«1915ին Թալէաթին Աջակցող Հայեր Կային. Դժբախտաբար, Այսօր Եւս Կան». Փայլան՝ Մարգար Եսայեանին

0
397

ԵՐԵՒԱՆ, «Էրմենիհապեր».- Թուրքիոյ խորհրդարանի պատգամաւոր եւ իշխող՝ Արդարութիւն եւ բարգաւաճում կուսակցութեան անդամ Մարգար Եսայեան իշխանամէտ «Աքշամ» թերթին մէջ լոյս տեսած յօդուածով կը քննադատէ քրտամէտ Ժողովուրդներու ժողովրդավարական կուսակցութեան հայ պատգամաւոր Կարօ Փայլանի եւ անոր կուսակից Էպրու Կիւնայի Հարաւային Ամերիկա կատարած այցելութեան ընթացքին արտայայտած կարծիքները։

«Քրտամէտ կուսակցութենէն երկու պատգամաւորներ շրջապտոյտի ելած են Հարաւային Ամերիկայի մէջ, միջազգային ուժերէն խնդրելով միջամտել Թուրքիոյ գործերուն: Երկիր առ երկիր, խորհրդարան առ խորհրդարան շրջելու եւ միջազգային ուժերէն Թուրքիոյ գործերուն միջամտել խնդրելու անոնց այս վարքագիծը զիս տեղափոխեց նախորդ դարասկիզբը: Քիւրտիստանի բանուորական կուսակցութիւնը եւ Ժողովուրդներու ժողովրդավարական կուսակցութիւնը դաշնակցականներէն ու հնչակեաններէն աւելի են, բայց պակաս չեն», կը գրէ Եսայեան՝ պատգամաւորներուն գործունէութիւնը որակելով «քաղաքական մուրացկանութիւն»:

Իբրեւ պատասխան՝ Փայլան գրեց. «Հարաւային Ամերիկայի մէջ մեր բոլոր հանդիպումներուն ընթացքին մենք միայն կոչ ըրինք՝ աջակցելու Թուրքիոյ ժողովրդավարական ուժերուն: Ասիկա ակնյայտ զրպարտութիւն է: Եթէ ըսածներս չփաստես, ուրեմն զրպարտիչ ես, Մարգար:

24 Ապրիլ 1915-ին ձերբակալման ենթակայ հայերու ցանկերը կազմելու ընթացքին Թալէաթ փաշային աջակցող հայեր ալ կային. դժբախտաբար, այսօր եւս կան»:

LEAVE A REPLY

Please enter your comment!
Please enter your name here