ՈՒԵՖԱ-ի Աջակցութեամբ՝ Արհեստական Խոտով 76 Դաշտ

0
246

ԵՐԵՒԱՆ, «ՓանԱրմինիըն».-ՈՒԵՖԱ-ի նախագահ Ալեքսանտր Չեֆերին Հայաստանի վարչապետ Նիկոլ Փաշինեանի հետ ունեցած հանդիպումէն ետք յայտարարեց, որ ՈՒԵՖԱ պիտի շարունակէ նպաստել Հայաստանի մէջ ֆութպոլի զարգացման, նաեւ՝ ենթակառուցուածքներու բարելաւման:

Հանդիպման, որուն մասնակցեցաւ նաեւ Հայաստանի ֆութպոլի ֆետերասիոնի նախագահ Արթուր Վանեցեան, յատկապէս նշուեցաւ, որ ՈՒԵՖԱ-ի աջակցութեամբ նախատեսուած է այս տարուան ընթացքին Հայաստանի մարզերուն մէջ կառուցել արհեստական խոտով 76 խաղադաշտեր, ֆետերասիոնին յատկացանել անհրաժեշտ մարզական գոյք, նաեւ ծրագիրներ իրականացնել ֆութսալի եւ կանանց ֆութպոլի զարգացման ուղղութեամբ:

Վարչապետը ողջունեց Ալեքսանտր Չեֆերին այցելութիւնը՝ կարեւոր նկատելով Հայաստանի եւ ՈՒԵՖԱ-ի միջեւ սերտ ու արդիւնաւէտ համագործակցութիւնը ի նպաստ Հայաստանի մէջ ֆութպոլի զարգացման: Ան յատկապէս լուսարձակի տակ առաւ Հայաստանի ֆութպոլի ենթակառուցուածքներու զարգացման ուղղութեամբ ՈՒԵՖԱ-ի կողմէ ցուցաբերուող աջակցութիւնը եւ նշեց, որ անոր իբրեւ արդիւնք երկրին մէջ պիտի իրականանան մարզական տարբեր ծրագիրներ։ Փաշինեան համոզում յայտնեց, որ Չեֆերինի այս այցելութիւնը պիտի նպաստէ փոխգործակցութեան, նոր ծրագիրներու քննարկման ու իրականացման, որոնց կարգին՝ Հայաստանի մէջ ազգային մարզադաշտի կառուցման։

Ալեքսանտր Չեֆերին շնորհակալութիւն յայտնեց վարչապետին եւ դիտել տուաւ, որ գոհացուցիչ է Հայաստանի ֆութպոլի ֆետերասիոնին հետ համագործակցութիւնը: Ան նշեց, որ ժամանակակից աշխարհին մէջ ֆութպոլը դարձած է տնտեսութեան առանձին ճիւղ, ուր շրջանառութեան մէջ կը մտնեն հսկայական ֆինանսական միջոցներ: Զրուցակիցները համակարծիք էին, որ ֆութպոլը մեծ դեր ունի ընկերային կեանքին մէջ, ժողովուրդները համախմբելու եւ միաւորելու առումով ալ:

Հանդիպման ընթացքին զրուցակիցները անդրադարձան ՀՖՖ-ի եւ ՈՒԵՖԱ-ի միջեւ համագործակցութեամբ յառաջիկային նախատեսուող նախագիծերուն վերաբերող շարք մը այլ հարցերու։

LEAVE A REPLY

Please enter your comment!
Please enter your name here