Լիբանանի Հոգեւոր Պետերը Կը Զօրակցին Ժողովուրդին Արդար Պահանջներուն

0
254
Լիբանանեան Բանակը Կը Փորձէ Վերաբանալ
Ժալ Էլ Տիպի Եւ Զուքի Մայրուղիները

Շաբաթ մը առաջ «Ուաթսափ»-ի ծառայութեան համար քաղաքացիին վրայ յաւելեալ տուրք պարտադրելու մտայղացումը բռնկեցուց լիբանանեան փողոցը եւ յորդեցուց ընկերային ու տնտեսական ծանր տագնապի մէջ գտնուող լիբանանցիին համբերութեան բաժակը: Այս մասին նախագահ զօր. Միշել Աուն այսօր կէսօրուան ժամը 12:00-ին լիբանանցի ժողովուրդին պիտի ուղղէ պատգամ մը:

Այդ օրէն ի վեր լիբանանցիները սկսան ողողել Լիբանանի տարբեր շրջանները` հիւսիսէն հարաւ, անցնելով մայրաքաղաքէն եւ հասնելով մինչեւ Լեռնալիբանան եւ Պեքաա:

Օրըստօրէ ցուցարարները բազմացան եւ մերժեցին դուրս գալ փողոցներէն ու հրապարակներէն` անդամալուծելով ամբողջ երկիրը եւ սառեցնելով կեանքն ու աշխատանքը: Անոնք կառչած մնացին իշխանափոխութիւն կատարելու իրենց պահանջին` շարունակելով պահանջել իշխանութեան երեք պետերուն, կառավարութեան եւ խորհրդարանին հրաժարականները:

Բողոքի ցոյցերէն եօթը օր ետք` երէկ բանակը միջամտեց ցոյցերուն` հաստատելով, որ երկրին մայրուղիները կարելի չէ փակ պահել: Այս իսկ պատճառով տեղի ունեցան ընդհարումներ` բանակին եւ ցուցարարներուն միջեւ:

Հրմշտուքի եւ բանակին հրահանգներուն չընդառաջելու պատճառով արձանագրուեցան վիրաւորներ, եւ բողոք բարձրացաւ բանակին գործադրած ճնշումներուն դէմ:

Բանակին եւ ցուցարարներուն միջեւ Ժալ Էլ Տիպի մէջ արձանագրուած միջադէպին ընթացքին Փաղանգաւոր կուսակցութեան ղեկավար, երեսփոխան Սամի Ժեմայէլ եկաւ ցոյցին վայրը եւ ցուցարարներուն կողքին ձայն բարձրացուց, ինչպէս նաեւ հրաւիրեց զանոնք նստելու գետին եւ իրենց մարմիններով փակ պահելու մայրուղին:

Իրենց կարգին, երեսփոխաններ Էլիաս Հանքաշ եւ Նաամաթ Աֆրամ ուղղուեցան Զուք, բանակին ու քաղաքացիներուն միջեւ հրմշտուքի ընթացքին հասան ցոյցին վայրը եւ ժողովուրդը մղեցին մնալու իրենց պահանջներուն վրայ:

Հանքաշ կոչ ուղղեց բանակի հրամանատար զօր. Ժոզեֆ Աունի, որ երկրին զինուորները քաղաքացիներուն դիմաց չդնէ:

Իր կարգին, Աֆրամ յայտնեց, որ ինք ցուցարարներուն մօտ եկած է զօրակցելու անոնց, սակայն միաժամանակ հաստատելու, որ պոռալով կարելի չէ բան իրականացնել:

Աֆրամ ընդգծեց, որ ինք ժողովուրդին ձայնը կը ներկայացնէ եւ յանձնառու է անոր պահանջներուն:

Իր կարգին, Մարատա հոսանքի ղեկավար Սլէյման Ֆրենժիէ ընկերային ցանցերուն ընդմէջէն գրառումով մը հաստատեց, որ խաղաղ ցոյցը ժողովուրդին իրաւունքն է` աւելցնելով սակայն, որ իրենք համաձայն չեն ճամբաները փակելու եւ ժողովուրդին աշխատանքն ու երթեւեկը արգելակելու քայլերուն:

Բանակը հաստատեց, որ իր նպատակը ցուցարարներուն ցրուումը չէ, այլ` ճամբաներուն վերաբացումը:

Այս իմաստով բանակի հրամանատարութիւնը հրապարակեց հաղորդագրութիւն մը, որուն մէջ նշուեցաւ, որ բանակի հրամանատարութիւնը ժողովուրդի կողքին կը կանգնի` նկատի ունենալով ապրուստի անոր արդար պահանջները:

«Բանակը յանձնառու կը մնայ պաշտպանելու խաղաղ կերպով ձեր տեսակէտը արտայայտելու իրաւունքը, սակայն չի կրնար արտօնել ճամբաներու փակումը, այլ քաղաքացիներուն երթեւեկը խափանելու փորձերը, ինչպէս նաեւ խափանարարական արարքներ գործելու համար ձեր ներկայութեան օգտագործումը:

Մենք ճամբաները կը վերաբանանք ձեզի համար եւ քաղաքացիին տարրական կարիքներուն` սնունդի, դեղորայքի եւ վառելանիւթի ապահովումին համար:

Երկրին դիմագրաւած այս զգայուն փուլին, բանակին զինուորները ամբողջ Լիբանանի տարածքին տեղակայուած են` պաշտպանելու համար ձեր խաղաղ ցոյցերն ու ձեզ, այսինքն` իրենց ընտանիքը:

Բանակը կը մաղթէ, որ քաղաքացիները անսան իր կոչերուն եւ համագործակցին իրեն հետ, որպէսզի կարելի ըլլայ ճամբաները բաց պահել քաղաքացիներուն երթեւեկին դիմաց: Շնորհակալութիւն մեր հայրենիքը մաքուր պահելու համար, բոլո՛րս լիբանանցիներ ենք, բոլո՛րս մէկ ընտանիք ենք», նշուեցաւ բանակին հաղորդագրութեան մէջ:

Նշենք, որ առաւօտեան կանուխ ժամերուն ցուցարարները փակեցին մեծ թիւով ճամբաներ, որոնց շարքին նաեւ Պէյրութի միջազգային օդակայանի ճամբան, որ անմիջապէս վերաբացուեցաւ բանակին կողմէ:

Երեկոյեան ժամը 6:00-ին, Ռիատ Սոլհի եւ Նահատակաց հրապարակները, Համրայի փողոցը, Ղազիրի, Զուքի, Զղարթայի, Ժիպէյլի, Պաթրունի, Ժալ Էլ Տիպի, Սուրի, Նապաթիէի, Ալէյի, Մասնաայի, Պաալպեքի, Ռաշայայի եւ Թրիփոլիի շրջանները հաւաքավայրերը դարձան մեծ թիւով լիբանանցի քաղաքացիներու, որոնք լիբանանեան դրօշին կողքին բարձրացուցին նաեւ լիբանանեան բանակին դրօշը եւ մինչեւ ուշ գիշեր մնացին փողոցը:

Պէտք է աւելցնել, որ Ժալ Էլ Տիպի մէջ բանակին եւ քաղաքացիներուն միջեւ ընդհարումներէն ետք, գիշերուան շուրջ ժամը 8:30-ին, լիբանանեան բանակը Ժալ Էլ Տիպէն հեռացաւ:

Միւս կողմէ, ժողովրդային բողոքի շարունակուող ցոյցերուն պատճառով Դրամատուներու միութեան եւ կրթութեան նախարարութեան որոշումով դրամատուներն ու դպրոցները իրենց դռները այսօր եւս փակ կը պահեն:

Պքերքէի Մէջ

Մարոնի համայնքի Պշարա Ռայի պատրիարքը երէկ Պքերքէի մէջ նախագահեց կաթողիկէ եւ ուղղափառ համայնքներու հոգեւոր պետերու արտակարգ նիստին, որուն ներկայ գտնուեցաւ նաեւ Մեծի Տանն Կիլիկիոյ Արամ Ա. կաթողիկոսը եւ Տանն Կիլիկիոյ կաթողիկէ հայոց Գրիգոր Պետրոս Ի. կաթողիկոս պատրիարքը:

Նիստին ընթացքին քննարկուեցաւ երկրին մէջ տիրող կացութիւնը:

Նիստէն ետք Ռայի պատրիարքը յայտնեց, որ եկեղեցին միշտ ժողովուրդին կողքին կանգնած է եւ անոր կարիքներուն զօրակցած:

Ան հաստատեց, որ շաբաթէ մը ի վեր կատարուող բողոքի ցոյցերը արդարացի են, որովհետեւ պետութիւնը պէտք եղած լրջութեամբ լուծումներ չէ ապահոված ժողովուրդի պահանջներուն:

Ռայի պատրիարքը հաստատեց, որ իրենք կը հասկնան եւ կը բաժնեն ժողովուրդին ցասումը, յատկապէս նկատի ունենալով, որ ժողովուրդը կրցաւ համայնքային եւ յարանուանական իր պատկանելիութիւնը շրջանցել եւ քաղաքացիական պետութիւն պահանջել` համախմբուելով լիբանանեան դրօշին ներքեւ:

«Լիբանանի հիմնադրութենէն 100 տարի ետք նուազագոյնն է, որ ժողովրդավար եւ քաղաքացիական պետութիւն գոյանայ, ընկերային ապահովագրութիւնը երաշխաւորուի, իսկ պետութենէն իւրացուած գումարները վերադարձուին», ըսաւ ան:

Ռայի պատրիարքը հաստատեց, որ ժամանակը հասած է, որ լիբանանեան պետութիւնը անսայ ժողովուրդի պահանջին: Ան կոչ ուղղեց միջազգային ընտանիքին` զօրակցելու Արեւելքի առաջին ժողովրդավար երկրին եւ պահպանելու երկրին իսլամ-քրիստոնեայ համակեցութիւնը:

«Լիբանանցի ժողովուրդը արժանի է կեանքի, ազատութեան, կայունութեան եւ բարգաւաճումի», ընդգծեց Ռայի պատրիարքը:

Նախքան արտակարգ նիստին գումարումը, յոյն ուղղափառ համայնքի Էլիաս Աուտէ եպիսկոպոսը հաստատած էր, որ անիշխանութիւնը աւելի նախընտրելի է, քան` այսօրուան իրավիճակը: Իր խօսքը ուղղելով ճամբաներուն վերաբացումը պահանջողներուն` Աուտէ եպիսկոպոսը հարց տուաւ, թէ արդեօք անոնք նախապէս կ՛աշխատէի՞ն, որ հիմա կը պահանջեն աշխատանքի հասնելու համար ճամբաները վերաբանալ:

Հանրապետութեան նախագահ զօր. Միշել Աուն հեռաձայնային հաղորդակցութիւն մը ունեցաւ Ռայի պատրիարքին հետ եւ ողջունեց Պքերքէէն հրապարակուած հաղորդագրութիւնը, ինչպէս նաեւ Ռայի պատրիարքին կոչերը:

Նշենք, որ նախագահ Աուն նախանցեալ գիշեր երկարատեւ հեռաձայնային հաղորդակցութիւն մը ունեցած էր Ռայի պատրիարքին հետ եւ քննարկած երկրին իրադարձութիւնները, իսկ երէկ առաւօտեան երեսփոխան Իպրահիմ Քանաան այցելած էր Ռայի պատրիարքին` Պաապտա-Պքերքէ խորհրդակցութեան շրջագիծին մէջ:

Տար Ֆաթուայի Պաշտօնական Հաղորդագրութիւնը

Հանրապետութեան միւֆթի շէյխ Ապտել Լաթիֆ Տըրիան երէկ հրապարակեց հաղորդագրութիւն մը, որուն մէջ կոչ ուղղեց լիբանանցի պատասխանատուներուն դրական հայեացքով նկատի ունենալու լիբանանցի ժողովուրդին արդար պահանջները:

Ան հաստատեց, որ Տար Ֆաթուա բարձր կը գնահատէ լիբանանցի ժողովուրդին քաջ կեցուածքը, ինչպէս նաեւ արդարացի կը գտնէ անոր պահանջները:

«Լիբանանեան պետութիւնը պէտք է զօրակցի այս արդար իրաւունքներուն եւ ամէնէն մօտիկ ապագային գործադրէ զանոնք», ըսաւ միւֆթի Տըրիան:

Տիւրզի Հոգեւոր Պետին Կոչը

Տիւրզի համայնքի հոգեւոր պետ շէյխ Նայիմ Հասան շեշտեց, որ ոչ ոք պէտք է անտեսէ ժողովուրդին պահանջը, որ հսկայական է եւ այդքան ցաւ պատճառած, որ ան ստիպուած է բարկութեամբ եւ ցասումով արտայայտել զայն:

Շէյխ Հասան հաստատեց, որ երկիրը կը դիմագրաւէ տնտեսական տագնապ մը, որուն լուծման համար արտակարգ ճիգերու  կարիքը կը զգացուի:

Ան կոչ ուղղեց պատասխանատուներուն ամէն ջանք ի գործ դնելու, որպէսզի լիբանանցիին իրաւունքները կարելի ըլլայ պաշտպանել եւ անոր արժանապատիւ կեանք մը ապահովել` անսալով անոր արդար պահանջներուն:

Շէյխ Հասան կոչ ուղղեց քաղաքական դասակարգին հրաւիրելու փրկութեան երկխօսութիւն մը:

Վարչապետ Հարիրի Նախագահեց Բարեկարգումներու Նախարարական Յանձնախումբի Նիստին

Վարչապետ Սաատ Հարիրի յետմիջօրէին Կեդրոնական Պէյրութի իր բնակարանին մէջ նախագահեց տնտեսական եւ ելեւմտական բարեկարգումներու նախարարական յանձնախումբի նիստին, որուն ներկայ գտնուեցան նախարարներ Ալի Հասան Խալիլ, Սելիմ Ժրայսաթի, Եուսեֆ Ֆընիանոս, Մոհամետ Ֆընէյշ, Ուաէլ Ապու Ֆաուր, Ժամալ Ժարրահ, Մոհամետ Շքէյր, Ատել Աֆիունի, Սալեհ Ղարիպ, Ալպեր Սարհան, Մանսուր Պթայշ, նախարարաց խորհուրդի ընդհանուր քարտուղար դատաւոր Մահմուտ Մաքքիէ եւ կարգ մը խորհրդատուներ:

Նիստին ընթացքին քննարկուեցաւ իւրացուած գումարները վերադարձնելու յատուկ օրինագիծը, որուն շուրջ առաջարկներ կատարելու իմաստով դիմում կատարուեցաւ Դատական իշխանութեան գերագոյն խորհուրդին` անոր ճշդելով տասը օրուան ժամկէտ մը:

Վարչապետ Հարիրի հետեւեցաւ երկրին ապահովական իրադարձութիւններուն:

Այս շրջագիծին մէջ ան հեռաձայնային հաղորդակցութիւններ ունեցաւ ապահովական կառոյցներու պետերուն եւ բանակի հրամանատարութեան հետ` իմանալու համար տարբեր շրջաններու մէջ տիրող ապահովական կացութեան մասին:

Վարչապետ Հարիրի ընդգծեց երկրին ապահովական կայունութիւնը եւ քաղաքացիներուն երթեւեկը ապահովելու իր յանձնառութիւնը:

Միւս կողմէ, վարչապետ Հարիրի երէկ կէսօրին ընդունեց Կեդրոնական դրամատան կառավարիչ Ռիատ Սալամէն, որուն հետ քննարկեց երկրին տնտեսական եւ ելեւմտական ընդհանուր կացութիւնը:

Վարչապետ Հարիրի ընդունեց նաեւ Դրամատուներու միութեան նախագահ Սելիմ Սֆէյրը, որուն հետ քննարկեց ելեւմտական եւ դրամատնային կարգ մը հարցեր, յատկապէս կառավարութեան վերջին նիստին ընթացքին որդեգրուած բարեկարգումներու փաստաթուղթին լոյսին տակ:

Վարչապետին այցելեց նաեւ Ընկերվար յառաջդիմական կուսակցութեան մէկ պատուիրակութիւնը, որուն մաս կազմեցին ճարտարարուեստի եւ կրթութեան նախարարներ Ուաէլ Ապու Ֆաուր եւ Աքրամ Շեհայէպ, ինչպէս նաեւ երեսփոխաններ Ֆայսալ Սայեղ, Պիլալ Ապտալլա, Հատի Ապու Հասան եւ կուսակցութեան ընդհանուր քարտուղար Զաֆեր Նասեր: Ներկայ էր նաեւ նախկին նախարար Ղաթթաս Խուրի:

Հանդիպումին ընթացքին քննարկուեցան երկրին քաղաքական իրադարձութիւնները, ինչպէս նաեւ ներկայ զարգացումները:

Նշենք, որ երեկոյեան ժամը 6:00-ին, վարչապետ Հարիրի հեռաձայնային հաղորդակցութիւն մը ստացաւ Արաբական լիկայի ընդհանուր քարտուղար Ահմետ Ապուլ Ղէյթէն, որ շեշտեց, թէ Արաբական լիկան պատրաստ է Լիբանանի տնտեսական հարցերու լուծման նպատակ ունեցող բոլոր ջանքերուն օժանդակելու:

Այն Թինէի Մէջ

Խորհրդարանի նախագահ Նեպիհ Պըրրի երէկ չորեքշաբթի օրուան երեսփոխանական հանդիպումին ընթացքին յայտնեց, որ ժողովուրդին ներկայացուցած տնտեսական պահանջները մաս կը կազմէին այն 22 կէտերուն, որոնց մասին իրենք յայտարարած էին եւ տասնեակ տարիներէ ի վեր կը ջանային լուծումներ գտնել անոնց:

«Այդ բարեկարգումները, որոնց մասին կը խօսէինք եւ կը փափաքէինք իրականացնել, պիտի գործադրուին շնորհիւ ժողովրդային շարժումներուն եւ անոնց կողմէ բանեցուած ճնշումին», ըսաւ Պըրրի:

«Խորհուրդը նախադասութիւններով էր, իսկ խորհուրդը այսօր յեղափոխութեամբ է», ըսաւ ան:

Պըրրի բարձր գնահատեց կառավարութեան կողմէ վաւերացուած տնտեսական բարեկարգումներու փաստաթուղթը, «որ թէեւ ընտիր է, սակայն անոր զօրութիւնը գործադրուելուն մէջ է», նշեց ան:

Պըրրի ընդգծեց, որ երկիրը կարելի չէ կախեալ վիճակի մէջ ձգել` աւելցնելով, որ իր մտավախութիւնը անիշխանութիւնն է եւ ոչ թէ այլ բան:

Պըրրի նշեց, որ ինք ստորագրած է 2020-ի պետական ամավարկն ու անոր կապուած մնացեալ ամավարկերը փոխանցած է ելեւմտական հարցերու ու պետական ամավարկի խորհրդարանական մնայուն յանձնախումբին:

Անդրադառնալով քաղաքացիական պետութեան կերտումին եւ ընտրական նոր օրէնքին` Պըրրի ըսաւ, որ ներկայ պայմանները բացառիկ են քաղաքացիական պետութիւնը հիմնելու առումով, եւ կոչ ուղղեց որդեգրելու ընտրական օրէնք մը, որ հիմնուած է համամասնական դրութեան վրայ` Լիբանանը վերածելով մէկ ընտրաշրջանի:

Պըրրիի այցելած էր Ընկերվար յառաջդիմական կուսակցութեան մէկ պատուիրակութիւնը, որուն մաս կազմեցին ճարտարարուեստի եւ կրթութեան նախարարներ Ուաէլ Ապու Ֆաուր եւ Աքրամ Շեհայէպ, եւ երեսփոխաններ Հատի Ապու Հասան, Ֆայսալ Սայեղ, Պիլալ Ապտալլա, նախկին երեսփոխան Ղազի Արիտի եւ  կուսակցութեան ընդհանուր քարտուղար Զաֆեր Նասեր: Հանդիպումին ներկայ գտնուեցաւ նաեւ ելեւմուտքի նախարար Ալի Հասան Խալիլ:

Հանդիպումէն ետք պատուիրակութիւնը մեկնեցաւ առանց մեկնաբանութիւն կատարելու:

Միքաթիի Մամլոյ Ասուլիսը

Լեռնալիբանանի ընդհանուր դատախազ Ղատա Աուն երէկ հրապարակեց ամբաստանագիր մը նախկին վարչապետ Նեժիպ Միքաթիի, անոր զաւկին` Մահեր Միքաթիի եւ եղբօրորդիին` Ազմի Միքաթիի, ինչպէս նաեւ «Աուտէ» դրամատան դէմ` ապօրինի ձեւով հարստացումի յանցանքով, եւ պահանջեց Լեռնալիբանանի աւագ քննիչ դատախազէն հարցաքննել զանոնք:

Իբրեւ պատասխան, Նեժիպ Միքաթի երէկ յետմիջօրէին հրաւիրեց մամլոյ ասուլիսի մը, որուն ընթացքին ան ողջունեց Լիբանանի տարբեր հրապարակները լեցուցած երիտասարդներն ու երիտասարդուհիները` նկատել տալով, որ ինք դատախազ Աունի որոշումէն զարմացած է:

Ան նշեց, որ իր դէմ ամբաստանութիւնը պատգամ մըն է այն իմաստով, որ այլեւս ոմանք չեն կրնար հանդուրժել երկրին սահմանադրութիւնն ու Թաէֆի համաձայնագիրը պաշտպանելու իրենց կեցուածքները:

«Հաւանաբար այս քայլը նաեւ վրէժխնդրութիւն է զօր. Միշել Աունը հանրապետութեան նախագահ չընտրելուս իմաստով, եւ այդ պատճառով ալ անոնք կը փափաքին ինձմով սկսիլ եւ դանակը դնել վիզիս», ըսաւ Միքաթի:

Ան շեշտեց, որ բոլորին ծանօթ է, թէ ինք դատական իշխանութիւններուն տրամադրութեան տակ կը գտնուի եւ այդպէս ալ պիտի մնայ:

Ան կոչ ուղղեց արդարութեան նախարարին` վերջ տալու դատական իշխանութեան գործունէութեան քաղաքականացումին:

Իր խօսքը ուղղելով հանրապետութեան նախագահին` Միքաթի կոչ ուղղեց անոր դատական համակարգը չքաղաքականացնելու, լիբանանեան բանակը հեռու պահելու բախումներէն եւ տեղեկատուութեան մարզին ձայնը լռեցնելու փորձերուն վերջ տալու:

«Ես դատական իշխանութիւններուն տրամադրութեան տակ կը գտնուիմ եւ երեսփոխանի անձեռնմխելիութեան ետին չեմ թաքնուիր, ինչպէս նաեւ պատրաստ եմ դրամատնային հաշիւներուս գաղտնիութիւնը վերացնելու», եզրափակեց ան:

Անհրաժեշտ է նշել, որ Միքաթի երէկ առաւօտեան հարցազրոյցի մը ընթացքին առաջարկած էր, որ կառավարութիւնը հրաժարի եւ կազմուի փոխանցման կառավարութիւն մը:

Ան նկատել տուած էր նաեւ, որ իւրաքանչիւր պատասխանատու պէտք է հաշուետուութեան կանչուի այն ժամանակաշրջանին համար, որուն ընթացքին ինք իշխանութեան վրայ գտնուած էր:

LEAVE A REPLY

Please enter your comment!
Please enter your name here