Նախագահ Աուն. «Նոր Կառավարութիւնը Պէտք Է Վերականգնէ Ժողովուրդին Վստահութիւնը Պետութեան Նկատմամբ, Եւ Ամէն Ջանք Ի Գործ Պիտի Դնեմ Ստեղծելու Համար Քաղաքացիական Պետութիւն»

0
257

Հանրապետութեան նախագահ զօր. Միշել Աուն իր պաշտօնավարութեան 3-րդ տարուան առիթով երէկ երեկոյեան ժամը 8:30-ին պատգամ ուղղեց լիբանանցիներուն` «հաշուետուութիւն» կատարելու համար երդման ուղերձին մէջ իր յանձնառութիւններուն վերաբերեալ եւ ներկայացնելու համար ինչ որ իրագործուած է, ինչ որ չէ իրագործուած եւ ինչ որ տակաւին պէտք է իրագործուի:

Նախագահ Աուն նշեց այն ինչ որ իրագործուած է ահաբեկչութեամ դէմ պայքարին մէջ, վաւերացուած է ընտրական նոր օրէնքը` հակառակ բոլոր դժուարութիւններուն, շարք մը նշանակումներ կատարուած են պետական կառոյցներուն, բանակին, ապահովական ուժերուն եւ արդարադատութեան համակարգին մէջ, վաւերացուած են 3 պետական ամավարկեր 12 տարուան ընդհատումէն ետք, եւ 2020 թուականի պետական ամավարկը փոխանցուած է խորհրդարան` առաջին անգամ ըլլալով սահմանադրութեամբ ճշդուած ժամկէտին մէջ, շատ ցած բացով եւ առանց ժողովուրդին վրայ յաւելեալ տուրքերու եւ այլն:

Հանրապետութեան նախագահը ընդգծեց, որ 2 ամիս ետք Լիբանան մաս պիտի կազմէ քարիւղ արտադրող երկիրներու ընտանիքին` տրուած ըլլալով, որ ինք պնդած է, որ կառավարութիւնը վաւերացնէ քարիւղի եւ կազի արտահանումի որոշումները, ինչ որ երկարատեւ տնտեսական մուտք պիտի ապահովէ Լիբանանին:

Նախագահ Աուն յայտնեց, որ մեծ ճիգեր թափուած են լուծելու համար տնտեսական տագնապը, բայց տակաւին սպասուած արդիւնքները չեն ստացած` նշելով, որ ազգային տնտեսական ծրագիրը տակաւին կը սպասէ վաւերացման: Ան աւելցուց, որ ենթակառոյցի ծրագիրները պիտի ֆինանսաւորուին «Սետր»-ի վեհաժողովի որոշումներուն հիման վրայ, եւ պէտք է անոնք սկսին գործադրուիլ, քանի որ հրաժարեալ կառավարութիւնը արդէն իսկ ընդառաջած է դրուած պայմաններուն մեծ մասին: Ան աւելցուց, որ այս ծանր թղթածրարը կը սպասէ նոր կառավարութեան, որպէսզի զայն դնէ ճիշդ եւ արագ գործադրութեան ճամբուն վրայ:

Նախագահ Աուն շեշտեց, որ ինք սուրիացի տեղահանուածներու տագնապը բարձրաձայնած է արաբական եւ միջազգային հարթակներէն` նշելով, որ Լիբանան կը վճարէ իր բացարձակ մերժումին գինը այն շարունակական ճնշումներուն, որոնցմով կ՛ուզուի տեղահանուածները Լիբանան պահել, որպէսզի զանոնք ապագային օգտագործեն իբրեւ ճնշումի թուղթ` քաղաքական կարգաւորումներ պարտադրելու համար:

Նախագահ Աուն նաեւ անդրադարձաւ հրաժարեալ կառավարութեան իրագործումներուն եւ կարեւոր ծրագիրներ գործադրելու փաստին: Ան յայտնեց, որ այս կառավարութեան եւ անոր նախորդներուն հարցը կը կայանայ այն փաստին մէջ, որ մօտեցումները աւելի քաղաքական էին, քան մասնագիտական ու գործառնական:

Անդրադառնալով նոր կազմուելիք կառավարութեան` նախագահ Աուն երեսփոխանական պլոքներուն կոչ ուղղեց դիւրացնելու անոր կազմութիւնը` զգուշացնելով ղեկավարները եւ պատասխանատուները, որ փողոցը շահագործելը ամէնէն վտանգաւոր բանն է, որ կրնայ սպառնալ հայրենիքին եւ քաղաքացիական անվտանգութեան: Նախագահը ընդգծեց, որ այս անգամ կը պահանջուի ընդառաջել ժողովուրդի պահանջներուն, անոր վստահութեան արժանանալ, ապա` խորհրդարանին մէջ անոնց ներկայացուցիչներու վստահութեան: Ան անհրաժեշտ նկատեց նախարարները ընտրել ըստ անոնց ունակութեան եւ փորձառութեան, եւ ոչ ըստ անոնց քաղաքական պատկանելիութիւններուն: Նախագահը շեշտեց, որ Լիբանան կը գտնուի վտանգաւոր փուլի մէջ, յատկապէս տնտեսական տեսանկիւնէ, եւ խիստ կարիքը ունի ներդաշնակ կառավարութեան, որ կարող է արտադրել, չխոչընդոտուիլ քաղաքական բախումներու պատճառով եւ աջակցութիւն ստանալ ժողովուրդին կողմէ:

Նախագահ Աուն նաեւ հաստատեց փտածութեան դէմ պայքարի շարունակութիւնը, որքան ալ որ դժուար ըլլայ ճամբան: Ան կոչ ուղղեց լիբանանցիներուն ճնշում բանեցնելու երեսփոխաններուն վրայ, որպէսզի վաւերացնեն հետեւեալ օրէնքները. հանրային դրամի վերաբերեալ ոճիրներու յատուկ դատարանի ստեղծում, փտածութեան դէմ պայքարի ազգային մարմինի ստեղծում, թալանուած դրամներու վերադարձ, անձեռնմխելիութեան եւ դրամատնային հաշիւներու գաղտնիութեան վերացում ներկայ եւ նախկին պատասխանատուներուն եւ բոլոր անոնց, որոնք գործ ունին հանրային դրամին հետ, ինչպէս նաեւ անկախ, քաջ եւ անաչառ դատական իշխանութեան կազմութեան:

Նախագահ Աուն ապա խօսքը ուղղեց ցուցարարներուն եւ յատկապէս երիտասարդներուն` ըսելով, որ անոնք յաջողեցան իրենց ձայնը հասցնել, հակառակ բոլոր կանխարգիլող փորձերուն: Նախագահը աւելցուց, որ անոնք յաջողեցան պահանջել վստահելի կառավարութիւն, փտածութեան դէմ պայքար եւ քաղաքացիական պետութիւն` հեռու համայնքային դրութենէ:

«Բոլորս ունինք ծանր աշխատանք` կազմակերպելու ազգային խորհրդակցութիւններ քաղաքացիական պետութեան գծով, որպէսզի համոզենք անոնց, որոնց պէտք է համոզենք անոր կարեւորութեան գծով», շեշտեց նախագահ Աուն:

Իր պաշտօնավարութեան երկրորդ կէսին սկիզբը նախագահ Աուն խոստացաւ շարունակել պայքարը փտածութեան դէմ, աշխատանք թափել ունենալու արդիւնաւէտ տնտեսութիւն եւ ջանքեր ի գործ դնել ստեղծելու համար քաղաքացիական ժամանակակից պետութիւն եւ ձերբազատուելու համայնքայնութեան ճիրաններէն:

Ջանքեր` Ճշդելու Համար Վարչապետին Անունը

Հանրապետութեան նախագահութիւնը յայտարարեց, որ Հանրապետութեան նախագահ զօր. Միշել Աուն կը գործադրէ անհրաժեշտ ջանքերը ճշդելու համար վարչապետին անունը` նախքան խորհրդարանական խորհրդակցութիւններու թուականի ճշդումը, զանոնք դիւրացնելու նպատակով:

LEAVE A REPLY

Please enter your comment!
Please enter your name here