Խորհրդարանի Նախագահ Նեպիհ Պըրրի Կը Սկսի Օրէնսդրական Յեղափոխութեան` Պայքարելու Համար Փտածութեան Դէմ

0
287

Երէկ խորհրդարանի նախագահ Նեպիհ Պըրրի նախագահեց խորհրդարանի դիւանի նիստին, որուն մասնակցեցաւ նաեւ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի:

Նիստէն ետք Պըրրի մեկնարկը յայտարարեց օրէնսդրական յեղափոխութեան` պայքարելու համար փտածութեան դէմ: Ան յայտարարեց, որ խորհրդարանի 12 նոյեմբերի նիստը պիտի յատկացուի ընտրելու խորհրդարանի դիւանի եւ յանձնախումբերու մնացեալ անդամները: Պըրրի յայտնեց նաեւ, որ այս նիստին պիտի յաջորդէ օրէնսդրական նիստ մը, որուն օրակարգը պիտի ընդգրկէ խորհրդարանական յանձնախումբերու կողմէ պատրաստուած ծրագիրները եւ օրինագիծերը, ինչպէս նաեւ մեծ կարեւորութիւն ունեցող ծրագիրներ եւ օրինագիծեր, որոնք կը քննարկուէին խորհրդարանին մէջ, սակայն անոնց պատրաստութիւնը տակաւին չէ աւարտած իրաւասու յանձնախումբերուն կողմէ:

Այն Թինէի մէջ լրագրողներուն հետ զրոյցի ընթացքին խորհրդարանի նախագահը յայտնեց, որ ինք պիտի օգտագործէ իր լիազօրութիւնները իբրեւ խորհրդարանի նախագահ` Ներքին կանոնադրութեան 38-րդ յօդուածին համաձայն եւ հիմնուելով ժողովրդային շարժումին վրայ, որ ունի օրինական եւ արդարացի պահանջներ, եւ օրակարգին վրայ պիտի ներառէ հետեւեալ օրէնքները. Առաջին` Հրամանագիր թիւ 5272-ը, որ կը վերաբերի փտածութեան դէմ պայքարի օրէնքին, երկրորդ` Նիւթական ոճիրներու դատարանի ստեղծում, երրորդ` Հրամանագիր թիւ 4303, որ կը վերաբերի ծերութեան թոշակի օրէնքին, եւ չորրորդ` Ընդհանուր համաներման վերաբերեալ կրկնուած արագացուած օրինագիծ:

Պըրրի նշեց, որ կան նաեւ շարք մը օրինագիծեր, սակայն նոյն օրէնքին համար կան տարբեր պլոքներէ քանի մը առաջարկներ: Ան բացատրեց, որ այս առաջարկները կ՛ընդգրկեն դրամատնային հաշիւներու գաղտնիութիւնը վերացնելու գործողութիւնը, դրամի լուացում եւ թալանուած գումարներու վերադարձ: Պըրրի շեշտեց, որ այսօր իսկ այս առաջարկները պիտի յանձնուին խորհրդարանական միացեալ յանձնախումբերուն, որպէսզի վերջնականանան, եւ խորհրդարանի փոխնախագահը շաբաթական երեք նիստեր պիտի գումարէ, որպէսզի վերոնշեալ աշխատանքը կատարուի: Պըրրի ընդգծեց, որ խորհրդարանական յանձնախումբերուն յանձնուած է նաեւ խորհրդարանական ընտրութիւններու օրինագիծը, որ շատոնց առաջարկուած է Ազատագրում եւ բարգաւաճում երեսփոխանական պլոքին կողմէ: Ըստ այդ օրինագիծին, Լիբանան ընտրական մէկ տարածք պիտի ըլլայ` համամասնական դրութեան հիման վրայ:

«Միացեալ յանձնախումբերը պիտի գումարեն օրական երեք նիստեր, առաջինը առտու, իսկ միւս երկուքը` իրիկունը: Ես կ՛աջակցիմ ժողովրդային շարժման իր բոլոր պահանջներով, սակայն դէմ եմ ճամբաները փակելուն, հայհոյանքներուն եւ նախատինքներուն», յայտնեց խորհրդարանի նախագահը:

LEAVE A REPLY

Please enter your comment!
Please enter your name here