսաւոր արարողութեան ընթացքին ոսկիէ մետալը գործակալութեան տնօրէն Արամ Անանեանին յանձնեց Երեւանի մնջախաղի պետական թատրոնի գեղարուեստական ղեկավար, փառատօնի գլխաւոր արտադրող Ժիրայր Դադասեան:

«Չորրորդ տարին անընդմէջ մենք միասնաբար կ՛իրականացնենք մնջախաղի փառատօնը միջազգայնացնելու աշխատանքը, եւ ես ուրախ եմ, որ աշխարհի փառատօնային քարտէսին վրայ իր վառ տեղը ունի Լէոնիտ Ենգիբարեանի անուան մնջախաղի միջազգային փառատօնը», ըսաւ Անանեան:

Փառատօնի փակման հանդիսաւոր արարողութիւնը սկսաւ «Ֆորմա» թատերախումբի «Վայ-վայ» ներկայացումով: Անիկա մարդոց կենդանի շփման բացակայութեան մասին է, որուն հիմնական պատճառը համացանցն է: Ներկայացման աւարտէն ետք փառատօնի բոլոր 7 երկիրներու մասնակիցներն ու գործընկերները արժանացան ոսկիէ մետալներու եւ այլ շնորհակալական պարգեւներու:

LEAVE A REPLY

Please enter your comment!
Please enter your name here