Նասրալլա. «Նոր Կազմուելիք Կառավարութիւնը Պէտք Է Մտիկ Ընէ Ժողովուրդի Պահանջներուն Եւ Իր Հիմնական Նպատակը Դարձնէ Անոր Վստահութեան Վերականգնումը»

0
241

Հըզպալլայի ընդհանուր քարտուղար սէյիտ Հասան Նասրալլա երէկ պատկերասփռուած ճառի մը ընթացքին յայտնեց, որ ամէն անձ տարբեր ձեւով կը մեկնաբանէ Լիբանանի մէջ տեղի ունեցած ժողովրդային շարժումը` աւելցնելով, որ երբ ապագային պատմութիւնը գրուի, մենք պիտի կարդանք հակասական նիւթեր իրադարձութեան մը մասին, որուն բոլոր տուեալները ունինք: «Երբ ես ցուցարարներուն ըսի, որ անոնց պահանջները արդարացի են, եւ անոնք պէտք է զգուշ ըլլան անոնցմէ, որոնք յաջորդող օրերուն բողոքի ալիքին վրայ բարձրացան, եւ ըսի, որ դուք պէտք է պրպտէք ֆինանսաւորման դրամները` եթէ ձեզի ֆինանսաւորող մը կայ, քանի մը վայրկեան ետք շարք մը լրագրողներ ըսին, որ Նասրալլա ժողովուրդին ըսած է, թէ անոնք դեսպանատուներու գործակալներ են, եւ դեսպանատուները անոնց կը ֆինանսաւորեն: Բայց ես այդպիսի բան չըսի», ընդգծեց Նասրալլա:

Անդրադառնալով Լիբանանի վերջին իրադարձութիւններուն` Նասրալլա նախ եւ առաջ կեդրոնացաւ ցոյցերու դրական կողմերուն վրայ` ընդգծելով, որ համբերութեան միջոցով լիբանանցիները յաջողեցան խուսափիլ այն քաոսէն եւ ներքին պայքարէն, որոնց ուղղութեամբ ոմանք ծրագրած էին այդ ժողովրդային շարժումը տանիլ:

Նասրալլա հաստատեց, որ դէպի քաոս մղելու գործօնները ներկայ էին` անդրադառնալով այն հայհոյանքներուն, որոնք աննախընթաց երեւոյթ մըն էին Լիբանանի պատմութեան մէջ: Ան բացատրեց, որ այս երեւոյթը ինքնաբուխ չէր, այլ` ուղղորդուած, դատապարտելով հայհոյողները եւ կարգ մը լրատուամիջոցները, որոնք կը սփռէին բոլոր հայհոյանքները եւ արժանապատուութեան ու խորհրդանիշներուն ուղղուած նախատինքները: Ան շեշտեց, որ ոմանք կը հրահրէին այս երեւոյթը, որուն միջոցով կը փորձէին բորբոքել միւս փողոցը: Նասրալլա ընդգծեց, որ բոլորը գիտեն, որ Լիբանանի մէջ ամէն մարդ զէնք ունի, սակայն որակաւոր զէնքը միայն Դիմադրութեան մօտ է: Ըստ անոր, պահանջուածը փողոցը կատղեցնելն էր:

Հըզպալլայի ընդհանուր քարտուղարը նշեց այն գործօնները, որոնք նաեւ մղեցին դէպի քաոս. ճամբաները փակելը երկու շաբաթ շարունակ, քաղաքացիները նուաստացնելը, նախատինքներ ուղղելը նաեւ պատկերասփիւռի կարգ մը լրագրողներուն: Ան ընդգծեց, որ մէկ կամ երկու միլիոն ցուցարարներու մասին խօսքը գիտական չէ, այլ կային միլիոնաւորներ, որոնք տունն էին, որոնց ճամբաները փակուած էին եւ որոնցմէ շատեր նախատինքներու ենթարկուեցան: Ան շեշտեց, որ կար ճամբաները փակելու դիտաւորեալ արարք յատկապէս հարաւային Լիբանանի մէջ:

Ան նշեց, որ բազմաթիւ քաղաքական կուսակցութիւններ մեծ ջանքեր ի գործ դրին իրենց հետեւորդները վերահսկելու համար: «Ոմանք հիմա պիտի ըսեն, որ Նասրալլա կը սպառնայ: Բայց ես չեմ սպառնար, եւ ան որ կ՛ուզէ բողոքի ցոյցերը շարունակել, ապա ատիկա իր բնական իրաւունքն է, բայց պէտք է ցոյցերը զերծ մնան հայհոյանքներէ, եւ լրատուամիջոցները պէտք է վերահսկողութեան տակ առնեն հարցերը», շեշտեց Նասրալլա: Ան կոչ ուղղեց գիտակցութեան, համբերութեան եւ չերթալու այնտեղ, ուր ատողները եւ դաւադիրները կ՛ուզեն, որ ժողովուրդը երթայ: Ան նաեւ քաղաքական ղեկավարներուն կոչ ուղղեց չարտօնելու, որ փողոցին ուղղութիւնը շրջուի, եւ ժողովրդային շարժումը ըլլայ համայնքային խորագիրներու տակ, ինչ որ երկրի շահերէն չի բխիր:

Նասրալլա շեշտեց, որ անցնող երկու շաբաթներուն ընթացքին իրենց ամբողջ մտահոգութիւնը եղած է երկիրը չձգել դատարկութեան եւ քաոսի մէջ, յատկապէս անոնց առջեւ, որոնք կառավարութիւնը, նախագահը եւ խորհրդարանը տապալելու կարգախօսներ բարձրաձայնեցին, ինչ որ կը նշանակէ, որ պետութեան բոլոր կառոյցները կը տապալին, եւ դէպի դատարկութիւն կ՛ուղղուինք:

Նասրալլա յայտնեց, որ ոմանք Լիբանանի նախորդ կառավարութիւնները կը պնդեն կոչել «Հըզպալլայի կառավարութիւն», ինչ որ ճիշդ չէ` բացատրելով, որ Հըզպալլա խնդրայարոյց նախարարութիւններ չէ ստանձնած: Ան ընդգծեց, որ կառավարութիւնը այսպէս պիտակելը ուղղուած է արտաքին ուժերը կառավարութեան դէմ լարելու եւ Հըզպալլան պատասխանատուութեան ենթարկելու որեւէ բացթողումի համար:

Անդրադառնալով կառավարութեան հրաժարականին` ան յայտնեց, որ իրենք համաձայն չեն եղած այս հրաժարականին, ոչ թէ անոր համար, որ ատիկա Հըզպալլայի կառավարութիւն է, այլ մեկնելով այն մտավախութենէն, որ երկիրը կրնայ դատարկութեան մէջ յայտնուիլ: «Մենք վախ չունինք Դիմադրութեան վրայ, որովհետեւ շատ ուժեղ ենք, եւ երբեք չէ եղած ժամանակ, որ այսքան ուժեղ եղած ենք բոլոր մարզերուն մէջ: Մենք չենք վախնար, եւ ես ոմանց ըսած եմ, որ եթէ երկիրը քաոսի մէջ յայտնուի, պետութիւնը կրնայ չվճարել պաշտօնեաներուն ամսականները, սակայն Դիմադրութիւնը կարողութիւնը պիտի ունենայ վճարելու ամսականները»:

Նասրալլա բացատրեց, որ Հըզպալլա կը նախընտրէր, որ կառավարութիւնը հրաժարելու փոխարէն ժողով գումարէր եւ ժողովուրդին ներկայացնէր փտածութեան դէմ պայքարի, թալանուած դրամներու վերադարձի ու ընդհանուր համաներման մասին օրէնքները եւ զանոնք յանձնէր խորհրդարանին: Ըստ անոր, վարչապետ Հարիրիի հրաժարականը ունի որոշ հետեւանքներ, ինչպէս` բարեկարգումներու ծրագիրի սառեցում, ընդհանուր համաներման օրէնքի ոչնչացում եւ փտածութեան դէմ պայքարի օրէնքի ոչնչացում:

Նասրալլա յայտնեց, որ յաջորդող օրերուն վարչապետի նշանակում պիտի կատարուի, եւ պէտք է լիբանանցիները համագործակցին` կազմելու համար կառավարութիւնը, իսկ եթէ ընթացիկ աշխատանքները երկար տեւեն, ապա պիտի չըլլայ կառավարութիւն, որ պիտի կարենայ զբաղիլ տնտեսական տագնապին լուծումներ գտնելով, եւ ժողովուրդին պահանջները պիտի կորսուին:

Նասրալլա նոր կազմուելիք կառավարութեան կոչ ուղղեց մտիկ ընելու պարզ ու անօթի ժողովուրդի պահանջներուն եւ իր հիմնական նպատակը դարձնելու ժողովուրդի վստահութեան վերականգնումը: Ան նաեւ նշեց, որ կառավարութիւնը պէտք է լրջութեամբ եւ արագ աշխատի, որովհետեւ ժամանակը կարճ է եւ մարդոց համբերութիւնը` հատած:

Նասրալլա նշեց, որ լրատուամիջոցներու ընդմէջէն քաղաքական գործիչները դէմ կ՛արտայայտուին տուրքերուն, սակայն ժողովներու ընթացքին տուրքեր կը դնեն: Ան շեշտեց, որ ան որ կ՛ուզէ այս երկրին իշխել, պէտք է քաջութիւնը ունենայ անկեղծ վարուելու լիբանանցիներուն հետ, որովհետեւ պէտք չէ փտածութիւն ըլլայ: Ան երկխօսութեան կոչ ուղղեց տարբեր քաղաքական կուսակցութիւններուն միջեւ, ինչպէս նաեւ ժողովրդային շարժումի հիմնական ուժերուն հետ:

Ան յայտնեց, որ այլ ճառով մը պիտի անդրադառնայ Լիբանանի մէջ ամերիկեան դերակատարութեան, որ կ՛արգիլէ լիբանանցիները դուրս գալու իրենց նիւթական եւ տնտեսական հարցերէն: Ան շեշտեց, որ Միացեալ Նահանգները ճնշումներ կը բանեցնեն Լիբանանի վրայ, որպէսզի ապագային պայմաններ դնեն երկրին վրայ: Ան պահանջեց ինքնիշխան եւ իսկական կառավարութիւն, որուն որոշումը լիբանանեան է: «Բոլորը գիտեն, որ մեր որոշումները տեղական են, ազգային, ազատ եւ անկախ», նշեց Նասրալլա:

«Պահանջուածը ինքնիշխան կառավարութիւն է, որովհետեւ եթէ գործադրենք այդ ինքնիշխանութիւնը եւ ոչ թէ արտաքին թելադրանքները, վստահ ենք, որ ունինք մասնագէտներ եւ մարդկային կարողութիւններ, որոնք եթէ իրենց ինքնիշխանութիւնը գործադրեն, պիտի յաջողինք մեր կացութիւնը բարելաւել», շեշտեց Նասրալլա:

Նասրալլա յայտնեց, որ Դիմադրութիւնը պիտի շարունակէ պաշտպանել Լիբանանի օդային տարածքները իսրայէլեան անօդաչու սարքերէն: Ան յայտնեց, որ Իսրայէլին դիմակայող Դիմադրութիւնը կը գործէ անկախ ներքին եւ շրջանային զարգացումներէն:

LEAVE A REPLY

Please enter your comment!
Please enter your name here