Ռուսիոյ Պաշտպանութեան Նախարարը Ստուգում Կատարեց Հայաստանի Ռուսական Ռազմակայանին Մէջ

0
380

ԵՐԵՒԱՆ, «Արմէնփրէս».- Ռուսիոյ պաշտպանութեան նախարար, բանակի զօրավար Սերգէյ Շոյգուն 29 հոկտեմբերին տեսչական ստուգում կատարեց Հայաստանի ռուսական ռազմակայանին մէջ: Ռազմական գերատեսչութեան փոխղեկավար Տիմուր Իվանով նախարարին զեկուցեց, որ Ռուսիոյ սահմաններէն դուրս տեղակայուած ռուսական բոլոր ռազմակայաններուն մէջ պիտի ստեղծուին բազմագործառոյթ մշակութային-ժամանցային կեդրոններ (ՄԺԿ):

Ըստ Իվանովի՝ 102-րդ ռուսական ռազմակայանին մէջ նման կեդրոն պիտի ստեղծուի 2020 թուականին: Այդ կեդրոններուն մէջ պիտի տեղաւորուին թատերասրահներ, վարսայարդարման կեդրոններ, երեխաներու խաղավայրեր:

«Անոնք կը միտին զինուորներու ընտանիքներու անդամներու հետաքրքրութիւններու բաւարարման, անոնք կրնան ո՛չ միայն հանգստանալ այդ կեդրոններուն մէջ, այլ նաեւ ստանալ կենցաղային ու ընկերային բազմաթիւ ծառայութիւններ», ըսաւ Տիմուր Իվանով: Ան նշեց, որ շարք մը զօրամասերուն մէջ նման կեդրոններ, որոնք ստեղծուած են պաշտպանութեան նախարարութեան որոշմամբ, արդէն յաջողութեամբ կը գործեն եւ հիանալի արդիւնք կու տան: Փոխնախարարը նաեւ յայտնեց, որ 102-րդ ռուսական ռազմակայանին մէջ պիտի կառուցուի մարզական համալիր՝ աթլեթի մարզարանով, լողաւազանով եւ ռազմակայանի անձնակազմի ֆիզիքական պատրաստութեան պարապմունքներու, ինչպէս նաեւ զինուորներու ընտանիքներու անդամներու մարզումներուն համար նախատեսուած այլ ենթակառուցուածքով: Անիկա կը ծրագրուի կառուցել 2021 թուականին: Բացի ատկէ, Տիմուր Իվանով զեկուցեց, որ Հայաստանի ռուսական ռազմակայանի բոլոր չորս ռազմական աւաններուն մէջ ծառայողական բնակարաններ պիտի կառուցուին զինուորներուն համար:

Ռուսիոյ պաշտպանութեան նախարարը Տիմուր Իվանովին յանձնարարեց օգնութիւն ցուցաբերել ռազմակայանի տարածքին մէջ գտնուող Ս. Մարտիրոս Ալեքսանդրա թագուհիի տաճարին պատմական նկարագիրի վերստեղծման եւ վերականգնողական աշխատանքներուն:

LEAVE A REPLY

Please enter your comment!
Please enter your name here