Ստեփանակերտի, Երեւանի Եւ Գիւմրիի Մէջ՝ «Մաեստրօ Մանսուրեան» Խորագիրով Համերգաշար

0
618

ԵՐԵՒԱՆ, «Արմէնփրէս».- 1-13 սեպտեմբեր տեղի պիտի ունենայ «Մաեստրօ Մանսուրեան» խորագիրով համերգաշար՝ նուիրուած Հայաստանի ժողովրդական արուեստագէտ, մեր օրերու առասպելական յօրինող Տիգրան Մանսուրեանի 80-ամեայ յոբելեանին: Մանսուրեանի բազմաոճ ստեղծագործութիւնները ներառող համերգներ տեղի պիտի ունենան Երեւանի, Ստեփանակերտի եւ Գիւմրիի մէջ:

Համերգաշարը կը ներկայացնէ Երեւանի քաղաքապետարանը՝ Հայաստանի կրթութեան, գիտութեան, մշակոյթի եւ մարմնակրթութեան նախարարութեան աջակցութեամբ: Հայաստանի պետական սիմֆոնիք նուագախումբը՝ գեղարուեստական ղեկավար Սերգէյ Սմբատեանի ղեկավարութեամբ, առաջին անգամն ըլլալով պիտի ներկայացնէ յօրինողին յայտնի մեղեդիները՝ նոր գործիքաւորումով:

Հինգ համերգներուն պիտի հնչեն Մանսուրեանի շարժապատկերի համար յօրինուած երաժշտութենէն՝ սիմֆոնիք եւ սենեկային ստեղծագործութիւնները:

Երաժշտական փառատօնը ընթացք պիտի առնէ 1 սեպտեմբերին‘ Արցախի Հանրապետութեան Անկախութեան տօնի նախօրեակին, Ստեփանակերտի Վերածնունդի հրապարակին վրայ, 4 սեպտեմբերին Կոմիտասի անուան սենեկային երաժշտութեան տան մէջ պիտի թեւածեն անոր ստեղծագործութիւնները, 5 սեպտեմբերին Արամ Խաչատրեան համերգասրահին մէջ Հայաստանի պետական սիմֆոնիք նուագախումբը պիտի ներկայացնէ Տիգրան Մանսուրեանի գործիքային նուագները,   6 սեպտեմբերին սիմֆոնիք նուագախումբը օփերայի եւ պալէի ազգային ակադեմական թատրոնին մէջ պիտի հրամացնէ Մանսուրեանի շարժապատկերի երաժշտութիւնը: Իսկ 13 սեպտեմբերին մանսուրեանական փառատօնը պիտի եզրափակուի խորհրդանշական վայրի մը մէջ՝ Գիւմրիի Սեւ բերդ յուշարձանին:

Նշենք, որ Մանսուրեան յատուկ կապ ունի Շիրակ աշխարհին հետ՝ բարի ու ջերմ յիշողութիւններու ընդմէջէն։ Արդարեւ, Լիբանանէն Մանսուրեանները ներգաղթած են Շիրակ, իսկ Տիգրան Մանսուրեան իր առաջին երաժշտական կրթութիւնը ստացած է Գիւմրիի մէջ:

LEAVE A REPLY

Please enter your comment!
Please enter your name here