ՀԲԸՄ- ՀԵԸ ԱՆԴՐԱՆԻԿ ՍԵՒԱՆ ՇԱՐԺՈՒՄԻՆ ՍԿԱՈՒՏԱԿԱՆ ՆՈՐ ՏԱՐԵՇՐՋԱՆԻ ԲԱՑՈՒՄԸ

0
279

Աւանդութիւններու պահպանումը   համոզում  դարձած է  ՀԲԸՄ-ՀԵԸ  Անդրանիկի  սկաուտական  զոյգ  շարժումներուն  համար:

Յիշատակելի   խարուկահանդէսով մը տարեշրջանը  փակելէ  ետք,  ՀԵԸ Անդրանիկ  Սեւանը, Շաբաթ, 12  Հոկտեմբեր  2019-ի յետմիջօրէին, ՀԲԸՄ-ի Լիբանանի Շրջանակային  Յանձնաժողովի, ՀԵԸ-ի Կեդրոնական Վարչութեան, ՀԵԸ-ի զանազան  միաւորներու վարչութեանց, ծնողներու, միութենականներու  եւ բարեկամներու  ներկայութեան  հանդիսաւորապէս  կատարեց սկաուտական նոր տարեշրջանին բացումը:

ՀԵԸ  Անդրանիկ  փողերախումբը, Լիբանանի, Հայաստանի, ՀԲԸՄ- ՀԵԸ-ի եւ ՀԵԸ-ի փողերախումբի դրօշներով, մուտք գործեց ՀԲԸՄ- ՀԵԸ-ի Զապէլ  Մովսէսեան  կեդրոնի   շրջափակը: Անոր հետեւեցան  ՀԵԸ Անդրանիկ  Սեւան սկաուտական   շարժումի խումբերը, իրենց  փոխխմբապետներուն եւ  խմբապետներուն առաջնորդութեամբ:

Լիբանանի, Հայաստանի,  ՀԲԸՄ-ի, ՀԵԸ-ի եւ ՀԵԸ Անդրնաիկ Սեւանի   քայլերգներուն  յոտնկայս ունկնդրութենէն  ետք, ՀԵԸ Անդրանիկ Սեւան սկաուտական շարժումի  ընդհանուր խմբապետ Կարեն Պասմաճեան տուաւ  հաւաքը սկսելու ազդանշանը:

Քոյրեր  Նարին   Սերայտարեան  (քառավել)  եւ  Զէյնա  Քարամ (արենուշական խմբապետուհի) հայերէն եւ արաբերէնով բարի գալուստ մաղթեցին ներկաներուն:

ՀԵԸ Անդրանիկ Սեւանի սկաուտական վարչութեան ատենապետ  Նշան Ղորղորեան բարի գալուստի  խօսքին մէջ թուեց անցնող տարեշրջանի  ՀԵԸ Անդրանիկ Սեւանի   գործունէութեան կարեւոր  հանգրուանները:

ՀԵԸ-ի Կեդրոնական Վարչութեան ատենապետ Վիգէն Չերչեան յայտնեց, թէ բոլոր  ՀԵԸ-ականներուն համար  մեծ  ուրախութիւն  է բարձրացնել ՀԵԸ Անդրանիկ Սեւան սկաուտական  շարժումին  նոր  տարեշրջանի  վարագոյրը.« Տարի մը ամբողջ  հետեւեցանք, մասնակցեցանք  Ձեր փայլուն աշխատանքին, ներքին եւ հրապարակային ձեռնարկներուն,  դաստիարակչական  միջոցառումներուն  եւ այս բոլորին  հայելին   հանդիսացող «Միշտ Պատրաստ»  պարբերաթերթին: Տակաւին, ո՞վ կրնայ  մոռնալ անցնող ամրան  աննախընթաց  բանակումը եւ խարուկահանդէսը:

Վստահ եմ, որ  բազմաթիւ  ծրագիրներ եւ երազներ ունիք յառաջիկայ  տարուան համար, բայց առաւել վստահ եմ,  ինչպէս՝ երէկ, վաղը՝  նոյնպէս, հաւաքական եւ  միասնական աշխատանքով յաջողութեան պիտի հասցնէք   Ձեր ծրագիրները: Վստահ եմ, որ նոր անդամ-անդամուհիներ  պիտի  գան  խտացնելու ՀԵԸ Անդրանիկ Սեւան  սկաուտական շարժումին  շարքերը:

Այս ուրախ  առիթով,  ողջոյնի ջերմ  խօսքեր կ’ուղղեմ  ՀԵԸ Անդրանիկ Սեւան  ակումբի  Գործադիր Մարմինի անդամներուն, ՀԵԸ Անդրանիկ Սեւան սկաուտական շարժումի  ընդհանուր  խմբապետին եւ խմբապետական  կազմի բոլոր անդամներուն,արծուիկներուն,  գայլիկներուն, սկաուտներուն, արենուշներուն, քառաւելներուն, երէցներուն, սկաուտական ծնողական  վարչութեան անդամներուն, ինչպէս նաեւ  բոլոր միութենականներուն».ըսաւ  Վիգէն Չերչեան եւ յաջողութեան մաղթանքով աւարտեց իր խօսքը:

AEL-ի խօսքը  փոխանցեց    քոմիսէր  Փերուզ Թիւթիւնճեան:   SDL-ի խօսքը՝  քոմիսէր   Աւօ Քարաքեշիշեան:

Շնորհակալութեան խօսքերէն ետք  պարգեւատրուեցաւն  խումբերու տիպար  անդամ-անդամուհիները, որուն յաջորդեցին փոխանցումները:

Ներկաները     շնորհաւորեցին  նոր  պաշտօններ ստանձնած  քոյրերը եւ եղբայրները միաժամանակ վայելեցին  ծնողաց  վարչութեան պատրաստած   հիւրասիրութիւնը:

Վարձքը կատար բոլոր աշխատողներուն:

ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ

 

LEAVE A REPLY

Please enter your comment!
Please enter your name here