Համաշխարհային Վաճառանիշեր՝ Made in Armenia Մակնիշով

0
226

ԵՐԵՒԱՆ, «Արմէնփրէս».- Շարք մը համաշխարհային վաճառանիշեր կրող հագուստներ այսուհետեւ պիտի արտադրուին Հայաստանի մէջ եւ պիտի արտածուին եւրոպական ու ռուսական շուկայ՝ «Պատրաստուած է Հայաստան» մակնիշով:

Այս նպատակին համար բացումը կատարուեցաւ «Սարտեքս», «Ասա Գարմենտ», «Ալեքս տեքստիլ» եւ «Տեքսաս փրոդաքշըն» ընկերութիւններու 4 կարի նոր գործարաններու՝ ներկայութեամբ Հայաստանի վարչապետ Նիկոլ Փաշինեանի, որ ծանօթացաւ արտադրական գործընթացին:

«Այստեղ ապագայում կ՛աշխատի ավելի քան 3000 մարդ: Արտադրանքը հիմնականում արտահանւում է եւրոպական, նաեւ ռուսական շուկայ, տեղում իրացում չկայ: Բոլոր ապրանքները «Made in Armenia» մակնշմամբ են», ըսաւ «Ասա Գարմենտ», «Ալեքս տեքստիլ» եւ «Տեքսաս փրոդաքշըն» ընկերութիւններու տնօրէն Մարատ Մովսիսեան:

«Սարտեքս» ընկերութիւնը հիմնադրած են իտալական «Սարթիս» եւ հայկական «Ալեքս տեքստիլ» ընկերութիւնները: «Սարտեքս»ը կը հանդիսանայ Հայաստանի մէջ իտալական «Սարթիս»ի ներկայացուցիչը: Ընկերութիւնը կը զբաղի հանրաճանաչ MaxMara, Moncler, Peuterey, Dolce&Gabana, Dainese եւ այլ հանրայայտ վաճառանիշեր ունեցող հագուստի արտադրութեամբ։ Անոնք կ՛արտածուին Իտալիա, հոնկէ՝ ամբողջ եւրոպական շուկայ: «Մեր նպատակն այն է, որ ստեղծենք այնպիսի մշակոյթ, որ Հայաստանում տեքստիլը չզարգանայ միայն նրա համար, որովհետեւ աշխատուժն աւելի էժան է: Մենք ուզում ենք, որ «Made in Armenia» ապրանքային նշանը լինի որակի երաշխաւոր», յայտնեց ընկերութեան տնօրէն Մխիթար Աղաբեկեան:

Ներկայ դրութեամբ ընկերութեան մէջ արդէն աշխատատեղ ստեղծուած է 400 մարդու համար, կը նախատեսուի 7 արտադրական հոսքագիծէն հասնիլ մինչեւ 40 արտադրական հոսքագիծի, որ կարելիութիւն պիտի տայ ընկերութեան մէջ ունենալ մինչեւ 2500 աշխատակից: Ներկայիս ընկերութեան մէջ աշխատավարձի երկու աստիճան կայ՝ 100 հազար դրամ եւ 70 հազար դրամ: 70 հազար կը ստանան անոնք, որոնք դերձակի փորձ չունին: Սակայն ընկերութեան նախաձեռնութեամբ վերապատրաստումներէն ետք հետագային աշխատավարձերը պիտի բարձրանան՝ հասնելով մինչեւ 170-180 հազար դրամի:

Նորաբաց «Ասա Գարմենտ»ը հայ-չինական ընկերութիւն է, որ ներկայիս կը զբաղի ֆրանսական «Ճեննիֆըր» մակնիշի հագուստի արտադրութեամբ: Ընկերութիւնը բանակցութիւններ կը կատարէ նաեւ «Զառա» ապրանքանիշի հագուստ արտադրելու համար: Այս պահուն անիկա աշխատատեղ ստեղծած է մօտ 300 հայաստանցիի համար, շուտով աշխատակիցներուն թիւը պիտի հասնի մինչեւ 1000ի:

«Ալեքս տեքստիլ»ը հագուստ կ՛արտադրէ ռուսական ընկերութիւններուն համար, իսկ «Տեքսաս փրոդաքշըն»ը շապիկներ կ՛արտադրէ թէ՛ ռուսական, թէ՛ եւրոպական ապրանքանիշերուն համար:

«Այսօր կարող ենք արձանագրել, որ հայկական արտադրանքը մրցունակ է արտերկրի շուկաներում, եւ մեզ համար հպարտանալու առիթ է, որ աշխարհի տարբեր ծայրերում կարելի է գնել հագուստ եւ պիտակի վրա կարդալ՝ արտադրուած է Հայաստանում», ըսաւ «Ալեքս տեքստիլ»ի սեփականատէր Աստղիկ Ալեքսանեան:

LEAVE A REPLY

Please enter your comment!
Please enter your name here