Ֆրանչիսկոս Պապը Կը Սերտէ Վարդապետներու Կուսակրօնութեան Օրէնքի Մեղմացման Եւ «Կենսոլորտային Մեղք»-ի Ճշդման Հարցերը

0
354

Կաթողիկէ եպիսկոպոսներ շաբաթ օր վարդապետներու թիւի խիստ տագնապ դիմագրաւող Ամազոնի շրջանին նուիրուած սինոտի ընթացքին քուէարկեցին ի նպաստ Ամազոնի շրջանին մէջ վարդապետները կուսակրօնութեան դարաւոր օրէնքէն ազատ կացուցելու առաջարկին:

Աւանդապահները մտահոգութիւն յայտնեցին այդ խիստ օրէնքի մեղմացման նախադէպին նկատմամբ:

Երեք շաբթուան վրայ երկարած սինոտին այլ կարեւոր նիւթերէն էին նաեւ Ամազոնի կենսոլորտի պաշտպանութեան, ինչպէս նաեւ անոր բնիկ ժողովուրդներուն ու անոնց մշակոյթին նկատմամբ յարգանքի հարցերը:

Եպիսկոպոսները առաջարկեցին, որ եկեղեցին ճշդէ «կենսոլորտային մեղքը», որ կը բխի կենսոլորտին վնաս հասցնելու արարքէն:

Պապը նկատի պիտի ունենայ այդ առաջարկները, ինչպէս նաեւ եկեղեցւոյ մէջ կիներուն դերը եւ պատրաստէ իր սեփական փաստաթուղթը, որ ծանօթ է «Առաքելական յորդոր» անունով: Ան յայտնեց, թէ կը յուսայ, որ յորդորը պատրաստ ըլլայ մինչեւ տարեվերջ:

Ֆրանչիսկոս պապը երէկ Ս. Պետրոս տաճարին մէջ սինոտի փակման Ս. պատարագի ընթացքին արտասանած իր քարոզին մէջ քննադատեց անոնք, որոնք Ամազոնի բնիկները կը նկատեն «յետադէմ եւ առանց մեծ արժէքի», փոխանակ ճանչնալու այն, ինչ որ անոնց մշակոյթները կրնան ուրիշներուն ուսուցանել:

«Անոնք կ՛ատեն անոնց աւանդութիւնները, կը ջնջեն անոնց պատմութիւնը, կը բռնագրաւեն անոնց հողերը եւ կը խլեն անոնց ինչքերը: Որքան բռնաճնշումի եւ շահագործման վերափոխուած ենթադրեալ գերակայութիւն գոյութիւն ունի նոյնիսկ այսօր», ըսաւ ան:

Ամազոնէն բնիկներու մասնակցութեամբ մատուցուած պատարագի ընթացքին Ֆրանչիսկոս պապը նաեւ անուղղակի կերպով քննադատեց այն պահպանողականները, որոնք սինոտի աշխատանքային փաստաթուղթի կարգ մը մասերը հերետիկոսական նկատած են:

Պապին հակառակորդները, որոնք ներշնչուած էին երկու կարտինալներու գրութիւններէն, սինոտի ընթացքին քանի մը մեկուսի հաւաքներ կատարեցին: Անոնք մասնաւորաբար գայթակղեցան սինոտի բացման ընթացքին Ամազոնի բնիկներու յղի կնկայ մը արձանին օգտագործման համար` զայն նկատելով հեթանոսական:

Ֆրանչիսկոս պապը ներում հայցեց բնիկներուն հասցուած վիրաւորանքին համար, երբ ծայրայեղ պահպանողական կաթողիկէ գործիչներ գողցան այդ արձանին կրկնօրինակները եւ զանոնք նետեցին Տիբեր գետին մէջ:

Պապը իր քարոզին ընթացքին ակնարկեց «ինքնարդարացման արուեստի այդ վարպետներուն» եւ անոնց, որոնք «ինքնասրբադասման» կը ձգտին:

LEAVE A REPLY

Please enter your comment!
Please enter your name here