Եւ հիմա, սիրելի Ատիս, արդէն «գիշեր է, գիշեր…»

0
394

ՎԻԳԷՆ  ՅՈՎՍԷՓԵԱՆ

Մարդիկ կան որոնք կեանքի ընթացքին առաքելութեան մը վրայ կը գտնեն իրենք-զիրենք, առանց որ իրենց ուղեւորութիւնը կեանքի երազ կամ նպատակ ըլլայ: Մէկ խօսքով, անոնք տուեալ տեղը կը գտնուին տուեալ ժամանակին` ու ահա կեանքը կ‘առաջնորդէ իրենց վերապահուած պատմական առաքելութեան:

Ես անձնապէս երբէք առիթը չեմ ունեցած մօտէն ծանօթանալու Ատիս Հարմանտեանին: Բազմիցս լսած եմ իր կատարողութեամբ երգեր, յաճախ տեսած եմ զինք բեմերու վրայ` նոյնիսկ որպէս արդէն իր ժամանակը անցուցած երգիչ-երաժիշտ: Ինք, երբ զիս տեսներ` յատուկ ժպիտով մը և համակրանքով մը կ‘ողջունէր զիս` փոխանակուած մէկ-երկու բառերով…«Դուն լա՞ւ ես փաշաս»:

Բայց երբ քիչ առաջ Ատիսին մահուան տխուր լուրը ստացայ, կարծէք իմ մէջս, իմ էութենէս բան մը մերաւ: Կարծէք ինծմէ բան մը խլուեցաւ: Ատիսը ինծմէ առաջուան սերունդին, իմ սերունդիս, և մեզմէ ետք եկողներու սերունդին համար ներկայացուց սփիւռքահայ էսդրատային երաժշտութիւնը, և իր երաժշտութեամբ քանի-քանի սիրոյ ոդիսականներ պսակեց: Քանի-քանի սիրող սրտերու թարգմանը հանդիսացաւ…

Քաջ վտահ եմ որ երբ երիտասարդ Ատիսը իր երաժշտական ասպարէզին առաջին քայլերը կ‘առնէր, իր մտքովն անգամ չէր անցներ թէ ճակատագիրը իրեն համար ինչպիսի դեր վերապահած է: Եւ այսպէս, Ատիսը դարձաւ հայ երգի անզուգական և իւրայատուկ դեսպան` իր ոճով, իր տեսքով, իր ժպիտով, ու…գրաւեց սրտեր:

Ճակատագիրը զինք նախատեսած էր որպէս սփիւռքահայ երգարուեստի հսկայ, ու ինքը փայլուն կատարեց իրեն վիճակուած դերը:

Եւ հիմա, սիրելի Ատիս, արդէն «գիշեր է, գիշեր…»

Աստուած հոգիդ լոյսերու մէջ պահէ:

https://youtu.be/JODLlH5o4s8

LEAVE A REPLY

Please enter your comment!
Please enter your name here