Հրազդան Գետի Վրայ 252 մեթր Երկարութեամբ Կամուրջ Պիտի Կառուցուի

0
209

Մայրաքաղաքի Արգաւանդ-Շիրակ նոր ճանապարհահատուածի կառուցման մեկնարկը տրուած է: 11 սեպտեմբերին, 2,7 քմ․ երկարութեամբ ճանապարհի կառուցումը ազդարարող երկկողմ յուշագիրը ստորագրած են Երեւանի քաղաքապետ Հայկ Մարութեանն ու Levantina Ingenieria y Construccion  (Սպանիա) ընկերութեան լիազօր ներկայացուցիչ Լուիզ Լոփեզ Մոլոնին:

Մանրակերտի վրայ, ՀՀ փոխվարչապետ Տիգրան Աւինեանին եւ Երեւանի քաղաքապետ Հայկ Մարութեանին ներկայացուած են ծրագրին մանրամասնութիւնները: Ասիական զարգացման դրամատան կողմէ ֆինանսաւորուող Քաղաքային կայուն զարգացման ներդրումային ծրագրի Թրանշ 2-ի ծիրէն ներս կառուցուող երթեւեկութեամբ նոր ճանապարհը պիտի ունենայ 4-6 երթեւեկելի գօտի` միջինը 24-28 մեթր լայնութեամբ: Ճանապարհահատուածը կը ներառէ նաեւ Հրազդան գետի վրայ 252 մեթր երկարութեամբ եւ 28 մեթր լայնութեամբ մետաղական կամուրջի կառուցում, ինչպէս նաեւ մէկ անցումի կառուցում` Իսակով – Բաբաջանեան փողոցներու հատման վայրին մէջ առկայ ճանապարհային հանգոյցին վրայ:

«Նոր ճանապարհահատուածը ռազմավարական կարեւոր նշանակութիւն ունի Երեւանի եւ ընդհանրապէս Հայաստանի համար: Այսօր մայրաքաղաքին մէջ ունինք չորս կամուրջ, եւ այս ծրագրով Հրազդան գետի վրայ կառուցուելիքը պիտի ըլլայ հինգերորդը: Այս ճանապարհահատուածը զգալիօրէն պիտի թեթեւցնէ Երեւանի մէջ երթեւեկութիւնը»,- նշեց քաղաքապետը:

Շինարարական աշխատանքները իրականացնող սպանական ընկերութեան լիազօր ներկայացուցիչ Մոլոնին իր հերթին նշեց, թէ  նման նախագիծերու իրականցման մէջ ընկերութիւնը ունի երկարամեայ փորձ, եւ վստահեցուց, որ աշխատանքները պիտի աւարտին  նախատեսուած ժամկէտին:

Արգաւանդ-Շիրակ ճանապարհը Երեւանի արեւմտեան օղակաձեւ ճանապարհի մէկ հատուածն է, որ նաեւ կը կապէ Մալաթիա-Սեբաստիա եւ Շէնգաւիթ վարչական շրջանները:

Պայմանագրի արժէքն է 26 միլիոն տոլարին համարժէք ՀՀ դրամ:

Շինարարութիւնը պիտի աւարտի  21 ամիսէն:

LEAVE A REPLY

Please enter your comment!
Please enter your name here