Սերժ Սարգսեան. “Մենք Պարտաւոր Ենք Շիտակ Նայել Իրականութեան Աչքերին”

0
317

Հայաստանի  հանրապետութեան նախկին նախագահը Անկախութեան տօնին առիթով  խզեց իր լռութիւնը:

ՀՀ երրորդ նախագահ Սերժ Սարգսեան շնորհաւորական ուղերձ յղած է Հայաստանի Հանրապետութեան անկախութեան 28-րդ տարեդարձին առթիւ:
Հոն տեղ գտած են հազիւ թէ քօղարկուած խիստ ամբաստանութիւններ կամ քննադատութիւններ, ինչպէս օրինակ՝ «բոլորիս պարտականութիւնն է յատկապէս այսօր` այս խառնակ ժամանակներում, սրբօրէն պահպանել եւ պաշտպանել այդ արժէքները տարատեսակ ոտնձգութիւններից, զգօն լինել, երբ անհայրենիք, շինծու արժէքներ եւ բարքեր քարոզողները մեր դուռն են ծեծում», կամ՝ «…երեսնամեայ անկախ պետականութեան ձեռքբերումները ձախողումներ համարելը, սեփական հասարակութեան մէջ բաժանարար գծեր քաշելը թշնամու կրակոցից վտանգաւոր է»։

Ստորեւ անոր ուղերձին ամբողջութիւնը.-

«Յարգելի՛ հայրենակիցներ,
Սրտանց շնորհաւորում եմ ձեզ Հայաստանի Հանրապետութեան անկախութեան 28-րդ տարեդարձի առթիւ:
Այսօր, տօնի կապակցութեամբ, բազմաթիւ շնորհաւորանքներ եւ բարեմաղթանքներ կը հնչեն, խնջոյքներ կը կազմակերպուեն, կենացների պակաս եւս չի զգացուի։
Մեզ համար կարեւորագոյն այս տօնին, սակայն, ես առաջին հերթին ուզում եմ խօսել պատասխանատւութեան եւ պարտականութեան մասին` յիշելով եւ յիշեցնելով մեր ժողովրդի արժանաւոր զաւակներից մէկի՝ ռազմական, քաղաքական, պետական գործիչ եւ մեծ իմաստասէր Գարեգին Նժդեհի խօսքերը.
«Անկախութիւնը, անկախ Հայրենիքն իրաւունք լինելուց առաջ պարտականութիւն է, որից խուսափող ժողովուրդները կորցնում են իրենց բարոյական գոյութեան իրաւունքը»։
Անկախութիւնը վերացական չէ, այլ շատ առարկայական է ու շօշափելի. այն մեր լեզուն է՝ որպէս հազարամեակների մեր գոյութեան եւ ինքնութեան առհաւատչեայ, մեր հաւատքն է, աւանդական ընտանիքը, մշակոյթը, ինքնիշխան մեր պետութեան սահմաններում ամփոփուած այն հողակտորը, որ մեր ազատատենչ եղբայրների ու քոյրերի արեամբ եւ քրտինքով է ներծծուած։
Ուստի, բոլորիս պարտականութիւնն է յատկապէս այսօր` այս խառնակ ժամանակներում, սրբօրէն պահպանել եւ պաշտպանել այդ արժէքները տարատեսակ ոտնձգութիւններից, զգօն լինել, երբ անհայրենիք, շինծու արժէքներ եւ բարքեր քարոզողները մեր դուռն են ծեծում, անաղարտ պահել, զարգացնել ու հարստացնել մեր ազգային արժէքները եւ փոխանցել հետագայ սերունդներին: Անվարան կանգնել մեր հոգեւոր եւ ֆիզիկական անվտանգութեանն սպառնացող բոլոր վտանգների առջեւ` թոյլ չտալով ոչ մի առաջխաղացում։
Սա՛ է անկախութեան մեր սերնդի պարտքը եւ պատասխանատւութիւնը Հայրենիքի ու ազգի առջեւ։
Անկախութեան տօնին մի առիթով ասել եմ եւ այսօր ուզում եմ յիշեցնել.
Քարոզչական եւ քաղաքական առասպելների ամենադաժան, բայց արդարացի թշնամին իրականութիւնն է: Մենք պարտաւոր ենք շիտակ նայել իրականութեան աչքերին, զատել կործանարար կեղծիքը ճշմարտութիւնից, հասկանալ, որ անկախութեան պաշտպանութեան պատերազմում տարած յաղթանակը կասկածի տակ դնելը, սեփական որդիների խիզախութիւնը փառաբանելու, արժանւոյնս գնահատելու փոխարէն՝ կասկածելի նպատակներով քննարկումներն ու յաղթանակած զինուորի ոգին կոտրելը, շուրջ երեսնամեայ անկախ պետականութեան ձեռքբերումները ձախողումներ համարելը, սեփական հասարակութեան մէջ բաժանարար գծեր քաշելը թշնամու կրակոցից վտանգաւոր է։
Ես լաւատես եմ` հաւատում եմ մեր ժողովրդի իմաստնութեանը, վստահ եմ, որ դարաւոր մեր պատմութեան այս հանգրուանում սրբօրէն կը վերաբերուենք բազում զոհողութիւնների ու զրկանքների գնով վերականգնուած անկախութիւնը պաշտպանելու մեր պարտականութեանը, վեր կը կանգնենք բոլոր տեսակի անարժէք եւ անցողիկ շահերից, կը լինենք միասնական եւ սթափ` գիտակցելով նաեւ բոլորիս միակ Հայրենիքին սպառնացող արտաքին վտանգները։
Կրկին շնորհաւորում եմ բոլորիս անկախութեան տօնի առթիւ։
Աստուած պահապան Հայաստանին եւ հայ ժողովրդին»։

LEAVE A REPLY

Please enter your comment!
Please enter your name here