Աւելցած Է Լրագրողներուն Եւ Լրատուամիջոցներուն Վերաբերող Դատերուն Թիւը

0
392

ԵՐԵՒԱՆ, «Փանորամա».- Այս տարուան երրորդ եռամսեակին շարունակուած է լրագրողներուն եւ լրատուամիջոցներուն ներգրաւածութեամբ նոր դատական հայցերու աննախադէպ հոսքը: Այդ ժամանակաշրջանին տարբեր դատարաններուն մէջ բացուած է 33 դատ, որոնցմէ 30-ը Հայաստանի քաղաքացիական օրէնսգիրքի 1087.1 յօդուածով նախատեսուած՝ վիրաւորանքի եւ զրպարտութեան հիմքով են, երկուքը կը վերաբերին տեղեկատուութիւններ ստանալու եւ տարածելու իրաւունքի խախտումներուն, 1 պարագայի ալ դատ բացուած է ընդդէմ քաղաքագէտի:

Լրագրողներուն հետ ունեցած հանդիպման ընթացքին այս տուեալները ներկայացուց Խօսքի ազատութեան պաշտպանութեան կոմիտէի նախագահ Աշոտ Մելիքեան՝ անդրադառնալով Հայաստանի մէջ խօսքի ազատութեան վիճակին եւ լրագրողներուն ու լրատուամիջոցներու իրաւունքներու խախտումներուն վերաբերող 2019-ի երրորդ եռամսեակի զեկոյցին:

«Այս տարուայ առաջին եւ երկրորդ եռամսեակների վիրաւորանքի եւ զրպարտութեան հիմքով ընդդէմ լրատուամիջոցների եւ լրագրողների նոր դատական գործերի քանակն է՝ համապատասխանաբար 28 եւ 25: Այսինքն այս տարուայ 9 ամիսների ընթացքում գրանցուել է 83 այդպիսի գործ, ինչը շատ աւելին է, քան նախորդ երկու տարիների նոյն ցուցանիշները միասին վերցրած:

«Դատական 30 գործերից 13 դէպքում հայցուորները ներկայ եւ նախկին պաշտօնեաներն են, 9-ը՝ շարքային քաղաքացիներ, 5-ը՝ գործարարներ, 1-ը՝ քաղաքական գործիչ, 1ը՝ շօու բիզնեսի ներկայացուցիչ եւ 1 դէպքում լրագրողը հայց է ներկայացրել լրատուամիջոցի դէմ», ըսաւ ան:

Ա. Մելիքեանի համաձայն՝ դատական գործերու այս հոսքը պայմանաւորուած է այն իրողութեամբ, որ յետյեղափոխական շրջանին աւելի եւս սրեցաւ լրատումիջոցներուն բեւեռացումը, բաժանումը՝ ըստ քաղաքական–ֆինանսական ճամբարներու, քաղաքական պայքարը տեղափոխուեցաւ լրատուամիջոցներուն, նաեւ լրատուամիջոցները լեցուեցան սուտ լուրերով, ապատեղեկատուութեամբ: Ան նշեց, որ որոշ պարագաներու ալ քաղաքական գործիչները, շօու պիզնըսի ներկայացուցիչները լրագրողներուն հարցումներէն բարկացած, երբեմն վիրաւորուած, կը դիմեն դատարաններ՝ այդպիսով փորձելով ճնշում բանեցնել լրատուամիջոցներուն վրայ։

Ներկայացուած տուեալներով, ընդհանուր առմամբ, 2019-ի երրորդ եռամսեակին ընթացքին արձանագրուած է լրատուամիջոցներու եւ անոնց աշխատակիցներուն նկատմամբ տարատեսակ ճնշումներու 35 դէպք, տեղեկութիւններ տարածելու եւ ստանալու իրաւունքի խախտումներու 11 դէպք, ֆիզիքական բռնութեան 1 փաստ:

LEAVE A REPLY

Please enter your comment!
Please enter your name here